‘സൈനിക നീക്കങ്ങളുമായാണ് മുന്നോട്ടു പോകുന്നതെങ്കിൽ ശക്തമായി പ്രതിരോധിക്കും’: ഇറാൻ നയതന്ത്രജ്ഞരെ പുറത്താക്കിയെന്ന അവകാശവാദം തള്ളി അബ്ബാസ് അരാഖ്ചി, അമേരിക്കയ്‌ക്കെതിരെ ആഞ്ഞടിച്ച് ഇറാൻ | Iran Rejects US

ടെഹ്റാൻ: ഐക്യരാഷ്ട്രസഭയുടെ പൊതുസഭ ഉച്ചകോടിയിൽ പങ്കെടുത്ത ഇറാനിയൻ നയതന്ത്രജ്ഞരെ അമേരിക്ക “പുറത്താക്കി” എന്ന വാദം തള്ളി ഇറാൻ വിദേശകാര്യ മന്ത്രി സയ്യിദ് അബ്ബാസ് അരാഖ്ചി. യുഎൻ ജനറൽ അസംബ്ലിയിൽ പങ്കെടുത്ത നയതന്ത്ര പ്രതിനിധികളെല്ലാം മുൻകൂട്ടി നിശ്ചയിച്ച സമയക്രമം അനുസരിച്ച് തന്നെയാണ് ന്യൂയോർക്കിൽ നിന്ന് മടങ്ങിയതെന്ന് അദ്ദേഹം എക്സിലൂടെ വ്യക്തമാക്കി.(Iran Rejects US Claims Of UN Diplomats Expulsion Calls Statement Desperate)

നേരത്തെ, യുഎൻ ഉച്ചകോടി കഴിഞ്ഞിട്ടും യുഎസിൽ തുടർന്ന ഇറാൻ പ്രതിനിധികളെ വിദേശകാര്യ മന്ത്രാലയം നിർബന്ധപൂർവ്വം പുറത്താക്കുകയായിരുന്നു എന്ന് ഒരു മുതിർന്ന യുഎസ് ഉദ്യോഗസ്ഥൻ വാർത്താ ഏജൻസിയോട് അവകാശപ്പെട്ടിരുന്നു. അമേരിക്ക ആവശ്യപ്പെട്ടിട്ടും രണ്ട് നയതന്ത്ര ഉദ്യോഗസ്ഥർ തിരികെ പോയില്ലെന്നും തുടർന്നാണ് നടപടിയെന്നുമാണ് യുഎസ് ആരോപിച്ചത്.

എന്നാൽ ഈ വാദത്തെ രൂക്ഷമായ ഭാഷയിലാണ് അരാഖ്ചി വിമർശിച്ചത്. അമേരിക്കയുടേത് പരാജയഭീതിയിൽ നിന്നുള്ള നിരാശ മാത്രമാണെന്നും യുഎൻ ആതിഥേയ രാജ്യമെന്ന നിലയിലുള്ള ഉത്തരവാദിത്തങ്ങളിൽ നിന്ന് അമേരിക്ക പിന്മാറുകയാണെന്നും അദ്ദേഹം കുറ്റപ്പെടുത്തി. വ്യാജമായി ആളെ പുറത്താക്കി എന്ന് അവകാശപ്പെടുന്നത് നയതന്ത്ര നേതൃത്വത്തിന് ചേർന്നതല്ലെന്നും അദ്ദേഹം ഓർമ്മിപ്പിച്ചു.

പശ്ചിമേഷ്യൻ സംഘർഷങ്ങൾ പരിഹരിക്കാൻ സൈനിക മാർഗ്ഗങ്ങളല്ല, നീതിയുക്തമായ ചർച്ചകളാണ് ആവശ്യമെന്നും സൈനിക നീക്കങ്ങളുമായാണ് അമേരിക്ക മുന്നോട്ടുപോകുന്നതെങ്കിൽ മുൻപത്തേക്കാൾ ശക്തമായി പ്രതിരോധിക്കുമെന്നും അരാഖ്ചി നേരത്തെ മുന്നറിയിപ്പ് നൽകിയിരുന്നു. ഹോർമുസ് കടലിടുക്ക് തുറക്കുന്നതുമായി ബന്ധപ്പെട്ട ചർച്ചകൾ സ്തംഭനാവസ്ഥയിൽ നിൽക്കെ ഇരുരാജ്യങ്ങളും തമ്മിലുള്ള വാക്കേറ്റം അന്താരാഷ്ട്ര തലത്തിൽ പുതിയ നയതന്ത്ര പ്രതിസന്ധിക്ക് വഴിതുറന്നിരിക്കുകയാണ്.

Story Summary

Iranian Foreign Minister Abbas Araghchi rejected US claims that Iranian UN diplomats were “kicked out” of New York, stating that all representatives departed strictly as scheduled. Araghchi criticized the US statement as an act of desperation and a violation of host nation obligations, amid escalating diplomatic tensions over the Middle East conflict and the closure of the Strait of Hormuz.