ഹൂതികളുടെ ആക്രമണം; സുരക്ഷയിൽ വിട്ടുവീഴ്ചയില്ലെന്ന് സൗദി കിരീടാവകാശി മുഹമ്മദ് ബിൻ സൽമാൻ | Mohammed bin Salman Houthi warning
Current: മലയാളം
ഹൂതി സായുധസംഘത്തിന്റെ ആക്രമണങ്ങൾ തുടരുന്നതിനിടെ സൗദി അറേബ്യയുടെ
സുരക്ഷയിൽ യാതൊരു വിട്ടുവീഴ്ചയ്ക്കും തയ്യാറല്ലെന്ന് കിരീടാവകാശി മുഹമ്മദ് ബിൻ സൽമാൻ. രാജ്യത്തിന്റെ സുരക്ഷയ്ക്ക് നേരെയുള്ള ഏത് ഭീഷണിയെയും ശക്തമായി നേരിടാൻ മടിക്കില്ലെന്നും അദ്ദേഹം വ്യക്തമാക്കി. സൗദി ശൂറാ കൗൺസിലിന്റെ ഒമ്പതാം സമ്മേളനത്തിന്റെ മൂന്നാം വർഷം ആരംഭിക്കുന്ന ചടങ്ങിൽ സൽമാൻ രാജാവിന് വേണ്ടി നടത്തിയ പ്രസംഗത്തിലായിരുന്നു കിരീടാവകാശിയുടെ പ്രതികരണം. (Mohammed bin Salman Houthi warning)
യമനിലെ ഹൂതികൾ “അരാജകതയും നാശവും” തെരഞ്ഞെടുത്തെന്നും ഇത് യമൻ ജനതയ്ക്കും മേഖലയ്ക്കും ഭീഷണിയാകുന്നുവെന്നും മുഹമ്മദ് ബിൻ സൽമാൻ ആരോപിച്ചു. അതേസമയം, സംഘർഷങ്ങൾ കുറയ്ക്കുന്നതിനും നയതന്ത്രപരമായ പരിഹാരങ്ങൾ കണ്ടെത്തുന്നതിനും സൗദി സാധ്യമായ എല്ലാ ശ്രമങ്ങളും നടത്തുകയാണെന്നും സുരക്ഷ സംരക്ഷിക്കുന്നതിൽ വിട്ടുവീഴ്ച ഉണ്ടാകില്ലെന്നും അദ്ദേഹം പറഞ്ഞു. തുർക്കിയുമായും പാകിസ്ഥാനുമായും ചേർന്ന് ഓഗസ്റ്റിൽ ഔദ്യോഗികമാക്കിയ മക്ക സംയുക്ത പ്രതിരോധ കരാറും കിരീടാവകാശി പരാമർശിച്ചു. പ്രാദേശിക സ്ഥിരത ശക്തിപ്പെടുത്താനും സംഘർഷങ്ങളുടെ പ്രത്യാഘാതങ്ങളിൽ നിന്ന് മേഖലയെ സംരക്ഷിക്കാനും മൂന്ന് രാജ്യങ്ങളും തമ്മിലുള്ള ഏകോപനം സഹായിക്കുമെന്നാണ് സൗദിയുടെ നിലപാട്.
ചെങ്കടലിലും ബാബ് അൽ-മന്ദബ് കടലിടുക്കിലുമുള്ള കപ്പലുകൾക്കെതിരായ ഹൂതി ആക്രമണങ്ങളെയും മുഹമ്മദ് ബിൻ സൽമാൻ വിമർശിച്ചു. അന്താരാഷ്ട്ര ജലപാതകളെ രാഷ്ട്രീയമോ സാമ്പത്തികമോ ആയ സമ്മർദത്തിനുള്ള ഉപാധിയായി ഉപയോഗിക്കുന്നത് അംഗീകരിക്കാനാകില്ലെന്നും അദ്ദേഹം പറഞ്ഞു. അന്താരാഷ്ട്ര ജലപാതകളിലെ പൊതുതാൽപര്യങ്ങൾ സംരക്ഷിക്കുന്നതിനായി ബഹുരാഷ്ട്ര പ്രതിരോധ നാവിക സഖ്യം രൂപീകരിച്ചിട്ടുണ്ടെന്നും അദ്ദേഹം വ്യക്തമാക്കി.
അതിനിടെ, സൗദിക്കെതിരായ ഹൂതി ആക്രമണങ്ങൾ അടുത്തിടെ ശക്തമായതായി റിപ്പോർട്ടുകളുണ്ട്. കഴിഞ്ഞ ആഴ്ച തായിഫ്, ചെങ്കടലിലെ യാൻബു തുറമുഖ മേഖലകൾ ലക്ഷ്യമിട്ട് ഹൂതികൾ വിക്ഷേപിച്ച ആറ് ബാലിസ്റ്റിക് മിസൈലുകൾ തടഞ്ഞതായി സൗദി നേതൃത്വത്തിലുള്ള സഖ്യം അവകാശപ്പെട്ടിരുന്നു. റിയാദിലെ ഒരു “പ്രധാന ലക്ഷ്യത്തെയും” യാൻബുവിലെ സൗദി അരാംകോ കേന്ദ്രങ്ങളെയും ആക്രമിച്ചതായി ഹൂതികളും അവകാശപ്പെട്ടു. ഈ അവകാശവാദങ്ങളെല്ലാം സ്വതന്ത്രമായി സ്ഥിരീകരിച്ചിട്ടില്ല. ഹൂതി ആക്രമണങ്ങൾ തുടരുകയാണെങ്കിൽ പരസ്പര പ്രതിരോധ കരാറിന്റെ ഭാഗമായി സൗദിക്ക് ആവശ്യമായ എല്ലാ സഹായവും നൽകുമെന്ന് പാകിസ്ഥാൻ പ്രതിരോധ മന്ത്രി ഖവാജ മുഹമ്മദ് ആസിഫും വ്യക്തമാക്കിയിരുന്നു. യമനിലെ അന്താരാഷ്ട്ര അംഗീകാരമുള്ള സർക്കാരിനെ പിന്തുണയ്ക്കുന്ന സൗദിയും ഹൂതികളും തമ്മിലുള്ള സംഘർഷം വീണ്ടും ശക്തമാകുന്നതിനിടെയാണ് പുതിയ നീക്കങ്ങൾ.
Summary: Saudi Crown Prince Mohammed bin Salman said Saudi Arabia would not compromise on its security amid renewed Houthi attacks. He also highlighted diplomatic efforts, a regional defence agreement with Türkiye and Pakistan, and a multinational maritime coalition aimed at protecting Red Sea shipping.
