Skip to content
November 20, 2026
⌕

ഓഡീഷയിൽ 17 ലക്ഷം വോട്ടർമാരെ കൂട്ടത്തോടെ വെട്ടിമാറ്റിയതിനെതിരെ പ്രതിപക്ഷ പ്രതിഷേധം ഇരമ്പുന്നതിനിടെ ചീഫ് ഇലക്ടറൽ ഓഫീസർ ആർ. സാന്താന ഗോപാലൻ അപ്രതീക്ഷിതമായി സ്വമേധയാ വിരമിക്കുന്നു: സർവീസിൽ 18 മാസം ബാക്കിനിൽക്കെ ഐ.എ.എസ് ഉദ്യോഗസ്ഥന്റെ പടിയിറക്കം

October 1, 2026
Share this post to

ഭുവനേശ്വര്‍: ഓഡീഷയില്‍ വോട്ടര്‍പട്ടികയിലെ കൂട്ടവെട്ടിമാറ്റലുമായി ബന്ധപ്പെട്ട് പ്രതിപക്ഷ പ്രതിഷേധങ്ങള്‍ കനക്കുന്നതിനിടെ സംസ്ഥാന ചീഫ് ഇലക്ടറല്‍ ഓഫീസര്‍ ആര്‍. സാന്താന ഗോപാലന്‍ സ്വമേധയാ വിരമിക്കലിന് അപേക്ഷ നല്‍കി. 


വ്യക്തിപരമായ കാരണങ്ങളും ആരോഗ്യപ്രശ്‌നങ്ങളുമാണ് തീരുമാനത്തിന് പിന്നിലെന്നും വോട്ടര്‍പട്ടിക പുതുക്കലുമായി ഇതിന് ബന്ധമില്ലെന്നും അദ്ദേഹം വ്യക്തമാക്കിയതായി ഔദ്യോഗിക വൃത്തങ്ങള്‍ അറിയിച്ചു. 


2001 ബാച്ച് ഓഡീഷ കേഡര്‍ ഐ.എ.എസ് ഉദ്യോഗസ്ഥനായ ഗോപാലന്‍, സംസ്ഥാനത്ത് പ്രത്യേക തീവ്ര വോട്ടര്‍പട്ടിക പുതുക്കല്‍ പ്രക്രിയ പൂര്‍ത്തിയായി ഒരു ആഴ്ചയ്ക്ക് ശേഷമാണ് വിരമിക്കല്‍ അപേക്ഷ സമര്‍പ്പിച്ചത്. തമിഴ്‌നാട് സ്വദേശിയായ ഇദ്ദേഹത്തിന് സര്‍വീസില്‍ ഇനി 18 മാസം കൂടി ബാക്കിയുണ്ട്.

സെപ്റ്റംബര്‍ 21-നാണ് ഓഡീഷയിലെ 3.16 കോടി വോട്ടര്‍മാരുടെ അന്തിമ പട്ടിക പുറത്തുവിട്ടത്. ഇതിന് പിന്നാലെ വോട്ടര്‍പട്ടികയില്‍ നിന്ന് ഏകദേശം 17 ലക്ഷം പേരുകള്‍ നീക്കം ചെയ്തതിനെ ചോദ്യം ചെയ്ത് പ്രതിപക്ഷ കക്ഷികളായ ബിജു ജനതാദളും കോണ്‍ഗ്രസും ശക്തമായി രംഗത്തെത്തിയിരുന്നു. 


വിവിധ സംസ്ഥാനങ്ങളിലെ എസ്.ഐ.ആര്‍ പ്രക്രിയയുമായി ബന്ധപ്പെട്ട് കേന്ദ്ര തിരഞ്ഞെടുപ്പ് കമ്മീഷന്‍ വലിയ വിമര്‍ശനങ്ങള്‍ നേരിടുന്ന പശ്ചാത്തലത്തിലാണ് സി.ഇ.ഒയുടെ ഈ അപ്രതീക്ഷിത പടിയിറക്കം.


കേസ് സമര്‍പ്പണം, വോട്ടര്‍പട്ടികയില്‍ പേര് ചേര്‍ക്കല്‍, ബംഗാളിലെയും ഗോവയിലെയും വോട്ട് വെട്ടല്‍ തുടങ്ങിയ വിഷയങ്ങളില്‍ തിരഞ്ഞെടുപ്പ് കമ്മീഷനിലെ അംഗങ്ങള്‍ക്കിടയില്‍ തന്നെ വലിയ അഭിപ്രായവ്യത്യാസങ്ങള്‍ നിലനില്‍ക്കുന്നുണ്ടെന്ന റിപ്പോര്‍ട്ടുകള്‍ പുറത്തുവന്നതിന് തൊട്ടുപിന്നാലെയാണ് ഈ പുതിയ വികാസം.

 

Get more updates from Pudukad News on Google