UAE തീരത്ത് എണ്ണക്കപ്പലിന് നേരെ ആക്രമണം: ഒരു ഇന്ത്യക്കാരനുൾപ്പെടെ 4 പേർക്ക് പരിക്ക് | Dubai Bound Oil Tanker

ന്യൂഡൽഹി : ദുബായ് ലക്ഷ്യമാക്കി പേർഷ്യൻ ഉൾക്കടലിലൂടെ സഞ്ചരിച്ച എണ്ണക്കപ്പലിന് നേരെ പ്രൊജക്റ്റൈൽ ആക്രമണം. ലൈബീരിയൻ പതാകയേന്തിയ ‘എംടി ഫുജൈറ എനർജി’ എന്ന അതിബൃഹത്തായ ക്രൂഡ് ഓയിൽ കപ്പലാണ് ആക്രമണത്തിനിരയായത്. അൽ റുവൈസിൽ നിന്ന് ദുബായിലേക്ക് പോകുകയായിരുന്ന കപ്പലിന് നേരെ ചൊവ്വാഴ്ചയാണ് ഈ ആക്രമണമുണ്ടായത്.(Dubai Bound Oil Tanker Carrying Indians Hit in Persian Gulf)

സംഭവത്തിൽ ഒരു ഇന്ത്യൻ പൗരൻ ഉൾപ്പെടെ നാല് ജീവനക്കാർക്ക് പരിക്കേറ്റതായി കേന്ദ്ര മന്ത്രി സർബാനന്ദ സോനോവാൾ എക്സ് പോസ്റ്റിലൂടെ വ്യക്തമാക്കി. പരിക്കേറ്റ ഇന്ത്യൻ നാവികന് സാരമായ പരിക്കുകളില്ലെന്നും, അദ്ദേഹത്തെ സുരക്ഷിതമായി കരയിലെത്തിച്ച് വിദഗ്ധ വൈദ്യസഹായം നൽകിയതായും മന്ത്രി അറിയിച്ചു. കപ്പലിലുണ്ടായിരുന്ന മറ്റ് അഞ്ച് ഇന്ത്യൻ നാവികർ ഉൾപ്പെടെയുള്ള 18 ജീവനക്കാർ സുരക്ഷിതരാണെന്നും എല്ലാവരെയും സുരക്ഷിതരായി കണ്ടെത്തിയിട്ടുണ്ടെന്നും അദ്ദേഹം കൂട്ടിച്ചേർത്തു.

കപ്പൽ മാനേജ്‌മെന്റ് കമ്പനിയുമായി നിരന്തരം ബന്ധപ്പെടുന്നുണ്ടെന്നും ജീവനക്കാരുടെ സുരക്ഷയും ആരോഗ്യവും ഉറപ്പാക്കാൻ സർക്കാർ സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണെന്നും മന്ത്രി വ്യക്തമാക്കി. പേർഷ്യൻ ഉൾക്കടലിലും ഹോർമുസ് കടലിടുക്കിലും ചരക്കുകപ്പലുകൾക്കും ജീവനക്കാർക്കുമെതിരെയുള്ള ആക്രമണങ്ങൾ വലിയ ആശങ്കയാണ് സൃഷ്ടിക്കുന്നത്. കഴിഞ്ഞ മാസം ഒമാന്റെ തീരത്തിന് സമീപം ഹോർമുസ് കടലിടുക്കിൽ വെച്ച് ഇന്ത്യൻ നാവികരുണ്ടായിരുന്ന പനാമ പതാകയേന്തിയ ‘എംടി ലൂയിസ് 1’ എന്ന എണ്ണക്കപ്പലിന് നേരെയും സമാനമായ ആക്രമണം നടന്നിരുന്നു.

Story Summary

A Liberia-flagged oil tanker, MT Fujairah Energy, was struck by a projectile in the Persian Gulf while en route to Dubai, injuring four crew members, including one Indian national. Union Minister Sarbananda Sonowal confirmed that the remaining Indian seafarers and crew members are safe, while authorities are closely monitoring the situation amid growing maritime security concerns in the region.