മാല മോഷ്ടിക്കാൻ ശ്രമിച്ച രണ്ടുപേരെ വടികൊണ്ട് തല്ലി; കവർച്ചാശ്രമം ചെറുത്ത് തെലങ്കാനയിലെ കർഷക | Telangana woman fights chain snatchers

തെലങ്കാനയിലെ സംഗറെഡ്ഡി ജില്ലയിൽ സ്വർണമാല കവർച്ച ചെയ്യാൻ ശ്രമിച്ച രണ്ടുപേരെ ധൈര്യത്തോടെ നേരിട്ട് കീഴടക്കി കർഷക. കിഷ്ടമ്മ എന്ന സ്ത്രീയാണ് കൃഷിയിടത്തിൽവെച്ച് മോഷ്ടാക്കളെ വടികൊണ്ട് തല്ലി മാല തിരിച്ചുപിടിച്ചത്. സമീപത്തെ കർഷകരുടെ സഹായത്തോടെ പ്രതികളെ പിടികൂടി പൊലീസിന് കൈമാറി. (Telangana woman fights chain snatchers)

വ്യാഴാഴ്ചയായിരുന്നു സംഭവം. കൃഷിയിടത്തിൽ ജോലി ചെയ്യുകയായിരുന്ന കിഷ്ടമ്മയുടെ അടുത്തേക്ക് ബൈക്കിലെത്തിയ രണ്ടുപേർ വഴി ചോദിക്കാനെന്ന വ്യാജേന സംസാരിക്കുകയായിരുന്നു. ഇതിനിടെ ഏകദേശം മൂന്ന് പവൻ തൂക്കമുള്ള സ്വർണ മംഗല്യസൂത്രം തട്ടിയെടുക്കാൻ ശ്രമിച്ചെന്നാണ് പരാതി. മാലയുമായി ബൈക്കിൽ രക്ഷപ്പെടാൻ ശ്രമിച്ച പ്രതികളെ കിഷ്ടമ്മ തടയുകയും ബഹളംവെച്ച് സഹായം തേടുകയും ചെയ്തു.

ശബ്ദം കേട്ടെത്തിയ സമീപത്തെ കർഷകർ ഇരുവരെയും പിന്തുടർന്ന് പിടികൂടി. തുടർന്ന് കിഷ്ടമ്മ മരത്തടി ഉപയോഗിച്ച് പ്രതികളെ നേരിടുകയും മാല തിരിച്ചുപിടിക്കുകയും ചെയ്തു. വിവരമറിഞ്ഞ് സ്ഥലത്തെത്തിയ ജിന്നാരം പൊലീസ് ഇരുവരെയും കസ്റ്റഡിയിലെടുത്തു.
മുച്ചേർല സ്വദേശിയായ വഡ്ഡെ സൈലു, മീനാംപള്ളി സ്വദേശിയായ അരവിന്ദ് എന്നിവരാണ് പിടിയിലായത്. ഇരുവർക്കും നേരത്തെ നാല് മോഷണക്കേസുകളിൽ പങ്കുണ്ടെന്ന് പൊലീസ് അറിയിച്ചു. കിഷ്ടമ്മ നൽകിയ പരാതിയിൽ കേസെടുത്ത പൊലീസ് പ്രതികളെ അറസ്റ്റ് ചെയ്ത് കോടതിയിൽ ഹാജരാക്കി റിമാൻഡ് ചെയ്തു.

Summary: A woman farmer in Telangana’s Sangareddy district resisted an alleged chain-snatching attempt by two men. With help from nearby farmers, she caught the suspects, recovered her gold mangalsutra and handed them over to the police.