ചൈനീസ് ചാരവൃത്തി വിവാദം; സി.ഇ.ഒ ജെൻസൻ ഹുവാങ്ങിനെ പുറത്താക്കാൻ ഒരുങ്ങി എൻവിഡിയ, ഓഹരി വിലയിൽ എട്ട് ശതമാനത്തിലധികം ഇടിവ്
വാഷിംഗ്ടണ്‍: ചൈനീസ് ചാരവനിതയെന്ന് അമേരിക്കന്‍ രഹസ്യാന്വേഷണ ഏജന്‍സികള്‍ സംശയിക്കുന്ന സ്ത്രീയുമായി വിവാഹേതര ബന്ധമുണ്ടായിരുന്നതായി സമ്മതിച്ചതിന് പിന്നാലെ, പ്രമുഖ സെമികണ്ടക്ടര്‍ കമ്പനിയായ എന്‍വിഡിയയുടെ സി.ഇ.ഒ ജെന്‍സന്‍ ഹുവാങ്ങിനെ തല്‍സ്ഥാനത്തുനിന്ന് നീക്കാന്‍ ഡയറക്ടര്‍ ബോര്‍ഡ് ഒരുങ്ങുന്നതായി റിപ്പോര്‍ട്ട്.
യു.എസ് പ്രസിഡന്റ് ഡൊണാള്‍ഡ് ട്രംപിനും ഇക്കാര്യത്തില്‍ അറിവുണ്ടെന്ന് ‘വാള്‍ സ്ട്രീറ്റ് ജേണല്‍’ പുറത്തുവിട്ട റിപ്പോര്‍ട്ടില്‍ വ്യക്തമാക്കുന്നു. വാര്‍ത്ത പുറത്തുവന്നതിന് പിന്നാലെ ബുധനാഴ്ചത്തെ വ്യാപാരത്തിന് ശേഷം എന്‍വിഡിയയുടെ ഓഹരി വിലയില്‍ എട്ട് ശതമാനത്തിലധികം ഇടിവുണ്ടായി.
ലോകത്തിലെ മുന്‍നിര നിര്‍മ്മിതബുദ്ധി കമ്പനികള്‍ക്ക് ആവശ്യമായ അതിശക്തമായ ചിപ്പുകള്‍ നിര്‍മ്മിക്കുന്ന എന്‍വിഡിയയുടെ സാങ്കേതികവിദ്യയ്ക്ക് കര്‍ശനമായ കയറ്റുമതി നിയന്ത്രണങ്ങള്‍ നിലനില്‍ക്കെയാണ് ചൈനീസ് ചാരവൃത്തി ലക്ഷ്യമിട്ട് ഹുവാങ്ങിനെ കുടുക്കാന്‍ ശ്രമം നടന്നതായുള്ള വിവരം പുറത്തുവരുന്നത്.
കോടിക്കണക്കിന് ഡോളറിന്റെ എന്‍വിഡിയ ചിപ്പുകള്‍ വാങ്ങിക്കൂട്ടിയ സിംഗപ്പൂര്‍ ആസ്ഥാനമായുള്ള ‘മെഗാസ്പീഡ് ഇന്റര്‍നാഷണല്‍’ എന്ന കമ്പനിയുടെ മുന്‍ മേധാവിയും, ചൈനയുടെ സുരക്ഷാ മന്ത്രാലയം റിക്രൂട്ട് ചെയ്ത ചാരവനിതയാണെന്ന് യു.എസ് ഏജന്‍സികള്‍ കരുതുന്നതുമായ ആലീസ് ഹുവാങ്ങുമായുള്ള അടുത്ത ബന്ധമാണ് വിവാദമായത്.
ഭാര്യയോട് താന്‍ അവിശ്വസ്തത കാണിച്ചതായി സമ്മതിച്ചുകൊണ്ടും കുടുംബത്തോട് ക്ഷമ ചോദിച്ചുകൊണ്ടും ഹുവാങ് ജീവനക്കാര്‍ക്ക് സന്ദേശം അയച്ചിരുന്നെങ്കിലും സ്ത്രീയുടെ പേര് വെളിപ്പെടുത്തിയിരുന്നില്ല.
വിദേശ രഹസ്യാന്വേഷണ നീക്കങ്ങളുടെ ഇരയായി സി.ഇ.ഒ മാറിയെന്ന ആരോപണത്തില്‍ ഡയറക്ടര്‍ ബോര്‍ഡ് സ്വതന്ത്ര അന്വേഷണം പ്രഖ്യാപിച്ചിട്ടുണ്ടെങ്കിലും കമ്പനിയുടെ രഹസ്യങ്ങളോ ദേശീയ സുരക്ഷയോ ചോര്‍ന്നിട്ടില്ലെന്നാണ് ബോര്‍ഡിന്റെ പ്രാഥമിക വിലയിരുത്തല്‍.
അതേസമയം, കയറ്റുമതി നിയന്ത്രണങ്ങള്‍ ലംഘിച്ചോ എന്ന കാര്യത്തില്‍ മെഗാസ്പീഡിനെതിരെ യു.എസ് നീതിന്യായ വകുപ്പും അന്വേഷണം ആരംഭിച്ചിട്ടുണ്ട്. എന്നാല്‍ ആരോപണങ്ങള്‍ അടിസ്ഥാനരഹിതവും അപകീര്‍ത്തികരവുമാണെന്ന് ചൈനീസ് വിദേശകാര്യ മന്ത്രാലയം പ്രതികരിച്ചു.
വിവാദങ്ങള്‍ക്കിടയിലും ജെന്‍സന്‍ ഹുവാങ്ങിനെ പിന്തുണച്ച പ്രസിഡന്റ് ഡൊണാള്‍ഡ് ട്രംപ്, ഹുവാങ് വളരെ മികച്ച വ്യക്തിയാണെന്നും ബന്ധപ്പെട്ട സ്ത്രീ ചാരവനിതയാണെന്ന് അദ്ദേഹത്തിന് യാതൊരു അറിവുമുണ്ടായിരുന്നില്ലെന്നും വ്യക്തമാക്കി.
