കോവിഡ് കാലത്ത് നിർത്തിവെച്ച തൃശ്ശൂർ-ഗുരുവായൂർ പാസഞ്ചർ ട്രെയിൻ സർവീസ് ഇന്ന് മുതൽ വീണ്ടും ആരംഭിക്കുന്നു. തിരുവനന്തപുരത്ത് വെച്ച് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യുന്ന അഞ്ച് ട്രെയിനുകളിൽ ഒന്നാണിത്. തൃശ്ശൂരിൽ നടക്കുന്ന ചടങ്ങിൽ കേന്ദ്ര റെയിൽവേ സഹമന്ത്രി വി. സോമണ്ണ പച്ചക്കൊടി വീശുന്നതോടെ രാവിലെ 10.45-ന് ട്രെയിൻ ഗുരുവായൂരിലേക്ക് യാത്ര തിരിക്കും. പൂങ്കുന്നം സ്റ്റേഷനിലെ സ്വീകരണത്തിന് ശേഷം 11.20-ഓടെ ട്രെയിൻ ഗുരുവായൂരിലെത്തും.
പുതുക്കിയ സമയക്രമം
പ്രതിദിനം രണ്ട് സർവീസുകളാണ് ഈ പാസഞ്ചറിന് ഉള്ളത്. പുതിയ സമയക്രമം അനുസരിച്ച് വൈകീട്ട് 6.10-ന് ഗുരുവായൂരിൽ നിന്ന് പുറപ്പെട്ട് തൃശ്ശൂരിലെത്തുകയും, രാത്രി 8.10-ന് അവിടെ നിന്ന് മടക്കയാത്ര ആരംഭിക്കുകയും ചെയ്യും. മുൻപ് വൈകീട്ട് 5.10-നും രാത്രി 7.10-നുമായിരുന്നു സർവീസുകൾ നിശ്ചയിച്ചിരുന്നത്. ഒരു മണിക്കൂർ വൈകിയുള്ള ഈ സമയമാറ്റം റെയിൽവേ ബോർഡിന്റെ തീരുമാനപ്രകാരമാണെന്ന് അധികൃതർ വ്യക്തമാക്കി.
Also Read: വികസന പദ്ധതികൾക്ക് തുടക്കം കുറിക്കാൻ പ്രധാനമന്ത്രി ഇന്ന് തലസ്ഥാനത്ത്; കനത്ത സുരക്ഷ
സമയമാറ്റത്തെക്കുറിച്ച് യാത്രക്കാർക്കിടയിൽ സമ്മിശ്ര പ്രതികരണമാണ് ഉയരുന്നത്. പഴയ 5.10 എന്ന സമയം സർക്കാർ ജീവനക്കാർക്ക് ഏറെ സൗകര്യപ്രദമായിരുന്നുവെന്നും ഇപ്പോൾ ഒരു മണിക്കൂർ കാത്തിരിക്കേണ്ടി വരുന്നത് പ്രയാസകരമാണെന്നും ഒരു വിഭാഗം പറയുന്നു. എന്നാൽ ഗുരുവായൂർ പരിസരത്ത് ജോലി ചെയ്യുന്നവർക്ക് പുതിയ സമയം ഗുണകരമാണെന്ന അഭിപ്രായവുമുണ്ട്. തൃശ്ശൂരിൽ നിന്നുള്ള മടക്കയാത്ര 8.10 എന്നത് കുറച്ചുകൂടി നേരത്തെയാക്കണമെന്ന ആവശ്യവും ഉയരുന്നുണ്ട്.
റോഡ് മാർഗ്ഗമുള്ള യാത്രയെ അപേക്ഷിച്ച് പാസഞ്ചർ ട്രെയിൻ വലിയ സാമ്പത്തിക ലാഭമാണ് യാത്രക്കാർക്ക് നൽകുന്നത്. ബസിൽ തൃശ്ശൂരിലേക്ക് പോകാൻ 35 രൂപയും ഒന്നേകാൽ മണിക്കൂറിലധികം സമയവും വേണ്ടിവരുമ്പോൾ, ട്രെയിനിൽ വെറും 10 രൂപയ്ക്ക് ലക്ഷ്യസ്ഥാനത്തെത്താം. രാത്രി 11.15-ന് മടങ്ങുന്ന തിരുവനന്തപുരം എഗ്മോർ എക്സ്പ്രസിന്റെ റാക്കുകളാണ് പകൽ സമയത്ത് പാസഞ്ചറായി ഓടിക്കുന്നത്. എസി കോച്ചുകൾ അടച്ചിട്ടായിരിക്കും ഈ സർവീസ് നടത്തുക.
The post തൃശ്ശൂർ – ഗുരുവായൂർ പാസഞ്ചർ പുനരാരംഭിക്കുന്നു; പ്രധാനമന്ത്രി ഇന്ന് ഉദ്ഘാടനം ചെയ്യും appeared first on Express Kerala.
