ന്യൂസിലാൻഡിനെതിരായ ടി20 പരമ്പരയ്ക്കുള്ള ഇന്ത്യൻ ടീമിൽ ശ്രേയസ് അയ്യരെയും രവി ബിഷ്ണോയിയെയും ഉൾപ്പെടുത്തി. പരിക്കേറ്റ് പുറത്തായ തിലക് വർമ്മയ്ക്ക് പകരമായാണ് ആദ്യ മൂന്ന് മത്സരങ്ങൾക്കുള്ള ടീമിലേക്ക് ശ്രേയസ് അയ്യർ തിരിച്ചെത്തുന്നത്. വാഷിംഗ്ടൺ സുന്ദറിന് സൈഡ് സ്ട്രെയിൻ സ്ഥിരീകരിച്ചതിനെത്തുടർന്ന് പരമ്പര മുഴുവൻ നഷ്ടമാകുന്ന സാഹചര്യത്തിലാണ് രവി ബിഷ്ണോയിയെ പകരക്കാരനായി നിശ്ചയിച്ചത്.
രണ്ടു വർഷത്തെ ഇടവേളയ്ക്ക് ശേഷമാണ് ശ്രേയസ് അയ്യർ ടി20 ടീമിലേക്ക് മടങ്ങിയെത്തുന്നത്. കഴിഞ്ഞ ഐപിഎല്ലിൽ പഞ്ചാബ് കിങ്സിനെ ഫൈനലിലേക്ക് നയിച്ച മികച്ച പ്രകടനമാണ് ശ്രേയസിന് തുണയായത്. തിലക് വർമ്മ അവസാന രണ്ട് മത്സരങ്ങളിൽ തിരിച്ചെത്തുമെന്ന് പ്രതീക്ഷിക്കുമ്പോഴും, സുന്ദറിന്റെ പരിക്ക് ഗൗരവമുള്ളതാണ്. സുന്ദറിനോട് ബെംഗളൂരുവിലെ ബിസിസിഐ സെന്റർ ഓഫ് എക്സലൻസിൽ റിപ്പോർട്ട് ചെയ്യാൻ നിർദേശിച്ചിട്ടുണ്ട്.
Also Read: വഴിമാറിക്കൊടുത്തത് വിനയായി; അണ്ടർ 19 ലോകകപ്പിൽ പാക് താരത്തിന്റെ അവിശ്വസനീയ റണ്ണൗട്ട്
ടി20 ലോകകപ്പിന് തൊട്ടുമുമ്പ് പ്രധാന താരങ്ങൾ പരിക്കിന്റെ പിടിയിലാകുന്നത് ഇന്ത്യൻ ക്യാമ്പിൽ ആശങ്കയുണ്ടാക്കുന്നുണ്ട്. 2025 ജനുവരിയിൽ ഇംഗ്ലണ്ടിനെതിരെയാണ് രവി ബിഷ്ണോയി അവസാനമായി അന്താരാഷ്ട്ര ടി20 കളിച്ചത്. നിലവിൽ 42 മത്സരങ്ങളിൽ നിന്നായി 61 വിക്കറ്റുകൾ ബിഷ്ണോയിയുടെ പേരിലുണ്ട്. താരങ്ങളുടെ ഈ തിരിച്ചുവരവ് പരമ്പരയിൽ ഇന്ത്യയ്ക്ക് കരുത്താകുമെന്നാണ് വിലയിരുത്തൽ.
The post ടി20 ടീമിലേക്ക് ശ്രേയസ് അയ്യരുടെ മാസ്സ് എൻട്രി; ന്യൂസിലാൻഡ് പരമ്പരയിൽ മാറ്റങ്ങളുമായി ഇന്ത്യ appeared first on Express Kerala.
