‘സൂദു കവ്വും’ എന്ന ഹിറ്റ് ചിത്രത്തിന് ശേഷം നളൻ കുമാരസ്വാമി സംവിധാനം ചെയ്ത ‘വാ വാത്തിയാർ’ തിയേറ്ററുകളിൽ മികച്ച പ്രതികരണങ്ങളോടെ പ്രദർശനം ആരംഭിച്ചു. നീണ്ട കാത്തിരിപ്പിനൊടുവിൽ ഇന്ന് റിലീസ് ചെയ്ത ചിത്രത്തിന്റെ ആദ്യ ഷോകൾ കഴിയുമ്പോൾ കാർത്തിയുടെ തകർപ്പൻ പ്രകടനത്തെയും നളൻ കുമാരസ്വാമിയുടെ തനിമയാർന്ന മേക്കിംഗിനെയും പ്രശംസിച്ച് നിരവധിപ്പേർ രംഗത്തെത്തി. ഒരു സൂപ്പർഹീറോ ആക്ഷൻ ശൈലിയിൽ ഒരുക്കിയിരിക്കുന്ന ചിത്രത്തിന്റെ ഇന്റർവെൽ ബ്ലോക്ക് ഗംഭീരമാണെന്നാണ് സിനിമാ പ്രേമികളുടെ വിലയിരുത്തൽ.
ഇത്തവണത്തെ പൊങ്കൽ വിജയം കാർത്തി സ്വന്തമാക്കിയെന്നാണ് സോഷ്യൽ മീഡിയയിലെ പൊതുവായ അഭിപ്രായം. കൃതി ഷെട്ടി നായികയായി എത്തുന്ന ചിത്രത്തിൽ സത്യരാജ് വില്ലൻ വേഷത്തിൽ തിളങ്ങുന്നു. നടൻ രാജ് കിരണും മറ്റൊരു പ്രധാന വേഷത്തിൽ എത്തുന്നുണ്ട്. തമാശയും ആക്ഷനും ഒരുപോലെ സമ്മേളിക്കുന്ന ഈ ചിത്രം കുടുംബപ്രേക്ഷകരെ തിയേറ്ററുകളിലേക്ക് ആകർഷിക്കുമെന്നും പൊങ്കൽ സീസണിലെ മികച്ച ഹിറ്റായി മാറുമെന്നുമാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.
Also Read: ഇന്ത്യയിൽ ഏറ്റവുമധികം ടിക്കറ്റുകൾ വിറ്റ ചിത്രങ്ങളുടെ പട്ടിക പുറത്ത്
കാതലും കടന്തുപോവും എന്ന ചിത്രത്തിന് ശേഷം എട്ട് വർഷത്തെ ഇടവേള കഴിഞ്ഞാണ് നളൻ കുമാരസ്വാമി ‘വാ വാത്തിയാർ’ എന്ന ചിത്രത്തിലൂടെ മടങ്ങിയെത്തുന്നത്. നേരത്തെ ഡിസംബർ 26-ന് റിലീസ് നിശ്ചയിച്ചിരുന്നെങ്കിലും ചില കാരണങ്ങളാൽ മാറ്റിവെക്കുകയായിരുന്നു. കടുത്ത എം.ജി.ആർ ആരാധകനായ ഒരു കഥാപാത്രമായാണ് കാർത്തി ഈ ചിത്രത്തിൽ എത്തുന്നത്. തമിഴ് ജനത എം.ജി.ആറിനെ സ്നേഹപൂർവ്വം വിളിക്കുന്ന ‘വാത്തിയാർ’ എന്ന പേരും അതിലെ ‘വാംഗയ്യ വാത്തിയാർ അയ്യ’ എന്ന ഹിറ്റ് ഗാനവും ചിത്രത്തിന് വലിയൊരു വൈകാരിക ബന്ധം നൽകുന്നു. തൊണ്ണൂറുകളിലെ മസാല ചിത്രങ്ങളോടുള്ള ഒരു ആദരവാണ് ഈ സിനിമയെന്ന് സംവിധായകൻ ഇതിനോടകം വ്യക്തമാക്കിയിട്ടുണ്ട്.
കെ.ഇ. ജ്ഞാനവേൽ രാജയുടെ സ്റ്റുഡിയോ ഗ്രീൻ നിർമ്മിച്ച ഈ ചിത്രത്തിന് സംഗീതം നൽകിയിരിക്കുന്നത് സന്തോഷ് നാരായണനാണ്. തിയേറ്ററുകളിൽ വൻ തരംഗം സൃഷ്ടിക്കുന്ന സിനിമയുടെ ഒടിടി അവകാശം ഇതിനോടകം ആമസോൺ പ്രൈം വീഡിയോ സ്വന്തമാക്കിയിട്ടുണ്ട്. അരവിന്ദ് സ്വാമിയും കാർത്തിയും ഒന്നിച്ച ‘മെയ്യഴകൻ’ എന്ന ഹിറ്റ് ചിത്രത്തിന് ശേഷം കാർത്തിയുടേതായി പുറത്തിറങ്ങുന്ന ബിഗ് ബജറ്റ് ചിത്രമാണിത്. ഒരു സൂപ്പർ ഹീറോ ആക്ഷൻ മിക്സുള്ള ചിത്രം ആരാധകർക്ക് വലിയൊരു വിരുന്നായിരിക്കും എന്ന സൂചനയാണ് ആദ്യ ഷോകൾ നൽകുന്നത്.
The post ‘വാ വാത്തിയാർ’ തിയേറ്ററുകളിൽ തരംഗമാകുന്നു; കാർത്തിയുടെ പൊങ്കൽ വേട്ട ആരംഭിച്ചു! appeared first on Express Kerala.
