അബുദാബിയിൽ നാലു വർഷം മുമ്പ് ഹൂതി വിമതർ നടത്തിയ ആക്രമണത്തിന്റെ വാർഷിക ദിനത്തിൽ, രാജ്യത്തിന്റെ പ്രതിരോധശേഷിയും വെല്ലുവിളികളെ നേരിടാനുള്ള ജനതയുടെ സന്നദ്ധതയും വിളംബരം ചെയ്തുകൊണ്ട് യുഎഇ ഇന്ന് ‘ഐക്യദാർഢ്യ ദിനം’ ആചരിക്കുന്നു. ആഗോളതലത്തിൽ രാജ്യത്തിന്റെ ഖ്യാതി ഉയർത്തിപ്പിടിക്കാനും ജനങ്ങൾ കാട്ടിയ അചഞ്ചലമായ ഒരുമയുടെ ഓർമ്മ പുതുക്കാനുമായി സംഘടിപ്പിക്കുന്ന ഈ ദിനം, യുഎഇയുടെ കരുത്തിന്റെയും ഐക്യത്തിന്റെയും ശക്തമായ തെളിവായി മാറുന്നു.
യുഎഇ ഐക്യദാർഢ്യ ദിനാചരണത്തിന്റെ ഭാഗമായി ഇന്ന് രാജ്യത്തുടനീളം വിപുലമായ വ്യോമാഭ്യാസ പ്രകടനങ്ങൾ നടക്കും. ഹൂതികൾ അബുദാബിയിൽ നടത്തിയ ആക്രമണത്തെ ജനത ഒറ്റക്കെട്ടായി നേരിട്ടതിന്റെ ഓർമ്മ പുതുക്കുന്ന ഈ ദിനത്തിൽ, പോർവിമാനങ്ങളും ഹെലികോപ്റ്ററുകളും അണിനിരക്കുന്ന എയർഷോ ഓരോ എമിറേറ്റുകളിലും വ്യത്യസ്ത സമയങ്ങളിലായാണ് ക്രമീകരിച്ചിരിക്കുന്നത്. സ്വദേശികളും പ്രവാസികളും ഒരുപോലെ ഈ ഐക്യദാർഢ്യത്തിൽ പങ്കുചേരണമെന്ന് യുഎഇ പ്രതിരോധ മന്ത്രി ശൈഖ് ഹംദാൻ ബിൻ മുഹമ്മദ് ആഹ്വാനം ചെയ്തു.
എമിറേറ്റുകളിലെ എയർഷോ സമയക്രമം താഴെ നൽകുന്നു:
അബുദാബി: വൈകിട്ട് 4:35
ദുബായ് (ജെ.ബി.ആർ): വൈകിട്ട് 4:43, 5:20
ഷാർജ (ബുഹൈറ കോർണിഷ്): വൈകിട്ട് 4:44, 5:30
അജ്മാൻ ബീച്ച്: വൈകിട്ട് 4:45, 5:34
ഉമ്മൽ ഖുവൈൻ: വൈകിട്ട് 4:46, 5:42
റാസ് അൽ ഖൈമ: വൈകിട്ട് 4:51, 6:00
ഫുജൈറ (അംബ്രല്ല ബീച്ച്): വൈകിട്ട് 4:39, 5:04
2022-ൽ മുസഫയിലെ ഐസിഎഡി 3 (ICAD 3), അബുദാബി വിമാനത്താവളം എന്നിവിടങ്ങളിൽ നടന്ന ആക്രമണത്തെ രാജ്യം അതിജീവിച്ചതിന്റെ കരുത്താണ് ഈ ദിനത്തിലൂടെ വീണ്ടും വിളംബരം ചെയ്യുന്നത്.
The post ഐക്യദാർഢ്യ ദിനം; യുഎഇയുടെ ആകാശവിസ്മയം ഇന്ന്, എമിറേറ്റുകളിലെ സമയക്രമം അറിയാം appeared first on Express Kerala.
