സംസ്ഥാനത്തെ പൊതുവിദ്യാലയങ്ങളിലെ അധ്യാപക നിയമനത്തിനുള്ള കെ-ടെറ്റ് പരീക്ഷാ യോഗ്യതയിൽ ഇളവുകൾ നൽകുന്നതുമായി ബന്ധപ്പെട്ട് സർക്കാരും പിഎസ്സിയും നിയമക്കുരുക്കിലേക്ക് നീങ്ങുന്നു. ഉയർന്ന യോഗ്യതകളായ സിടെറ്റ്, നെറ്റ്, സെറ്റ്, എംഫിൽ, പിഎച്ച്ഡി എന്നിവയുള്ളവർക്ക് കെ-ടെറ്റിൽ ഇളവ് നൽകുന്നത് നിയമവിരുദ്ധമാണെന്ന് 2017 മുതൽ സുപ്രീംകോടതിയും ഹൈക്കോടതിയും പലതവണ വ്യക്തമാക്കിയിട്ടുണ്ട്. എന്നിരുന്നാലും, കോടതി വിധികളിൽ വ്യക്തത തേടാതെ സർക്കാർ ഈ ഇളവുകൾ തുടരുന്നത് ഭാവിയിൽ വലിയ നിയമപ്രശ്നങ്ങൾക്ക് കാരണമായേക്കാം.
പിഎസ്സിയുടെ ഏറ്റവും പുതിയ എൽപി-യുപി റാങ്ക് പട്ടികകളിൽ പോലും കെ-ടെറ്റ് ഇല്ലാത്ത ഉന്നത യോഗ്യതയുള്ളവരെ ഉൾപ്പെടുത്തിയിട്ടുണ്ട്. എന്നാൽ, എയ്ഡഡ് സ്കൂളുകളിലെ ഭിന്നശേഷി സംവരണ നിയമനങ്ങളുമായി ബന്ധപ്പെട്ട് അടുത്തിടെ പുറത്തിറങ്ങിയ ഉത്തരവിൽ ഇത്തരക്കാർക്ക് ഇളവ് നൽകിയിട്ടില്ല എന്നത് വൈരുദ്ധ്യമാണ്. ഈ ഉത്തരവ് നേരിട്ടുള്ള നിയമനങ്ങൾക്കും ബാധകമായതോടെ, നിലവിലെ റാങ്ക് പട്ടികയിലുള്ള കെ-ടെറ്റ് ഇല്ലാത്ത ഉദ്യോഗാർത്ഥികളുടെ നിയമനം അനിശ്ചിതത്വത്തിലായിരിക്കുകയാണ്.
Also Read: യുകെയിൽ പഠിക്കാം 18 ലക്ഷം രൂപ സ്കോളർഷിപ്പോടെ; ഇന്ത്യൻ വിദ്യാർത്ഥികൾക്ക് സുവർണ്ണാവസരം
കെ-ടെറ്റ് നിർബന്ധമാക്കിയ 2010-ന് ശേഷം നിയമനം ലഭിച്ചവരിൽ ഇളവ് ആനുകൂല്യം പറ്റി ജോലിയിൽ കയറിയവരുടെ കാര്യത്തിലാണ് പ്രധാനമായും ആശങ്ക ഉയരുന്നത്. സർവീസിലുള്ളവർക്ക് സ്ഥാനക്കയറ്റത്തിന് പോലും കെ-ടെറ്റ് നിർബന്ധമാക്കിയ സുപ്രീംകോടതി വിധി കഴിഞ്ഞ സെപ്റ്റംബറിലും വന്നിരുന്നു. 2010-ന് മുൻപ് സർവീസിൽ കയറിയവർ രണ്ട് വർഷത്തിനുള്ളിൽ ഈ യോഗ്യത നേടണമെന്നാണ് കോടതി ഉത്തരവ്. എന്നാൽ, അതിനുശേഷം ഇളവുകളിലൂടെ ജോലി നേടിയവരുടെ നിയമന സാധുതയിൽ ഇപ്പോഴും അവ്യക്തത തുടരുന്നു.
2016-ലാണ് ഉയർന്ന യോഗ്യതയുള്ളവർക്ക് ഹൈസ്കൂൾ തലം വരെ ടെറ്റ് ആവശ്യമില്ലെന്ന ഉത്തരവ് സംസ്ഥാന സർക്കാർ പുറപ്പെടുവിച്ചത്. ഇതിന്റെ ചുവടുപിടിച്ചാണ് പിഎസ്സി പിന്നീട് വിജ്ഞാപനങ്ങൾ ഇറക്കിയത്. ഇത്തരം ഇളവുകൾ നൽകാൻ സംസ്ഥാന സർക്കാരിന് അധികാരമില്ലെന്ന കോടതി ഉത്തരവുകൾ നിലനിൽക്കെയാണ് നടപടികൾ തുടരുന്നത്. വരാനിരിക്കുന്ന കെ-ടെറ്റ് പരീക്ഷയുടെ വിജ്ഞാപനത്തിലും ഈ ഇളവുകൾ ഉൾപ്പെടുത്തിയിട്ടുണ്ടെങ്കിലും, സുപ്രീംകോടതി വിധിക്കനുസരിച്ച് ഇതിൽ മാറ്റം വന്നേക്കാമെന്ന സൂചന അധികൃതർ നൽകുന്നുണ്ട്.
The post കെ-ടെറ്റ് ഇളവുകൾ നിയമക്കുരുക്കിലേക്ക്; അധ്യാപക നിയമനങ്ങളിൽ ആശങ്ക പടരുന്നു appeared first on Express Kerala.
