കുട്ടൻകുളം നികത്തി സ്മാരകം പണിയുന്നതിൽ നിന്ന് പിന്മാറണം : കൂടൽമാണിക്യം അഡ്മിനിസ്ട്രേറ്റർക്ക് നിവേദനം നൽകി ബിജെപി

ഇരിങ്ങാലക്കുട : കുട്ടൻകുളം നികത്തിയുള്ള സമര സ്മാരക നിർമ്മാണം
ഉപേക്ഷിക്കണമെന്നും, ക്ഷേത്രോത്സവ ചടങ്ങുകൾക്ക് മാറ്റം ആവശ്യമെങ്കിൽ തന്ത്രിമാർ, ദേവജ്ഞർ, ഭക്തജനങ്ങൾ എന്നിവരുമായി ചർച്ച ചെയ്തു മാത്രമേ നടപ്പിലാക്കാവൂ എന്നും ആവശ്യപ്പെട്ടു കൊണ്ട് ഭാരതീയ ജനതാ പാർട്ടി ഇരിങ്ങാലക്കുട മണ്ഡലം കമ്മിറ്റി കൂടൽമാണിക്യം ക്ഷേത്രം അഡ്മിനിസ്ട്രേറ്റർക്ക് നിവേദനം നൽകി.

കുട്ടന്‍കുളം നവീകരണം നടക്കുന്നതിന്റെ ഭാഗമായി കുട്ടൻകുളത്തിന്റെ കിഴക്കുവശം മണ്ണിട്ട് നികത്തി രാഷ്ട്രീയ സ്മാരകം നിർമ്മിക്കുന്നതിനുള്ള ദേവസ്വത്തിന്റെ നീക്കം അപലപനീയമാണ്. ക്ഷേത്ര നട മറച്ചു കൊണ്ടും, വാസ്തുപരമായ കണക്കുകൾ തെറ്റിച്ചു കൊണ്ടും, തണ്ണീർത്തട നിയമം ലംഘിച്ചു കൊണ്ടും നടത്തുന്ന ഇത്തരം പ്രവൃത്തികൾ ഭക്തർക്ക് അങ്ങേയറ്റം മനോവ്യഥ ഉണ്ടാക്കുന്നതാണെന്നും,
ക്ഷേത്രോത്സവ ചടങ്ങുകളിൽ നിലവിലെ ആചാരാനുഷ്ഠാന ക്രമങ്ങൾക്ക് മാറ്റം വരുത്തുവാനുള്ള നീക്കം അങ്ങേയറ്റം അപലനീയമാണെന്നും ബിജെപി ചൂണ്ടിക്കാട്ടി.

മണ്ഡലം പ്രസിഡൻ്റ് ആർച്ച അനീഷ്കുമാർ, മണ്ഡലം ജനറൽ സെക്രട്ടറിമാരായ ഷൈജു കുറ്റിക്കാട്ട്, വി.സി. രമേഷ്, മണ്ഡലം വൈസ് പ്രസിഡൻ്റ് രമേഷ് അയ്യർ, ടൗൺ ഏരിയ കമ്മിറ്റി ജനറൽ സെക്രട്ടറി കെ.എം. ബാബുരാജ്, യുവമോർച്ച മണ്ഡലം വൈസ് പ്രസിഡൻ്റ് സന്തോഷ് പിഷാരടി, സൗമ്യ മനോജ് എന്നിവരാണ് നിവേദനം നൽകിയ സംഘത്തിൽ ഉണ്ടായിരുന്നത്.