ഉത്തരേന്ത്യൻ സംസ്ഥാനങ്ങളിൽ ശൈത്യതരംഗത്തിൽ ദുരിതമനുഭവിക്കുന്ന പാവപ്പെട്ടവർക്ക് താങ്ങായി റിയാദ് കെഎംസിസി സെൻട്രൽ കമ്മിറ്റി. മുസ്ലിം ലീഗിന് കീഴിലുള്ള ലാഡർ ഫൗണ്ടേഷൻ നടത്തുന്ന പുതപ്പ് സമാഹരണ യജ്ഞത്തിലേക്ക് 3,000 കമ്പിളി പുതപ്പുകൾ കെഎംസിസി നൽകി. ഇതിനായി സമാഹരിച്ച ഒമ്പത് ലക്ഷം രൂപ സൗദി കെഎംസിസി നാഷണൽ കമ്മിറ്റിക്ക് കൈമാറിക്കഴിഞ്ഞു. പ്രവാസലോകത്തെ മലയാളികളുടെ ഈ സഹായം ഉത്തരേന്ത്യയിലെ ആയിരക്കണക്കിന് കുടുംബങ്ങൾക്കാണ് തണലാകുന്നത്.
അവിശ്വസനീയമായ വേഗതയിലാണ് കെഎംസിസി ഈ ദൗത്യം പൂർത്തിയാക്കിയത്. വാട്സാപ്പ് വഴിയുള്ള ഒരൊറ്റ സന്ദേശം ഏറ്റെടുത്ത് വിവിധ ജില്ലാ, ഏരിയ, പഞ്ചായത്ത് കമ്മിറ്റികൾ രംഗത്തിറങ്ങിയതോടെ വെറും ഒരാഴ്ചയ്ക്കുള്ളിൽ ലക്ഷ്യമിട്ട തുക സമാഹരിക്കാൻ സാധിച്ചു. സംഘടനയോടുള്ള പ്രവർത്തകരുടെ കൂറും സേവനതാല്പര്യവുമാണ് ഇത്രയും ചുരുങ്ങിയ സമയത്തിനുള്ളിൽ ഈ നേട്ടം കൈവരിക്കാൻ സഹായിച്ചതെന്ന് സെൻട്രൽ കമ്മിറ്റി വ്യക്തമാക്കി. പദ്ധതിയുമായി സഹകരിച്ച എല്ലാവർക്കും പ്രസിഡന്റ് സി.പി. മുസ്തഫയും ജനറൽ സെക്രട്ടറി ശുഐബ് പനങ്ങാങ്ങരയും നന്ദി അറിയിച്ചു.
The post ഉത്തരേന്ത്യക്ക് തണലായി റിയാദ് കെഎംസിസി; ഒരാഴ്ചയ്ക്കുള്ളിൽ സമാഹരിച്ചത് 9 ലക്ഷം രൂപയും 3,000 പുതപ്പുകളും appeared first on Express Kerala.
