തമിഴ് സിനിമാലോകം ഏറെ ആകാംക്ഷയോടെ കാത്തിരുന്ന ശിവകാർത്തികേയൻ ചിത്രം ‘പരാശക്തി’ തിയേറ്ററുകളിൽ പ്രദർശനം തുടരുകയാണ്. ശിവകാർത്തികേയന്റെ ഈ ബിഗ് ബജറ്റ് ചിത്രവും വിജയ്യുടെ ‘ജനനായകനും’ തമ്മിലുള്ള ബോക്സ് ഓഫീസ് പോരാട്ടത്തിനാണ് ആരാധകർ സാക്ഷ്യം വഹിക്കേണ്ടിയിരുന്നത്. എന്നാൽ സെൻസർ സർട്ടിഫിക്കറ്റ് വൈകിയത് കാരണം ജനനായകന്റെ റിലീസ് മാറ്റിവെച്ചത് പരാശക്തിക്ക് മുന്നിൽ വലിയ അവസരമാണ് തുറന്നുകൊടുത്തത്. എങ്കിലും ബോക്സ് ഓഫീസിൽ പ്രതീക്ഷിച്ചത്ര വലിയ കുതിപ്പ് നടത്താൻ ചിത്രത്തിന് സാധിച്ചില്ലെന്നാണ് പുറത്തുവരുന്ന കണക്കുകൾ സൂചിപ്പിക്കുന്നത്.
ആദ്യ ദിനം തമിഴ്നാട്ടിൽ നിന്ന് മാത്രം 12.5 കോടി രൂപ നേടിയ ചിത്രം അഞ്ച് ദിവസം പിന്നിടുമ്പോൾ ആഗോളതലത്തിൽ 56.75 കോടി രൂപയാണ് സമാഹരിച്ചത്. രണ്ടാം ദിനമായ ഞായറാഴ്ച 10.15 കോടി നേടിയെങ്കിലും തുടർദിവസങ്ങളിൽ കളക്ഷനിൽ ഇടിവുണ്ടായി. തിങ്കളാഴ്ച മൂന്ന് കോടിയും ചൊവ്വാഴ്ച 2.6 കോടിയും ബുധനാഴ്ച 2.35 കോടിയുമാണ് ചിത്രത്തിന് നേടാനായത്. വിദേശ വിപണിയിൽ നിന്ന് 20.55 കോടി രൂപ സമാഹരിക്കാൻ ചിത്രത്തിന് സാധിച്ചിട്ടുണ്ടെന്ന് പ്രമുഖ ട്രേഡിംഗ് അനലിസ്റ്റുകളായ സാക്നിൽക്കിന്റെ റിപ്പോർട്ടുകൾ വ്യക്തമാക്കുന്നു. ഇന്ത്യയിലെ മൊത്തം ഗ്രോസ് കളക്ഷൻ നിലവിൽ 36.2 കോടി രൂപയാണ്.
Also Read: ദൃശ്യം 3 റിലീസ് പ്രഖ്യാപിച്ചു; ഭൂതകാലം നിശബ്ദമല്ലെന്ന് മോഹൻലാൽ!
സുധ കൊങ്കര സംവിധാനം ചെയ്ത ഈ പീരിയഡ് ഡ്രാമയിൽ ശിവകാർത്തികേയനും അഥർവയും സഹോദരന്മാരായാണ് വേഷമിടുന്നത്. രവി മോഹനും തെലുങ്ക് താരം ശ്രീലീലയും ചിത്രത്തിൽ പ്രധാന വേഷങ്ങളിലെത്തുന്നു. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ചിത്രത്തിന്റെ കേരളത്തിലെ വിതരണാവകാശം ഏറ്റെടുത്തിരിക്കുന്നത്. ഡ്രീം ബിഗ് ഫിലിംസ് വഴിയാണ് ചിത്രം കേരളത്തിലെ തിയേറ്ററുകളിൽ എത്തിയത്.
The post ‘പരാശക്തി’ക്ക് ബോക്സ് ഓഫീസിൽ കാലിടറുന്നുവോ? അഞ്ചാം ദിനവും കളക്ഷനിൽ നേരിയ ഇടിവ് appeared first on Express Kerala.
