ബ്രസീൽ തിരഞ്ഞെടുപ്പ് ‘അപമാനകരം’; നിലപാടെടുക്കില്ലെന്ന് ട്രംപ്, ഫ്ലാവിയോ ബോൾസൊനാരോ മയാമിയിൽ | Donald Trump Brazil election remarks

ബ്രസീലിലെ പ്രസിഡന്റ് തിരഞ്ഞെടുപ്പ് ‘വലിയ നാണക്കേടും അപമാനവുമാണെന്ന്’ വിശേഷിപ്പിച്ച് യുഎസ് പ്രസിഡന്റ് ഡൊണാൾഡ് ട്രംപ്. എന്നാൽ തിരഞ്ഞെടുപ്പ് ഫലത്തിൽ താൻ പക്ഷം പിടിച്ചിട്ടില്ലെന്നും വിജയിയെ അംഗീകരിക്കുന്നുണ്ടോയെന്ന ചോദ്യത്തിന് നേരിട്ട് മറുപടി നൽകാനില്ലെന്നും അദ്ദേഹം വ്യക്തമാക്കി. തിരഞ്ഞെടുപ്പിന് പിന്നാലെ മുൻ സെനറ്റർ ഫ്ലാവിയോ ബോൾസൊനാരോ കുടുംബത്തോടൊപ്പം അമേരിക്കയിലെ മയാമിയിലെത്തിയതിന് പിന്നാലെയാണ് ട്രംപിന്റെ പ്രതികരണം (Donald Trump Brazil election remarks).

വ്യാഴാഴ്ച മാധ്യമപ്രവർത്തകരോട് സംസാരിക്കവെയാണ് ട്രംപ് ബ്രസീലിലെ തിരഞ്ഞെടുപ്പിനെ വിമർശിച്ചത്. ബ്രസീലിന്റെ നിലവിലെ പ്രസിഡന്റ് പക്ഷം പിടിക്കരുതെന്ന് തന്നോട് ആവശ്യപ്പെട്ടിരുന്നതായും അതിനാൽ ഇടപെട്ടില്ലെന്നും അദ്ദേഹം പറഞ്ഞു. തിരഞ്ഞെടുപ്പിന് പിന്നാലെ ബ്രസീലിയൻ വിപണി കുത്തനെ ഇടിഞ്ഞതും ട്രംപ് വിമർശനത്തിന് കാരണമായി ചൂണ്ടിക്കാട്ടി. തിരഞ്ഞെടുപ്പിനുശേഷം ബ്രസീലിയൻ കറൻസിയായ റിയാലിന്റെ മൂല്യം ഡോളറിനെതിരെ സ്പോട്ട് വ്യാപാരത്തിൽ 12 ശതമാനം ഇടിഞ്ഞിരുന്നു.

ഞായറാഴ്ച നടന്ന രണ്ടാംഘട്ട തിരഞ്ഞെടുപ്പിൽ ഇടതുപക്ഷ നേതാവും നിലവിലെ പ്രസിഡന്റുമായ ലൂയിസ് ഇനാസിയോ ലുല ഡ സിൽവയോട് നാല് ദശലക്ഷത്തിലധികം വോട്ടുകൾക്കാണ് ഫ്ലാവിയോ ബോൾസൊനാരോ പരാജയപ്പെട്ടത്. പിന്നാലെ കുടുംബത്തോടൊപ്പം ബ്രസീൽ വിട്ട അദ്ദേഹം അർജന്റീന വഴി ഇക്വഡോറിലെത്തി അവിടെനിന്ന് സ്വകാര്യ വിമാനത്തിൽ മയാമിയിലേക്ക് പോകുകയായിരുന്നു. തിരഞ്ഞെടുപ്പിൽ കൃത്രിമം നടന്നുവെന്നതിന് തെളിവുകളൊന്നും നൽകാതെ താനാണ് യഥാർഥ വിജയിയെന്ന് അവകാശപ്പെട്ട ഫ്ലാവിയോ, അമേരിക്കയിൽനിന്ന് പ്രതിപക്ഷത്തെ നയിക്കുമെന്നും പ്രഖ്യാപിച്ചു.

ഫ്ലാവിയോയ്ക്കും കുടുംബത്തിനും ബ്രസീൽ വിടാൻ ട്രംപ് ഭരണകൂടം സഹായം നൽകിയതായും അവർക്ക് സ്ഥിരതാമസത്തിന് അനുമതി ലഭിച്ചേക്കാമെന്നും ന്യൂയോർക്ക് ടൈംസ് റിപ്പോർട്ട് ചെയ്തതായി അൽജസീറ വ്യക്തമാക്കി. അതേസമയം, ഫ്ലാവിയോയുടെ ലിബറൽ പാർട്ടി തിരഞ്ഞെടുപ്പ് ഫലം അംഗീകരിക്കുന്നതായി നേരത്തെ അറിയിച്ചിരുന്നു. തിരഞ്ഞെടുപ്പിന് പിന്നാലെ അഴിമതി, പണം വെളുപ്പിക്കൽ തുടങ്ങിയ ആരോപണങ്ങളിൽ അന്വേഷണം നേരിടുന്ന ഫ്ലാവിയോയുടെ പാസ്‌പോർട്ടുകൾ സമർപ്പിക്കാൻ ബ്രസീൽ സുപ്രീംകോടതി ഉത്തരവിട്ടിരുന്നു. എന്നാൽ യുഎസ് അദ്ദേഹത്തെ ബ്രസീലിന് കൈമാറുമോയെന്ന കാര്യത്തിൽ വ്യക്തതയില്ല. ഇരുരാജ്യങ്ങൾക്കുമിടയിൽ കുറ്റവാളികളെ കൈമാറുന്നതിനുള്ള കരാർ നിലവിലുണ്ടെങ്കിലും കൈമാറ്റത്തിനായി ബ്രസീൽ ഔദ്യോഗികമായി ആവശ്യപ്പെടുമോയെന്നും വ്യക്തമല്ല. ഫ്ലാവിയോയുടെ പിതാവും മുൻ പ്രസിഡന്റുമായ ജയർ ബോൾസൊനാരോയും 2022ലെ തിരഞ്ഞെടുപ്പിൽ പരാജയപ്പെട്ടശേഷം അമേരിക്കയിലേക്ക് പോയിരുന്നു. പിന്നീട് ബ്രസീലിലേക്ക് മടങ്ങിയ അദ്ദേഹം നിലവിൽ വീട്ടുതടങ്കലിലാണ്.

Summary: US President Donald Trump criticised Brazil’s presidential election as a “disgrace” but declined to take a position on its outcome. His remarks came after defeated candidate Flavio Bolsonaro travelled to Miami with his family and claimed, without providing evidence, that he was the country’s rightful president.