സൂര്യ-ജിത്തു മാധവന്‍ ചിത്രം ‘സീന്‍’ കേരളത്തില്‍ വിതരണത്തിനെത്തിക്കുന്നത് ഗോകുലം മൂവീസ്, സൂര്യയുടെ 47-ാമത് ചിത്രം നവംബര്‍ ആറിന് തിയേറ്ററുകളില്‍
Current: മലയാളം
തമിഴ് സൂപ്പര്‍താരം സൂര്യയെ നായകനാക്കി ‘രോമാഞ്ചം’, ‘ആവേശം’ എന്നീ ഹിറ്റ് ചിത്രങ്ങളുടെ സംവിധായകന്‍ ജിത്തു മാധവന്‍ ഒരുക്കുന്ന പുതിയ ചിത്രം ‘സീന്‍’ കേരളത്തില്‍ തിയേറ്ററുകളിലെത്തിക്കാന്‍ ശ്രീ ഗോകുലം മൂവീസ്.
ഗോകുലം ഗോപാലന്റെ നേതൃത്വത്തിലുള്ള ശ്രീ ഗോകുലം മൂവീസാണ് ചിത്രത്തിന്റെ കേരളത്തിലെ വിതരണാവകാശം സ്വന്തമാക്കിയത്.
ഇന്‍സ്പെക്ടര്‍ ഇന്‍പരാജ് എന്ന പോലീസ് ഓഫീസറായി സൂര്യ പ്രത്യക്ഷപ്പെടുന്ന പുതിയ പോസ്റ്റര്‍ പങ്കുവെച്ചുകൊണ്ടാണ് സംവിധായകന്‍ ജിത്തു മാധവന്‍ വാര്‍ത്ത പുറത്തുവിട്ടത്.
ജിത്തു മാധവന്റെ തമിഴ് അരങ്ങേറ്റ ചിത്രം കൂടിയായ ‘സീന്‍’ വരും നവംബര്‍ ആറിന് ലോകമെമ്പാടുമുള്ള തിയേറ്ററുകളില്‍ റിലീസ് ചെയ്യും.
സൂര്യയുടെ കരിയറിലെ 47-ാമത്തെ ചിത്രമാണിത്. ജ്യോതികയും സൂര്യയും ചേര്‍ന്ന് സഹഗരം സ്റ്റുഡിയോസ്, ടു ഡി എന്റര്‍ടൈന്‍മെന്റ് എന്നിവയുടെ ബാനറിലാണ് ചിത്രം നിര്‍മിക്കുന്നത്. ജയശ്രീ ദാമോദരനാണ് സഹനിര്‍മാതാവ്.
നസ്രിയ നസീം, നസ്ലന്‍ എന്നിവര്‍ ചിത്രത്തില്‍ പ്രധാന വേഷങ്ങളിലെത്തുന്നുണ്ട്. ആനന്ദ് രാജ്, ലാല്‍, രാജ് പ്രിയന്‍ തുടങ്ങിയവരും മറ്റു കഥാപാത്രങ്ങളെ അവതരിപ്പിക്കുന്നു.
ചിത്രത്തില്‍ നസ്ലന്‍ വില്ലന്‍ വേഷത്തിലാണ് എത്തുന്നതെന്ന് റിപ്പോര്‍ട്ടുകളുണ്ടെങ്കിലും അണിയറപ്രവര്‍ത്തകര്‍ ഇത് ഔദ്യോഗികമായി സ്ഥിരീകരിച്ചിട്ടില്ല.
നേരത്തെ പുറത്തിറങ്ങിയ ടൈറ്റില്‍ ടീസറിന് വന്‍ വരവേല്‍പ്പാണ് സോഷ്യല്‍ മീഡിയയില്‍ ലഭിച്ചത്. സൂര്യയുടെ പതിവ് മാസ് ശൈലികള്‍ക്കൊപ്പം ജിത്തു മാധവന്റെ വേറിട്ട മേക്കിംഗ് രീതിയും കൂടിച്ചേരുന്ന ആക്ഷന്‍ എന്റര്‍ടെയ്നറായിരിക്കും ചിത്രം.
