കുവൈത്തിലെ ക്രൈസ്തവ സമൂഹത്തിന് സമാനതകളില്ലാത്ത ആത്മീയ നിമിഷം സമ്മാനിച്ചുകൊണ്ട് അഹമ്മദിയിലെ ഔർ ലേഡി ഓഫ് അറേബ്യ ദേവാലയത്തെ ‘മൈനർ ബസിലിക്ക’ പദവിയിലേക്ക് ഔദ്യോഗികമായി ഉയർത്തി. വത്തിക്കാൻ സ്റ്റേറ്റ് സെക്രട്ടറി കർദിനാൾ പിയട്രോ പരോളിന്റെ മുഖ്യകാർമ്മികത്വത്തിലാണ് ഈ ചരിത്ര പ്രഖ്യാപനം നടന്നത്. അറേബ്യൻ ഉപദ്വീപിൽ ഈ പദവി കരസ്ഥമാക്കുന്ന ആദ്യ ദേവാലയമെന്ന സവിശേഷതയും ഇനി അഹമ്മദി പള്ളിക്കുണ്ടാകും. നയതന്ത്ര പ്രതിനിധികൾ, വിവിധ രാജ്യങ്ങളിലെ അംബാസഡർമാർ, ഗൾഫ് മേഖലയിലെ സഭാ പുരോഹിതർ തുടങ്ങിയ പ്രമുഖരുടെ സാന്നിധ്യത്തിലായിരുന്നു ചടങ്ങുകൾ നടന്നത്.
Also Read: ഐക്യദാർഢ്യ ദിനം; യുഎഇയുടെ ആകാശവിസ്മയം ഇന്ന്, എമിറേറ്റുകളിലെ സമയക്രമം അറിയാം
ഇതൊരു ‘അനുഗൃഹീത ചരിത്രദിനമാണെന്ന്’ ചടങ്ങിൽ സംസാരിച്ച കർദിനാൾ പിയട്രോ പരോളിൻ വിശേഷിപ്പിച്ചു. മൈനർ ബസിലിക്ക പദവി വെറുമൊരു കെട്ടിടത്തിന് ലഭിക്കുന്ന ബഹുമതിയല്ലെന്നും മറിച്ച് പതിറ്റാണ്ടുകൾ നീണ്ട വിശ്വാസയാത്രയ്ക്കും അറേബ്യൻ ഉപദ്വീപിലെ സഭയുടെ ദൗത്യത്തിനുമുള്ള വലിയ അംഗീകാരമാണെന്നും അദ്ദേഹം കൂട്ടിച്ചേർത്തു. കുവൈത്തിന്റെ യൂറോപ്യൻ കാര്യങ്ങൾക്കായുള്ള അസിസ്റ്റന്റ് വിദേശകാര്യ മന്ത്രി അംബാസഡർ സാദിഖ് മറാഫി ഉൾപ്പെടെയുള്ള രാഷ്ട്രീയ-നയതന്ത്ര പ്രമുഖർ ചടങ്ങിന് സാക്ഷ്യം വഹിച്ചു.
ഇരുപതാം നൂറ്റാണ്ടിന്റെ മധ്യത്തിൽ കുവൈത്തിലെത്തിയ ഗാർഹിക-എണ്ണ മേഖലയിലെ സാധാരണക്കാരായ തൊഴിലാളികളാണ് ഈ ദേവാലയത്തിന് പിന്നിലെ യഥാർത്ഥ കരുത്ത്. അന്യനാട്ടിലെ ജോലിത്തിരക്കിനിടയിലും തങ്ങളുടെ ആത്മീയത മുറുകെപ്പിടിച്ച അവരുടെ വിശ്വാസത്തിന്റെ അടയാളമായാണ് ഈ പള്ളി ഉയർന്നു വന്നത്. 1956-ൽ സ്ഥാപിതമായ ഈ ദേവാലയം ഏഴു പതിറ്റാണ്ടുകളോളമായി ആയിരക്കണക്കിന് പ്രവാസി വിശ്വാസികൾക്ക് വലിയ പ്രത്യാശയും ആശ്വാസവും നൽകുന്ന കേന്ദ്രമായി തുടരുകയാണ്.
The post അറേബ്യൻ ഉപദ്വീപിലെ ആദ്യ ‘മൈനർ ബസിലിക്ക’; കുവൈത്തിലെ ഔർ ലേഡി ഓഫ് അറേബ്യ ദേവാലയത്തിന് ചരിത്ര പദവി appeared first on Express Kerala.
