വിവിധ ആവശ്യങ്ങൾ ഉന്നയിച്ച് സംസ്ഥാന സർക്കാരിനെതിരേ ശക്തമായ പ്രതിഷേധത്തിനൊരുങ്ങി മലയാള സിനിമാ സംഘടനകൾ. ഇതിന്റെ ഭാഗമായി ഈ മാസം 21-ന് സൂചന സമരം നടത്താൻ ചലച്ചിത്ര സംഘടനകളുടെ സംയുക്ത യോഗം തീരുമാനിച്ചു. അന്നേ ദിവസം സിനിമകളുടെ ചിത്രീകരണം പൂർണ്ണമായും നിർത്തിവെക്കുന്നതിനോടൊപ്പം സംസ്ഥാനത്തെ തിയേറ്ററുകൾ അടച്ചിടാനും തീരുമാനിച്ചിട്ടുണ്ട്. ഇതോടെ ചലച്ചിത്ര മേഖല അന്ന് പൂർണ്ണമായും സ്തംഭിക്കും.
ജിഎസ്ടി നിലവിൽ വന്നിട്ടും സിനിമകൾക്ക് മേൽ തദ്ദേശ സ്വയംഭരണ സ്ഥാപനങ്ങൾ ചുമത്തുന്ന വിനോദ നികുതി ഒഴിവാക്കണമെന്നതാണ് സംഘടനകളുടെ പ്രധാന ആവശ്യം. ജിഎസ്ടിക്ക് പുറമെ ഈ നികുതി കൂടി നൽകേണ്ടി വരുന്നത് പ്രായോഗികമായി ഇരട്ട നികുതിയാണെന്നും ഇത് സിനിമാ മേഖലയ്ക്ക് താങ്ങാനാവാത്ത സാമ്പത്തിക ബാധ്യത ഉണ്ടാക്കുന്നുവെന്നും ഭാരവാഹികൾ ചൂണ്ടിക്കാട്ടുന്നു. തങ്ങളുടെ പരാതികൾ കേൾക്കാൻ സർക്കാർ തയ്യാറാകുന്നില്ലെന്ന വിമർശനവും സംഘടനകൾ ഉന്നയിക്കുന്നുണ്ട്.
Also Read: തമിഴ് ജനതയുടെ ശബ്ദം അടിച്ചമർത്താനാവില്ല’; ‘ജനനായകൻ’ വിവാദത്തിൽ രാഹുൽ ഗാന്ധി
സർക്കാർ അടുത്തിടെ സംഘടിപ്പിച്ച സിനിമാ കോൺക്ലേവ് വെറും കണ്ണിൽ പൊടിയിടൽ മാത്രമാണെന്നും സിനിമ നേരിടുന്ന യഥാർത്ഥ പ്രതിസന്ധികൾക്ക് പരിഹാരം കാണാൻ അധികൃതർ ശ്രമിക്കുന്നില്ലെന്നും സംഘടനകൾ കുറ്റപ്പെടുത്തി. 21-ലെ സൂചന പണിമുടക്കിന് ശേഷവും തങ്ങളുടെ ആവശ്യങ്ങളിൽ അനുകൂലമായ തീരുമാനം ഉണ്ടായില്ലെങ്കിൽ അനിശ്ചിതകാല സമരം ഉൾപ്പെടെയുള്ള കടുത്ത നടപടികളിലേക്ക് നീങ്ങുമെന്നും സിനിമാ സംഘടനകൾ മുന്നറിയിപ്പ് നൽകി.
The post 21ന് സിനിമാ പണിമുടക്ക്! തിയേറ്ററുകൾ അടച്ചിടും, ഷൂട്ടിംഗ് തടസ്സപ്പെടും; സർക്കാരിനെതിരെ സിനിമാ സംഘടനകൾ appeared first on Express Kerala.
