സ്വകാര്യ കപ്പല്‍ശാല നിര്‍മ്മിച്ച ഇന്ത്യയുടെ ആദ്യ മള്‍ട്ടി-പര്‍പ്പസ് യുദ്ധക്കപ്പലായ ‘ഐ.എന്‍.എസ് സമര്‍ഥക്’ കര്‍ണാടകയിലെ കാര്‍വാര്‍ നാവിക താവളത്തില്‍ വെച്ച് ഇന്ത്യന്‍ നാവികസേനയുടെ ഭാഗമായി കമ്മീഷന്‍ ചെയ്തു: തദ്ദേശീയ കപ്പല്‍ നിര്‍മ്മാണ രംഗത്തും പ്രതിരോധ മേഖലയിലെ സ്വയംപര്യാപ്തതയിലും ചരിത്രപരമായ മുന്നേറ്റം കൈവരിച്ച് രാജ്യം
Current: മലയാളം
കാര്‍വാര്‍: സ്വകാര്യ കപ്പല്‍ശാല നിര്‍മ്മിച്ച ഇന്ത്യയുടെ ആദ്യ മള്‍ട്ടി-പര്‍പ്പസ് യുദ്ധക്കപ്പലായ ‘ഐ.എന്‍.എസ് സമര്‍ഥക്’ ഇന്ത്യന്‍ നാവികസേനയുടെ ഭാഗമായി.
കര്‍ണാടകയിലെ കാര്‍വാര്‍ നാവിക താവളത്തില്‍ നടന്ന പ്രൗഢഗംഭീരമായ ചടങ്ങില്‍ ഉപരാഷ്ട്രപതി സി. പി. രാധാകൃഷ്ണന്റെ സാന്നിധ്യത്തിലാണ് കപ്പല്‍ ഔദ്യോഗികമായി നാവികസേനയിലേക്ക് കമ്മീഷന്‍ ചെയ്തത്.
നാവികസേനാ മേധാവി അഡ്മിറല്‍ കൃഷ്ണ സ്വാമിനാഥന്‍, കര്‍ണാടക തൊഴില്‍ മന്ത്രി സന്തോഷ് ലാഡ് എന്നിവരും ചടങ്ങില്‍ പങ്കെടുത്തു.
കേന്ദ്ര സര്‍ക്കാരിന്റെ ‘മേക്ക് ഇന്‍ ഇന്ത്യ’ പദ്ധതിയുടെ ഭാഗമായി തമിഴ്നാട്ടിലെ കട്ടുപ്പള്ളി കപ്പല്‍ശാലയില്‍ ലാര്‍സന്‍ ആന്‍ഡ് ടൂബ്രോ ആണ് കപ്പല്‍ നിര്‍മ്മിച്ചത്. 75 ശതമാനത്തിലധികം തദ്ദേശീയ സാങ്കേതികവിദ്യയും സാമഗ്രികളും ഉപയോഗിച്ചാണ് ഇതിന്റെ നിര്‍മ്മാണം പൂര്‍ത്തിയാക്കിയത്.
ആത്മനിര്‍ഭര്‍ ഭാരത് ലക്ഷ്യങ്ങളിലേക്ക് ഇന്ത്യ കൈവരിച്ച ഏറ്റവും നിര്‍ണ്ണായകമായ നാഴികക്കല്ലാണിതെന്ന് നാവികസേനാ മേധാവി അഡ്മിറല്‍ കൃഷ്ണ സ്വാമിനാഥന്‍ പറഞ്ഞു. രാജ്യത്തെ ഒരു സ്വകാര്യ കപ്പല്‍ശാല നിര്‍മ്മിച്ച് നാവികസേനയുടെ ഭാഗമാകുന്ന ആദ്യത്തെ പ്രമുഖ യുദ്ധക്കപ്പലാണ് ഐ.എന്‍.എസ് സമര്‍ഥക്.
സമുദ്ര സുരക്ഷയ്ക്കും തന്ത്രപ്രധാനമായ സൈനിക നീക്കങ്ങള്‍ക്കും കരുത്തേകുന്നതിന് പുറമെ, ദുരന്ത നിവാരണം, മാനുഷിക സഹായ ദൗത്യങ്ങള്‍, അടിയന്തര രക്ഷാപ്രവര്‍ത്തനങ്ങള്‍ എന്നിവയ്ക്കും കപ്പല്‍ ഉപയോഗിക്കാനാകും.
അത്യാധുനിക ആയുധ സജ്ജീകരണങ്ങളും അത്യാഹിത ഘട്ടങ്ങളില്‍ ആശുപത്രി കപ്പലായി മാറ്റാന്‍ കഴിയുന്ന അത്യാധുനിക മെഡിക്കല്‍ സൗകര്യങ്ങളും കപ്പലില്‍ സജ്ജീകരിച്ചിട്ടുണ്ട്. ആന സമുദ്രത്തിരമാലകളില്‍ നിന്ന് ഉയര്‍ന്നുവരുന്ന ചിത്രമാണ് കപ്പലിന്റെ ഔദ്യോഗിക മുദ്രയായി സ്വീകരിച്ചിരിക്കുന്നത്.
