ഇരിങ്ങാലക്കുട : വൈറല് ചുമ പടര്ന്നു പിടിക്കുമ്പോള് ആരോഗ്യ മന്ത്രിയും ആരോഗ്യ വകുപ്പും സര്ക്കാരും പകച്ചു നില്ക്കുന്നത് ജനങ്ങളോടുള്ള വെല്ലുവിളിയാണെന്നും എല്ലാ ആരോഗ്യ കേന്ദ്രങ്ങളിലും ആശുപത്രികളിലും മരുന്നും ചികിത്സയും ഉറപ്പുവരുത്തണമെന്നും റിട്ട. ഹെല്ത്ത് ഇന്സ്പെക്ടേഴ്സ് അസോസിയേഷന് സംസ്ഥാന പ്രസിഡൻ്റ് ടി.എസ്. പവിത്രനും ജനറല് സെക്രട്ടറി കെ.ബി. പ്രേമരാജനും സംയുക്ത പ്രസ്താവനയില് ആവശ്യപ്പെട്ടു.
മെഡിക്കല് കോളെജ് ഡോക്ടര്മാരുടെ സമരം ഉടന് ഒത്തുതീര്പ്പിലാക്കണമെന്നു ആർ.എച്ച്.ഐ.എ. ആവശ്യപ്പെട്ടു.
ജനങ്ങളുടെ ക്ഷമ പരീക്ഷിക്കുന്നത് എല്ലാ നിലയിലും പരാജയപ്പെട്ട സര്ക്കാരിന് അലങ്കാരമാണെന്നും ആഭ്യന്തര വകുപ്പ് ജനങ്ങള്ക്ക് ബാദ്ധ്യതയായി മാറിക്കഴിഞ്ഞു എന്നും ജനങ്ങള് സര്ക്കാരിനെതിരായി പ്രതികരിക്കുവാന് തയ്യാറായിരിക്കുമ്പോള് സര്ക്കാര് സാധാരണ ജനങ്ങളെ വെല്ലുവിളിക്കുകയാണെന്നും അസോസിയേഷൻ ആരോപിച്ചു.
മന്ത്രിസഭയിലും മുന്നണിയിലും ചര്ച്ച ചെയ്യാതെ അഴിമതിക്കു വേണ്ടി മാത്രമായി ബാറുകളുടെ പ്രവര്ത്തന സമയം കൂട്ടിയത് ബാര് മുതലാളിമാര്ക്കു വേണ്ടി മാത്രമാണ്. അഴിമതിയില് കുളിച്ചു നില്ക്കുന്ന സര്ക്കാര് ജനങ്ങളുടെ ക്ഷമ പരിശോധിക്കരുതെന്നും റിട്ട ഹെൽത്ത് ഇൻസ്പെക്ടേഴ്സ് അസോസിയേഷൻ സര്ക്കാരിനെ ഓര്മ്മപ്പെടുത്തി.
