കെഎസ്ആർടിസി ബസില്ല; ശബരിമല തീർഥാടകർക്ക് പൊലീസ് ബസിൽ യാത്രാസൗകര്യമൊരുക്കി എസ്പി | Sabarimala pilgrims police bus service

ശബരിമല തീർഥാടനത്തിനായി എത്തിയവർക്ക് കെഎസ്ആർടിസി ബസുകൾ കുറവായതോടെ പൊലീസ് ബസിൽ യാത്രാസൗകര്യമൊരുക്കി എസ്പി ആർ. ആനന്ദ്. ഞായറാഴ്ച വൈകിട്ടാണ് സംഭവം. പമ്പ–ചാലക്കയം റോഡിലെ നിർമാണപ്രവൃത്തികൾ കാരണം നിലയ്ക്കൽ–പമ്പ റൂട്ടിലെ കെഎസ്ആർടിസി സർവീസുകൾക്ക് ആവശ്യത്തിന് ബസുകൾ ലഭിക്കാത്തതാണ് പ്രതിസന്ധിക്ക് കാരണമായത്. (Sabarimala pilgrims police bus service)

തീർഥാടകരുടെ യാത്രാക്ലേശം പരിഹരിക്കാൻ എസ്പി ഇടപെട്ട് പൊലീസ് ബസ് ഏർപ്പെടുത്തുകയായിരുന്നു. കൂടുതൽ ബസുകൾ സർവീസിന് എത്തിക്കണമെന്ന് പൊലീസ് കെഎസ്ആർടിസിയോട് ആവശ്യപ്പെട്ടിട്ടുണ്ട്. അധിക ബസുകൾ അനുവദിക്കുന്നതിനുള്ള നടപടി സ്വീകരിക്കുമെന്ന് കെഎസ്ആർടിസിയും അറിയിച്ചിട്ടുണ്ട്. അതേസമയം, ശബരിമല പാതയിലെ ഗതാഗതക്കുരുക്ക് രൂക്ഷമായതിനെ തുടർന്ന് പമ്പ–ചാലക്കയം റോഡിലെ നിർമാണപ്രവൃത്തികൾ താത്കാലികമായി നിർത്തിവെച്ചു. മാസപൂജയ്ക്കായി തീർഥാടകർ കൂടുതലായി എത്തുന്ന സാഹചര്യത്തിൽ ഗതാഗതം കൂടുതൽ സങ്കീർണമാകാൻ സാധ്യതയുണ്ടെന്ന് പൊലീസ് മുന്നറിയിപ്പ് നൽകിയിരുന്നു.

സാമ്പത്തിക ബാധ്യതയെ തുടർന്ന് ദേവസ്വം ബോർഡിൽനിന്ന് പൊതുമരാമത്ത് വകുപ്പ് ഏറ്റെടുത്ത റോഡിൽ അറ്റകുറ്റപ്പണികൾ വൈകിയിരുന്നു. കഴിഞ്ഞ ദിവസമാണ് നിർമാണപ്രവൃത്തികൾ ആരംഭിച്ചത്.

Summary: SP R. Anand arranged a police bus for Sabarimala pilgrims after a shortage of KSRTC buses disrupted services between Nilakkal and Pamba. Road construction on the Pamba–Chalakkayam route has worsened traffic congestion, prompting authorities to temporarily suspend the work.