ബംഗാളിൽ നടക്കാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായി കൊൽക്കത്തയിൽ നടന്ന റാലിയിൽ തൃണമൂൽ കോൺഗ്രസ് സർക്കാരിനെതിരെ രൂക്ഷമായ വിമർശനങ്ങളുമായി പ്രധാനമന്ത്രി നരേന്ദ്ര മോദി രംഗത്തെത്തി. പുതിയ തലമുറ ബിജെപിയുടെ വികസന മാതൃകയിലാണ് വിശ്വസിക്കുന്നതെന്നും മഹാരാഷ്ട്ര മുനിസിപ്പൽ തിരഞ്ഞെടുപ്പിലെ വിജയം ഇതിന് ഉദാഹരണമാണെന്നും അദ്ദേഹം പറഞ്ഞു. പശ്ചിമ ബംഗാളിലെ ജനങ്ങളുടെ ശത്രുവായി ടിഎംസി സർക്കാർ മാറിയിരിക്കുകയാണെന്നും വരാനിരിക്കുന്ന തിരഞ്ഞെടുപ്പിലൂടെ ഈ ‘ഹൃദയമില്ലാത്ത’ സർക്കാരിനെ അധികാരത്തിൽ നിന്ന് പുറത്താക്കണമെന്നും മോദി ആഹ്വാനം ചെയ്തു.
കേന്ദ്ര സർക്കാർ പാവപ്പെട്ടവർക്കായി നൽകുന്ന ഫണ്ടുകൾ തൃണമൂൽ നേതാക്കൾ കൊള്ളയടിക്കുകയാണെന്ന് പ്രധാനമന്ത്രി ആരോപിച്ചു. കേന്ദ്രത്തിന്റെ ക്ഷേമപദ്ധതികൾ അഴിമതി കാരണം അർഹരായവരിലേക്ക് എത്തുന്നില്ല. പാവപ്പെട്ടവർക്ക് സൗജന്യ റേഷനും വീടും ഉറപ്പാക്കാൻ ബിജെപി പ്രതിജ്ഞാബദ്ധമാണെന്നും എന്നാൽ സംസ്ഥാനത്തെ അഴിമതി നിറഞ്ഞ ഭരണം ഇതിന് തടസ്സം നിൽക്കുകയാണെന്നും അദ്ദേഹം പറഞ്ഞു. ഒഡീഷ, ത്രിപുര, അസം, ബിഹാർ തുടങ്ങിയ സംസ്ഥാനങ്ങളിലെ ബിജെപി വിജയങ്ങൾ ചൂണ്ടിക്കാട്ടി ബംഗാളിലും സമാനമായ ഭരണമാറ്റം അനിവാര്യമാണെന്ന് അദ്ദേഹം ഓർമ്മിപ്പിച്ചു.
ആരോഗ്യ പദ്ധതിയായ ആയുഷ്മാൻ ഭാരത് ബംഗാളിൽ നടപ്പിലാക്കാൻ അനുവദിക്കാത്ത ഏക സംസ്ഥാനം ബംഗാളാണെന്ന് മോദി കുറ്റപ്പെടുത്തി. പാവപ്പെട്ടവർക്ക് ചികിത്സാ സഹായം ലഭിക്കുന്നത് തടയാനാണ് മമത സർക്കാർ ശ്രമിക്കുന്നത്. ഭിന്നിപ്പിക്കുന്ന രാഷ്ട്രീയം അവസാനിപ്പിക്കണമെന്നും ബംഗാളിനെ അനധികൃത കുടിയേറ്റത്തിൽ നിന്ന് മുക്തമാക്കണമെന്നും അദ്ദേഹം ആവശ്യപ്പെട്ടു. ഗംഗാ മാതാവിന്റെ അനുഗ്രഹത്താൽ വികസനത്തിന്റെ നദി ഇനി ബംഗാളിലൂടെ ഒഴുകുമെന്നും അത് ബിജെപി സാധ്യമാക്കുമെന്നും അദ്ദേഹം പ്രസംഗത്തിൽ വ്യക്തമാക്കി.
The post ‘ജെൻ സി’യുടെ വിശ്വാസം ബിജെപിയിൽ! ബംഗാളിനെ രക്ഷിക്കാൻ തൃണമൂലിനെ പുറത്താക്കണം; പ്രധാനമന്ത്രി appeared first on Express Kerala.
