ലോകബാങ്ക് റിപ്പോർട്ട്: ഇന്ത്യയിൽ അതിദാരിദ്ര്യ നിരക്കിൽ ചരിത്രപരമായ കുറവ്; 12 വർഷത്തിനിടെ 49.6 കോടി ജനങ്ങൾ ദാരിദ്ര്യമുക്തരായി, നിരക്ക് 27.1 ശതമാനത്തിൽ നിന്ന് 2.6 ശതമാനമായി താഴേക്ക്
Current: മലയാളം
വാഷിംഗ്ടണ്‍: ഇന്ത്യയില്‍ ദാരിദ്ര്യ നിര്‍മ്മാര്‍ജ്ജനത്തില്‍ വന്‍ മുന്നേറ്റമെന്ന് ലോകബാങ്കിന്റെ വിലയിരുത്തല്‍. 2011-നും 2023-നും ഇടയിലുള്ള കാലയളവില്‍ ഇന്ത്യയിലെ അതിദാരിദ്ര്യ നിരക്ക് 27.1 ശതമാനത്തില്‍ നിന്ന് 2.6 ശതമാനമായി കുത്തനെ കുറഞ്ഞതായി ലോകബാങ്കിന്റെ ഒക്ടോബര്‍ 2026 ‘പോവര്‍ട്ടി ആന്‍ഡ് ഇക്വിറ്റി ബ്രീഫ്’ വ്യക്തമാക്കുന്നു.
ഈ കാലയളവില്‍ ഏകദേശം 49.6 കോടി (496 മില്യണ്‍) ആളുകളെ ഇന്ത്യ ദാരിദ്ര്യത്തില്‍ നിന്ന് കരകയറ്റിയെന്നും ഇത് ലോകത്തിലെ തന്നെ ഏറ്റവും വേഗത്തിലുള്ള ദാരിദ്ര്യ ലഘൂകരണ പ്രക്രിയകളില്‍ ഒന്നാണെന്നും റിപ്പോര്‍ട്ട് ചൂണ്ടിക്കാണിക്കുന്നു.
പ്രതിദിനം 4.20 യു.എസ് ഡോളര്‍ (2021 പി.പി.പി) വരുമാന പരിധിയുള്ള താഴ്ന്ന ഇടത്തരം വരുമാന വിഭാഗത്തിലെ ദാരിദ്ര്യ നിരക്ക് 2011-ലെ 57.7 ശതമാനത്തില്‍ നിന്ന് 2023-ല്‍ 16.1 ശതമാനമായി കുറഞ്ഞു.
ശക്തമായ ഉപഭോഗ വളര്‍ച്ച, തൊഴിലവസരങ്ങളുടെ വര്‍ദ്ധനവ് (പ്രത്യേകിച്ച് ഗ്രാമീണ മേഖലയിലെ സ്ത്രീകളുടെ പങ്കാളിത്തം), ഭക്ഷ്യ സബ്സിഡികള്‍ ഉള്‍പ്പെടെയുള്ള സാമൂഹിക ക്ഷേമ പദ്ധതികള്‍ എന്നിവയാണ് ഈ നേട്ടത്തിന് പ്രധാന കാരണമായി ലോകബാങ്ക് ചൂണ്ടിക്കാണിക്കുന്നത്.
പോഷകാഹാരം, ശുചിത്വം, വിദ്യാഭ്യാസം തുടങ്ങിയ ഘടകങ്ങള്‍ ഉള്‍പ്പെടുന്ന ബഹുമുഖ ദാരിദ്ര്യ സൂചികയിലും ഇന്ത്യ മികച്ച പുരോഗതി കൈവരിച്ചു.
എങ്കിലും ഉത്തര്‍പ്രദേശ് മുതല്‍ പശ്ചിമ ബംഗാള്‍ വരെയുള്ള മേഖലകളില്‍ ദാരിദ്ര്യ സാന്ദ്രത ഇന്നും കൂടുതലാണെന്നും, യുവാക്കളുടെ തൊഴിലില്ലായ്മ പരിഹരിക്കാന്‍ കൂടുതല്‍ നടപടികള്‍ ആവശ്യമാണെന്നും റിപ്പോര്‍ട്ടില്‍ പറയുന്നു.
