മലപ്പുറം: തിരൂർ പറവണ്ണയിൽ മോട്ടോർ വാഹനവകുപ്പിന്റെ പരിശോധനയ്ക്കിടെ ഉദ്യോഗസ്ഥനെ കാറിടിച്ച് വീഴ്ത്താൻ ശ്രമം. നിയമവിരുദ്ധമായി രൂപമാറ്റം വരുത്തിയ കാറിലെത്തിയ സംഘമാണ് ഉദ്യോഗസ്ഥന്റെ ജീവന് ഭീഷണിയാകും വിധം വാഹനം ഓടിച്ചുപോയത്. പരിശോധനയ്ക്കായി ഉദ്യോഗസ്ഥൻ ജീപ്പിൽ നിന്നിറങ്ങി കാറിനടുത്തേക്ക് നീങ്ങുന്നതിനിടെ, അമിതവേഗതയിൽ വാഹനം മുന്നോട്ട് എടുത്ത് ഉദ്യോഗസ്ഥനെ ഇടിച്ചുതെറിപ്പിക്കാൻ ശ്രമിക്കുകയായിരുന്നു. തലനാരിഴയ്ക്കാണ് ഉദ്യോഗസ്ഥൻ അപകടത്തിൽ നിന്നും രക്ഷപ്പെട്ടത്. ആക്രമണ ശ്രമത്തിന് ശേഷം അതിവേഗതയിൽ കാർ ഓടിച്ചുപോയ സംഘത്തിനായി തിരച്ചിൽ ഊർജ്ജിതമാക്കിയിട്ടുണ്ട്.
Also Read: ശമ്പളം കൂട്ടിയില്ല; ജോലി ചെയ്യുന്ന സ്ഥാപനം തല്ലിത്തകർത്ത് യുവാക്കൾ
യൂണിഫോം ധരിച്ച വിദ്യാർഥികളാണ് കാറിലുണ്ടായിരുന്നതെന്നാണ് പ്രാഥമിക വിവരം. ആദ്യം തിരുനാവായയിൽ വെച്ച് എംവിഡി ഉദ്യോഗസ്ഥർ കൈകാണിച്ചെങ്കിലും വാഹനം നിർത്താതെ പാഞ്ഞുപോയി. പിന്നീട് കൊടക്കല്ല് ഭാഗത്തുവെച്ച് വീണ്ടും തടയാൻ ശ്രമിച്ചെങ്കിലും സംഘം വഴങ്ങിയില്ല. തുടർന്ന് പറവണ്ണയിൽ വാഹനം നിർത്തിയിട്ടതായി കണ്ടെത്തിയതിനെ തുടർന്നാണ് ഉദ്യോഗസ്ഥർ അടുത്തേക്ക് ചെന്നത്. എന്നാൽ പിടിക്കപ്പെടുമെന്ന് ഉറപ്പായതോടെ ഉദ്യോഗസ്ഥനെ അപായപ്പെടുത്താൻ ശ്രമിച്ച് ഇവർ കടന്നുകളയുകയായിരുന്നു. സ്കൂൾ യൂണിഫോം ധരിച്ചവരാണ് വാഹനത്തിൽ ഉണ്ടായിരുന്നതെന്നത് സംഭവത്തിന്റെ ഗൗരവം വർദ്ധിപ്പിക്കുന്നു.
കണ്ണൂർ ഇരിട്ടി രജിസ്ട്രേഷനിലുള്ളതാണ് ഈ വാഹനമെന്ന് മോട്ടോർ വാഹനവകുപ്പ് തിരിച്ചറിഞ്ഞിട്ടുണ്ട്. പിടിച്ചെടുക്കാൻ ശ്രമിച്ച കാറിന്റെ രജിസ്ട്രേഷൻ കാലാവധി നേരത്തെ തന്നെ കഴിഞ്ഞതാണെന്നും പരിശോധനയിൽ വ്യക്തമായി. രൂപമാറ്റം വരുത്തിയതും രേഖകളില്ലാത്തതുമായ വാഹനം വിദ്യാർഥികൾക്ക് ലഭിച്ചതിനെക്കുറിച്ചും ഉദ്യോഗസ്ഥർ അന്വേഷിക്കുന്നുണ്ട്. പ്രതികളെ ഉടൻ കണ്ടെത്തുമെന്നും നിയമലംഘനം നടത്തിയവർക്കെതിരെ കർശന നടപടി സ്വീകരിക്കുമെന്നും എംവിഡി ഉദ്യോഗസ്ഥർ അറിയിച്ചു.
The post നിയമം ലംഘിച്ച് പാഞ്ഞത് യൂണിഫോം ധരിച്ച വിദ്യാർഥികൾ; തിരൂരിൽ എംവിഡി ഉദ്യോഗസ്ഥനെ കാറിടിച്ച് വീഴ്ത്താൻ ശ്രമം appeared first on Express Kerala.
