ഉത്തർപ്രദേശിൽ ട്രാക്ടർ ട്രോളി അപകടം; അഞ്ച് പേർ മരിച്ചു, നിരവധി പേർക്ക് പരിക്ക് | Sitapur road accident

ലഖ്‌നൗ: ഉത്തർപ്രദേശിലെ സീതാപുരിൽ ട്രാക്ടർ ട്രോളി മറിഞ്ഞുണ്ടായ അപകടത്തിൽ അഞ്ച് പേർ മരിച്ചു. നിരവധി പേർക്ക് പരിക്കേറ്റു. ശനിയാഴ്ചയാണ് അപകടമുണ്ടായതെന്ന് മുതിർന്ന പൊലീസ് ഉദ്യോഗസ്ഥൻ അറിയിച്ചു. പരിക്കേറ്റവരെ ഉടൻ തന്നെ സമീപത്തെ ആശുപത്രിയിൽ പ്രവേശിപ്പിച്ചു. ഇവർ ചികിത്സയിൽ തുടരുകയാണ് (Sitapur road accident). അമിതവേഗമാണ് അപകടത്തിന് പ്രാഥമിക കാരണമെന്നാണ് വിലയിരുത്തലെന്ന് ലഖ്‌നൗ റേഞ്ച് ഐജി കിരൺ എസ്. പറഞ്ഞു. യാത്രക്കാരെ കയറ്റാൻ അനുമതിയില്ലാത്ത വാണിജ്യ-കാർഷിക വാഹനത്തിലാണ് ആളുകളെ കൊണ്ടുപോയിരുന്നതെന്നും അദ്ദേഹം ചൂണ്ടിക്കാട്ടി. അപകടത്തെക്കുറിച്ച് വിശദമായ അന്വേഷണം ആരംഭിച്ചിട്ടുണ്ട്.

ട്രാക്ടർ ട്രോളികളിൽ അനധികൃതമായി യാത്രക്കാരെ കൊണ്ടുപോകുന്നത് തടയാൻ ഗതാഗത വകുപ്പും പൊലീസും ഏകോപിച്ച് പ്രവർത്തിക്കണമെന്ന് ഐജി നിർദേശിച്ചു. മോട്ടോർ വാഹന നിയമവും ഗതാഗത ചട്ടങ്ങളും അനുസരിച്ചുമാത്രമേ വാഹനങ്ങൾ നിരത്തിലിറക്കാവൂ. ഇത്തരം അപകടങ്ങൾ ആവർത്തിക്കാതിരിക്കാൻ കർശന നടപടികൾ സ്വീകരിക്കുമെന്നും അദ്ദേഹം വ്യക്തമാക്കി.

Summary: Five people were killed and several others injured in a tractor-trolley accident in Uttar Pradesh’s Sitapur district. Police suspect overspeeding and the unauthorised transportation of passengers in an agricultural vehicle as possible causes.