ലോകത്തെ ഏറ്റവും ശക്തമായ പാസ്പോർട്ടുകളുടെ 2026-ലെ ഹെൻലി പാസ്പോർട്ട് ഇൻഡക്സിൽ യുഎഇ അഞ്ചാം സ്ഥാനം സ്വന്തമാക്കി ചരിത്രം കുറിച്ചു. കഴിഞ്ഞ രണ്ട് പതിറ്റാണ്ടിനിടെ ലോകത്ത് മറ്റൊരു രാജ്യത്തിനുമില്ലാത്ത വിധം വലിയൊരു മുന്നേറ്റമാണ് യുഎഇ കാഴ്ചവെച്ചത്. 2006 മുതലുള്ള കണക്കുകൾ പരിശോധിക്കുമ്പോൾ 149 രാജ്യങ്ങളിലേക്ക് കൂടി പുതുതായി വിസ രഹിത പ്രവേശനം നേടിയെടുക്കാൻ യുഎഇക്ക് സാധിച്ചു. നിലവിൽ യുഎഇ പാസ്പോർട്ട് കൈവശമുള്ളവർക്ക് മുൻകൂട്ടി വിസ എടുക്കാതെ തന്നെ ലോകത്തെ 184 കേന്ദ്രങ്ങളിലേക്ക് യാത്ര ചെയ്യാമെന്നത് രാജ്യത്തിന്റെ നയതന്ത്ര വിജയത്തിന്റെ തെളിവാണ്.
ആഗോളതലത്തിൽ സിംഗപ്പൂർ തന്നെയാണ് പട്ടികയിൽ ഒന്നാം സ്ഥാനത്ത് തുടരുന്നത്. സിംഗപ്പൂർ പാസ്പോർട്ട് ഉടമകൾക്ക് 192 രാജ്യങ്ങളിലേക്ക് വിസയില്ലാതെ പ്രവേശനം ലഭിക്കുമ്പോൾ ജപ്പാനും ദക്ഷിണ കൊറിയയും രണ്ടാം സ്ഥാനം പങ്കിടുന്നു. ഡെന്മാർക്ക്, ലക്സംബർഗ്, സ്പെയിൻ തുടങ്ങിയ യൂറോപ്യൻ രാജ്യങ്ങൾ മൂന്നാം സ്ഥാനത്താണ്. ന്യൂസീലൻഡ് ആറാം സ്ഥാനത്തും ഓസ്ട്രേലിയയും ബ്രിട്ടനും ഏഴാം സ്ഥാനത്തുമാണ് ഇടംപിടിച്ചത്. ഇടക്കാലത്ത് പിന്നിലേക്ക് പോയ അമേരിക്ക ഇത്തവണ പത്താം സ്ഥാനത്തേക്ക് തിരിച്ചെത്തിയിട്ടുണ്ട് എന്നതും ശ്രദ്ധേയമാണ്.
Also Read: ജോലിഭാരം കുറയ്ക്കണം, നഴ്സുമാരുടെ ക്ഷാമം പരിഹരിക്കണം; ന്യൂയോർക്കിൽ നഴ്സുമാർ തെരുവിൽ
അതേസമയം, ആഗോളതലത്തിൽ യാത്രാ സ്വാതന്ത്ര്യത്തിന്റെ കാര്യത്തിൽ വലിയ അസമത്വം നിലനിൽക്കുന്നതായി റിപ്പോർട്ട് വ്യക്തമാക്കുന്നു. പട്ടികയിൽ ഏറ്റവും പിന്നിലുള്ള അഫ്ഗാനിസ്ഥാൻ പാസ്പോർട്ട് ഉപയോഗിച്ച് കേവലം 24 രാജ്യങ്ങളിലേക്ക് മാത്രമേ വിസയില്ലാതെ യാത്ര ചെയ്യാനാകൂ. സാമ്പത്തികമായും രാഷ്ട്രീയമായും സുസ്ഥിരതയുള്ള രാജ്യങ്ങൾ പാസ്പോർട്ട് കരുത്തിൽ ഏറെ മുന്നേറുമ്പോൾ, വെല്ലുവിളികൾ നേരിടുന്ന രാജ്യങ്ങൾ പട്ടികയിൽ പിന്നിലേക്ക് പോകുന്ന കാഴ്ചയാണ് 2026-ലും പ്രകടമാകുന്നത്. കരുത്തുറ്റ നയതന്ത്ര ബന്ധങ്ങളും വീസ ഉദാരവൽക്കരണ നയങ്ങളുമാണ് യുഎഇയെ ഈ ആഗോള നേട്ടത്തിലേക്ക് നയിച്ചത്.
The post അറബ് ലോകത്തിന്റെ അഭിമാനം! ലോകശക്തികളെ പിന്നിലാക്കി യുഎഇ പാസ്പോർട്ട്; ഇനി വിസയില്ലാതെ 184 രാജ്യങ്ങളിലേക്ക് പറക്കാം appeared first on Express Kerala.
