പുതിയ തലമുറ സുപ്രധാനമായ ഉത്തരവാദിത്തങ്ങൾ ഏറ്റെടുക്കണമെന്നും പഴയ തലമുറ അവർക്ക് വഴിമാറിക്കൊടുക്കണമെന്നും കേന്ദ്രമന്ത്രി നിതിൻ ഗഡ്കരി. രാഷ്ട്രീയമുൾപ്പെടെയുള്ള മേഖലകളിൽ തലമുറമാറ്റത്തെക്കുറിച്ചുള്ള ചർച്ചകൾ സജീവമാകുന്നതിനിടെയാണ് ഗഡ്കരിയുടെ ഈ ശ്രദ്ധേയമായ പ്രതികരണം. കാര്യങ്ങൾ സുഗമമായി നടന്നുതുടങ്ങുന്ന ഘട്ടത്തിൽ പുതിയ ആളുകൾക്ക് അവസരം നൽകുന്നത് പ്രസ്ഥാനങ്ങളുടെയും സ്ഥാപനങ്ങളുടെയും വളർച്ചയ്ക്ക് അനിവാര്യമാണെന്ന് അദ്ദേഹം ചൂണ്ടിക്കാട്ടി.
അസോസിയേഷൻ ഫോർ ഇൻഡസ്ട്രിയൽ ഡെവലപ്മെന്റ് (എഐഡി) സംഘടിപ്പിച്ച ‘അഡ്വാന്റേജ് വിദർഭ-ഖസ്ദർ ഔദ്യോഗിക മഹോത്സവ’ത്തിന്റെ ഭാഗമായുള്ള വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം. എഐഡി പ്രസിഡന്റ് ആശിഷ് കാലെയെ വേദിയിലിരുത്തിയായിരുന്നു അദ്ദേഹത്തിന്റെ പരാമർശം. തന്റെ സുഹൃത്തിന്റെ മകൻ കൂടിയായ ആശിഷിനെപ്പോലുള്ള യുവനേതൃത്വങ്ങൾ മുന്നോട്ടുവരണമെന്നും, പഴയ തലമുറയിലെ ആളുകൾ ക്രമേണ വിരമിക്കാനും ഉത്തരവാദിത്തങ്ങൾ കൈമാറാനും തയ്യാറാകണമെന്നും അദ്ദേഹം ഓർമ്മിപ്പിച്ചു.
Also Read: ഡൽഹിയിൽ ഭൂചലനം; പ്രഭവകേന്ദ്രം വടക്കൻ ഡൽഹി
നമ്മൾ പിൻവാങ്ങേണ്ട സമയം കൃത്യമായി മനസ്സിലാക്കണമെന്നാണ് ഗഡ്കരിയുടെ പക്ഷം. വാഹനം സുഗമമായി ഓടിത്തുടങ്ങിയാൽ അമരത്തുനിന്ന് മാറി മറ്റെന്തെങ്കിലും കാര്യങ്ങളിൽ ശ്രദ്ധ കേന്ദ്രീകരിക്കാൻ പഴയ തലമുറ തയ്യാറാകണം. ഈ വിട്ടുനൽകൽ പുതിയ തലമുറയ്ക്ക് കൂടുതൽ ആത്മവിശ്വാസം നൽകുമെന്നും ഗഡ്കരി പറഞ്ഞു.
The post രാഷ്ട്രീയത്തിൽ തലമുറമാറ്റം വേണം; ഉത്തരവാദിത്തങ്ങൾ പുതിയ തലമുറയ്ക്ക് കൈമാറണമെന്ന് നിതിൻ ഗഡ്കരി appeared first on Express Kerala.
