മലയാള സിനിമയിൽ 15 വർഷം പിന്നിടുന്ന അജു വർഗീസ് തന്റെ കരിയറിലെ ഏറ്റവും ശ്രദ്ധേയമായ ഒരു വേഷപ്പകർച്ചയുമായി എത്തുന്നു. ആദിത്യൻ ചന്ദ്രശേഖർ സംവിധാനം ചെയ്യുന്ന ‘പ്ലൂട്ടോ’ എന്ന സയൻസ് ഫിക്ഷൻ കോമഡി ചിത്രത്തിലെ അജുവിന്റെ ലുക്കാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. താരത്തിന്റെ പിറന്നാളിനോട് അനുബന്ധിച്ച് പുറത്തുവിട്ട ബിഹൈൻഡ് ദി സീൻസ് വീഡിയോയിലെ ‘ടൈഗർ തമ്പി’ എന്ന മാസ് വില്ലൻ ലുക്ക് കണ്ട്, ഇത് പഴയ വാസു അണ്ണന്റെ രണ്ടാം പതിപ്പാണോ എന്നാണ് ആരാധകർ ചോദിക്കുന്നത്. ‘സർവ്വം മായ’ എന്ന ചിത്രത്തിന്റെ വിജയത്തിന് പിന്നാലെ എത്തുന്ന ഈ പുത്തൻ ഗെറ്റപ്പ് അജുവിന്റെ കരിയറിലെ മറ്റൊരു വഴിത്തിരിവാകുമെന്നാണ് കരുതപ്പെടുന്നത്.
Also Read: കൊതി തീർന്നില്ല, അത്രമേൽ ഇഷ്ടപ്പെട്ട സെറ്റ്; ‘സർവ്വം മായ’യെക്കുറിച്ച് പ്രിയ വാര്യർ
നീരജ് മാധവും അൽത്താഫ് സലീമും പ്രധാന വേഷങ്ങളിൽ എത്തുന്ന ‘പ്ലൂട്ടോ’ ഒരു കംപ്ലീറ്റ് ഫൺ എന്റർടൈനർ ആയിരിക്കുമെന്ന സൂചനയാണ് പുറത്തുവന്ന പോസ്റ്ററുകൾ നൽകുന്നത്. ‘എങ്കിലും ചന്ദ്രികേ’ എന്ന സിനിമയ്ക്ക് ശേഷം ആദിത്യൻ ചന്ദ്രശേഖർ സംവിധാനം ചെയ്യുന്ന രണ്ടാമത്തെ ചിത്രമാണിത്. ഒരു സയൻസ് ഫിക്ഷൻ പശ്ചാത്തലത്തിൽ കോമഡിക്ക് പ്രാധാന്യം നൽകി ഒരുക്കുന്ന ഈ ചിത്രം പ്രേക്ഷകർക്ക് പുതുമയുള്ള ഒരു സിനിമാ അനുഭവം നൽകുമെന്ന് ഉറപ്പാണ്. ഓർക്കിഡ് ഫിലിംസ് ഇന്റർനാഷണലിന്റെ ബാനറിൽ രെജു കുമാർ, രശ്മി രെജു എന്നിവർ ചേർന്നാണ് ചിത്രം നിർമ്മിക്കുന്നത്.
അജു വർഗീസിനൊപ്പം വലിയൊരു താരനിര തന്നെ ഈ ചിത്രത്തിൽ അണിനിരക്കുന്നുണ്ട്. ആർഷാ ബൈജു, ദിനേശ് പ്രഭാകർ, വിനീത് തട്ടിൽ, സുബിൻ ടാർസൻ, നിഹാൽ, സഹീർ മുഹമ്മദ്, തുഷാര പിള്ള, സച്ചിൻ ജോസഫ്, നിമ്ന ഫത്തൂമി എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. കോമഡി വേഷങ്ങളിൽ നിന്ന് ക്യാരക്ടർ റോളുകളിലേക്കും ഇപ്പോൾ ഒരു മാസ് വില്ലൻ ലുക്കിലേക്കും മാറിയ അജുവിന്റെ ഈ പരീക്ഷണത്തെ ആവേശത്തോടെയാണ് സിനിമാ പ്രേമികൾ നോക്കിക്കാണുന്നത്.
The post ടൈഗർ തമ്പിയായി അജു വർഗീസ്; ‘വാസു അണ്ണൻ 2.0’ എന്ന് ആരാധകർ! ‘പ്ലൂട്ടോ’ ലുക്ക് വൈറൽ appeared first on Express Kerala.
