അണ്ടർ 19 ഏകദിന ലോകകപ്പിൽ ഇന്ത്യ ഇന്ന് ബംഗ്ലാദേശിനെ നേരിടും. സിംബാബ്വെയിലെ ബുലവായോ ഗ്രൗണ്ടിൽ ഇന്ത്യൻ സമയം ഉച്ചയ്ക്ക് 1.30-നാണ് മത്സരം ആരംഭിക്കുന്നത്. ആദ്യ മത്സരത്തിൽ അമേരിക്കയ്ക്കെതിരെ പതറിയെങ്കിലും വിജയിച്ചു കയറാൻ ഇന്ത്യക്ക് സാധിച്ചിരുന്നു. കഴിഞ്ഞ കളിയിൽ തിളങ്ങാൻ കഴിയാതിരുന്ന വൈഭവ് സൂര്യവംശിയുടെ തകർപ്പൻ ബാറ്റിംഗ് പ്രകടനത്തിനായാണ് ആരാധകർ കാത്തിരിക്കുന്നത്. ഒപ്പം മലയാളി താരങ്ങളായ ആരോൺ ജോർജും മുഹമ്മദ് ഇനാനും ഇന്നത്തെ പ്ലേയിംഗ് ഇലവനിൽ ഇടംപിടിക്കുമോ എന്നതും കേരളത്തിലെ ക്രിക്കറ്റ് പ്രേമികൾ ആകാംക്ഷയോടെ ഉറ്റുനോക്കുന്നു.
കളിക്കളത്തിലെ പോരാട്ടത്തിനപ്പുറം ഇരുരാജ്യങ്ങളും തമ്മിലുള്ള ക്രിക്കറ്റ് ബന്ധം വഷളായ പശ്ചാത്തലത്തിലാണ് ഈ മത്സരം നടക്കുന്നത്. ബംഗ്ലാദേശിൽ ന്യൂനപക്ഷങ്ങൾക്കെതിരെ നടക്കുന്ന ആക്രമണങ്ങളിൽ പ്രതിഷേധിച്ച് കൊൽക്കത്ത നൈറ്റ് റൈഡേഴ്സ് മുസ്തഫിസുർ റഹ്മാനെ ഒഴിവാക്കിയതോടെയാണ് തർക്കങ്ങൾ തുടങ്ങിയത്. ഇതിന് പിന്നാലെ ബംഗ്ലാദേശ് സർക്കാർ ഐപിഎൽ സംപ്രേഷണം നിരോധിക്കുകയും ഇന്ത്യയിൽ നടക്കാനിരിക്കുന്ന ടി20 ലോകകപ്പ് വേദി മാറ്റണമെന്ന് ഐസിസിയോട് ആവശ്യപ്പെടുകയും ചെയ്തിരുന്നു.
Also Read: കോഹ്ലിയെ മറികടന്ന് വാർണർ; ടി20 സെഞ്ച്വറികളിൽ മൂന്നാം സ്ഥാനം
ബംഗ്ലാദേശ് ക്രിക്കറ്റ് ബോർഡിനുള്ളിലെ ആഭ്യന്തര പ്രശ്നങ്ങളും ഈ മത്സരത്തിന് മുന്നോടിയായി ചർച്ചയാകുന്നുണ്ട്. പ്രശ്നങ്ങൾ ചർച്ചയിലൂടെ പരിഹരിക്കണമെന്ന് നിർദ്ദേശിച്ച മുൻ താരം തമീം ഇക്ബാലിനെ ‘ഇന്ത്യൻ ഏജന്റ്’ എന്ന് വിളിച്ച് അധിക്ഷേപിച്ച ഡയറക്ടർ നസ്മുൾ ഇസ്ലാമിനെതിരെ വലിയ പ്രതിഷേധം ഉയർന്നിരുന്നു. ഇതേത്തുടർന്ന് കളിക്കാർ ബംഗ്ലാദേശ് പ്രീമിയർ ലീഗ് ബഹിഷ്കരിക്കുകയും ഒടുവിൽ നസ്മുൾ ഇസ്ലാമിനെ സ്ഥാനത്തുനിന്ന് നീക്കാൻ ബോർഡ് തീരുമാനിക്കുകയും ചെയ്തു. ഈ രാഷ്ട്രീയ-ഭരണപരമായ അസ്വസ്ഥതകൾക്കിടയിലാണ് അണ്ടർ 19 ടീമുകൾ ഇന്ന് മൈതാനത്ത് നേർക്കുനേർ വരുന്നത്.
The post വൈഭവ് മിന്നിക്കുമോ? ക്രിക്കറ്റ് കളത്തിൽ പകരം വീട്ടാൻ ബംഗ്ലാദേശ്; അണ്ടർ 19 ലോകകപ്പിൽ ഇന്ന് തീപാറും പോരാട്ടം appeared first on Express Kerala.
