‘മൂന്ന് വർഷമായി സിംഗിളായിരുന്നത് ശരിയല്ലെന്ന് പറഞ്ഞ് സുഹൃത്ത് ഡേറ്റിംഗ് ആപ്പ് പരിചയപ്പെടുത്തി’; അനുഭവം തുറന്നുപറഞ്ഞ് പാർവതി

പാർവതി തിരുവോത്ത് അടുത്തിടെ നൽകിയ അഭിമുഖത്തിൽ പങ്കുവെച്ച തന്റെ ഡേറ്റിംഗ് വിശേഷങ്ങൾ സോഷ്യൽ മീഡിയയിൽ ഏറെ ചർച്ചയാകുകയാണ്. 2021-ലെ ഒരു ബ്രേക്ക് അപ്പിന് ശേഷം ഏകദേശം മൂന്ന് വർഷത്തോളം സിംഗിൾ ആയിരുന്ന താൻ, തന്റെ സുഹൃത്തിന്റെ നിർബന്ധത്തിന് വഴങ്ങിയാണ് ഡേറ്റിംഗ് ആപ്പുകൾ ഉപയോഗിച്ചു തുടങ്ങിയതെന്ന് താരം വെളിപ്പെടുത്തി. ബമ്പിൾ, റായ , ഫീൽഡ് തുടങ്ങിയ ആപ്പുകൾ പരീക്ഷിച്ചതിൽ തനിക്ക് ഏറ്റവും സത്യസന്ധമായി തോന്നിയത് ‘ഫീൽഡ്’ ആണെന്നും പാർവതി പറയുന്നു.

ലോസ് ഏഞ്ചൽസിൽ ഒരു ജോലിയുടെ ആവശ്യത്തിനായി പോയപ്പോഴാണ് പാർവതി ഡേറ്റിംഗ് ആപ്പ് വഴി ഒരാളെ പരിചയപ്പെടുന്നത്. സാധാരണ ഡേറ്റിംഗ് ആപ്പുകളിൽ ദിവസങ്ങളോളം ചാറ്റ് ചെയ്യുന്ന രീതിയിൽ നിന്നും വ്യത്യസ്തമായി, സമയം കളയാതെ നേരിട്ട് കാണാനാണ് താരം താൽപ്പര്യപ്പെട്ടത്. താൻ മൂന്ന് ദിവസത്തിനുള്ളിൽ മടങ്ങുമെന്നും അതിനാൽ കോഫി കുടിക്കാൻ വരുന്നുണ്ടോയെന്നും നേരിട്ട് ചോദിച്ച പാർവതിയുടെ രീതി ആ വ്യക്തിക്കും കൗതുകകരമായി തോന്നി. ഒരു സിനിമാതാരമാണെന്ന മുൻധാരണകളില്ലാതെ തന്നെ ഒരു സാധാരണ വ്യക്തിയായി കാണാൻ ആ സാഹചര്യത്തിൽ പാർവതിക്ക് കഴിഞ്ഞു.

Also Read: കൗമാര പ്രണയത്തിന്റെ ഓർമ്മകളുമായി ‘ഒരു വയനാടൻ പ്രണയകഥ’; ജനുവരി 16-ന് തിയേറ്ററുകളിലേക്ക്

ഒരു നിക്കരാഗ്വൻ അമേരിക്കക്കാരനും സ്റ്റാൻഡ് അപ്പ് കൊമേഡിയനും എഞ്ചിനീയറുമായ വ്യക്തിയെയാണ് പാർവതി അന്ന് കാണാൻ പോയത്. സുരക്ഷ കണക്കിലെടുത്ത് സിനിമ കാണാനാണ് താരം തീരുമാനിച്ചത്. ‘കൈൻഡ്‌സ് ഓഫ് കൈൻഡ്‌നെസ്’ എന്ന ചിത്രം കാണാൻ ഇരുവരും പോയി. ആദ്യ കാഴ്ചയിൽ തന്നെ വളരെ മാന്യമായി പെരുമാറിയ അദ്ദേഹത്തോടൊപ്പം എട്ട് മണിക്കൂറോളം ചെലവഴിച്ചുവെന്നും, ജീവിതത്തിൽ ആദ്യമായാണ് ഒരാൾ തന്നെ ഒരു ഡേറ്റിന് കൊണ്ടുപോകുന്നതെന്നും പാർവതി ഓർക്കുന്നു. തന്റെ സ്വാഭാവികമായ രൂപത്തിലും ഭാവത്തിലും അദ്ദേഹത്തെ അഭിമുഖീകരിച്ചത് വലിയ ആത്മവിശ്വാസം നൽകിയെന്നും അവർ കൂട്ടിച്ചേർത്തു.

സിനിമയിലേക്ക് വരുമ്പോൾ, ‘ഉള്ളൊഴുക്ക്’ എന്ന ചിത്രത്തിന് ശേഷം ശ്രദ്ധേയമായ പ്രോജക്റ്റുകളാണ് പാർവതിയുടേതായി അണിയറയിൽ ഒരുങ്ങുന്നത്. കരിയറിലെ ആദ്യ പോലീസ് വേഷത്തിലെത്തുന്ന ‘പ്രഥമ ദൃഷ്‌ട്യാ കുറ്റക്കാർ’ എന്ന ചിത്രത്തിനായി ആരാധകർ കാത്തിരിക്കുകയാണ്. ഷഹദ് സംവിധാനം ചെയ്യുന്ന ഈ ചിത്രത്തിൽ വിജയരാഘവൻ, മാത്യു തോമസ്, സിദ്ധാർഥ് ഭരതൻ തുടങ്ങിയ വലിയ താരനിര തന്നെ അണിനിരക്കുന്നുണ്ട്. കൂടാതെ പൃഥ്വിരാജ് നായകനാകുന്ന ‘ഐ നോബഡി’ എന്ന ചിത്രത്തിലും പാർവതി പ്രധാന വേഷത്തിൽ എത്തുന്നു.

The post ‘മൂന്ന് വർഷമായി സിംഗിളായിരുന്നത് ശരിയല്ലെന്ന് പറഞ്ഞ് സുഹൃത്ത് ഡേറ്റിംഗ് ആപ്പ് പരിചയപ്പെടുത്തി’; അനുഭവം തുറന്നുപറഞ്ഞ് പാർവതി appeared first on Express Kerala.