ജീവനക്കാരില്ലാതെ ആമ്പല്ലൂർ വില്ലേജ് ഓഫീസ്: ജനങ്ങൾ ദുരിതത്തിൽ; ശക്തമായ സമരത്തിനൊരുങ്ങി എ.ഐ.വൈ.എഫ്.
ആമ്പല്ലൂർ: വില്ലേജ് ഓഫീസിൽ ജീവനക്കാരില്ലാത്തതിനെ തുടർന്ന് ആമ്പല്ലൂർ വില്ലേജ് പരിധിയിലെ ജനങ്ങൾ കടുത്ത ദുരിതത്തിലെന്ന് എ.ഐ.വൈ.എഫ്. പുതിയ സർക്കാർ അധികാരത്തിലെത്തിയപ്പോൾ നടത്തിയ അന്യായമായ കൂട്ട സ്ഥലംമാറ്റമാണ് ഓഫീസിന്റെ പ്രവർത്തനം താളംതെറ്റിച്ചതെന്ന് എ.ഐ.വൈ.എഫ്. ആരോപിച്ചു.
അസിസ്റ്റന്റ് ഓഫീസർ, വില്ലേജ് മാൻ, ക്ലർക്ക് എന്നീ തസ്തികകളിൽ ആളില്ലാതായിട്ട് മൂന്ന് മാസത്തോളമായി. കഴിഞ്ഞ രണ്ടു മാസമായി വില്ലേജ് ഓഫീസറും ഉണ്ടായിരുന്നില്ല. ചെങ്ങാലൂർ വില്ലേജ് ഓഫീസർക്കായിരുന്നു ഇവിടെ പകരം ചുമതല നൽകിയിരുന്നത്. ആറ് ദിവസം മുൻപ് പുതിയ വില്ലേജ് ഓഫീസർ ചുമതലയേറ്റെങ്കിലും ആവശ്യത്തിന് മറ്റു ജീവനക്കാരില്ലാത്തതിനാൽ ദൈനംദിന പ്രവർത്തനങ്ങൾ പൂർണ്ണമായും മുടങ്ങിയിരിക്കുകയാണ്.
ജീവനക്കാരുടെ കുറവ് കാരണം ജനങ്ങൾക്ക് ആവശ്യമായ വിവിധ സർട്ടിഫിക്കറ്റുകൾ സമയബന്ധിതമായി ലഭിക്കുന്നില്ല. വിദ്യാർത്ഥികളും പൊതുജനങ്ങളും ഉൾപ്പെടെയുള്ളവർ സർട്ടിഫിക്കറ്റുകൾക്കായി ദിവസങ്ങളോളം ഓഫീസുകൾ കയറിയിറങ്ങേണ്ട അവസ്ഥയാണുള്ളത്. ഇതിന് അടിയന്തരമായി പരിഹാരം കണ്ടില്ലെങ്കിൽ ശക്തമായ സമരപരിപാടികൾക്ക് നേതൃത്വം നൽകുമെന്ന് എ.ഐ.വൈ.എഫ്. ആമ്പല്ലൂർ മേഖലാ കമ്മിറ്റി പ്രമേയത്തിലൂടെ സർക്കാരിനോട് ആവശ്യപ്പെട്ടു.
