ഇരിങ്ങാലക്കുട : കൂടൽമാണിക്യം ക്ഷേത്രത്തിലെ തിരുവുത്സവാഘോഷവേളയിൽ ദേവനും, ഭഗവാൻ്റെ പാർഷദന്മാർക്കും, സേനാംഗങ്ങളായ ഭൂതഗണങ്ങൾക്കുമെല്ലാം വിശേഷാൽ നിവേദ്യത്തിനും ശ്രീഭൂതബലിക്കും വേണ്ടതായ ഹവിർധാന്യവുമായി പൂർവ്വിക നിശ്ചയപ്രകാരം ഊരാഴ്മക്കാർ ഭഗവത് സന്നിധിയിൽ പ്രാർത്ഥനാപൂർവ്വം ഒത്തുചേർന്നു.
ആശ്രമസദൃശമായ യജ്ഞഭൂമികയിൽ യോഗീശ്വര ഭാവത്തിൽ പരിലസിക്കുന്ന കൂടൽമാണിക്യ സ്വാമിയുടെ ക്ഷേത്രസങ്കേതം വിവാദങ്ങളകന്ന് നന്ദിഗ്രാമസമാനം സർവ്വൈശ്വര്യങ്ങളും പ്രദാനം ചെയ്യട്ടെ എന്ന പ്രാർത്ഥനയുമായി സമ്മേളിച്ച ഊരാഴ്മാവകാശികളിൽ നിന്നും ദേവസ്വം മാനേജർ ഇൻ ചാർജ്ജ് കെ.കെ. ഹരിത ദേവസ്വത്തിനുവേണ്ടി ഹവിർധാന്യം ഏറ്റുവാങ്ങി.
ഊരാഴ്മ ഇല്ലങ്ങളെ പ്രതിനിധീകരിച്ച് കെ.എൻ. ഉണ്ണികൃഷ്ണൻ നമ്പൂതിരിപ്പാട്, എടതിരിഞ്ഞി രാജീവ് നമ്പൂതിരി, കെ.ഡി. ദാമോദരൻ നമ്പൂതിരി, ഡി.എൻ. നാരായണൻ നമ്പൂതിരി എന്നിവർ സന്നിഹിതരായിരുന്നു.
മണക്കാട് പരമേശ്വരൻ നമ്പൂതിരി ആശീർവാദമരുളി.
