നിയമസഭയിൽ അവതരിപ്പിച്ച നയപ്രഖ്യാപന പ്രസംഗത്തിലെ തിരുത്തലുകളെച്ചൊല്ലി ഗവർണർ രാജേന്ദ്ര ആർലേക്കറും സംസ്ഥാന സർക്കാരും തമ്മിലുള്ള തർക്കം രൂക്ഷമാകുന്നു. നയപ്രഖ്യാപന ദിവസത്തെ സഭാ നടപടിക്രമങ്ങൾ പൂർണ്ണമായും വീഡിയോ സഹിതം കൈമാറണമെന്ന് ആവശ്യപ്പെട്ട് ഗവർണർ സ്പീക്കർ എ.എൻ. ഷംസീറിന് കത്തയച്ചു. വസ്തുതാവിരുദ്ധമായ പരാമർശങ്ങൾ ഉള്ളതിനാലാണ് പ്രസംഗത്തിന്റെ ചില ഭാഗങ്ങൾ താൻ ഒഴിവാക്കിയതെന്നും, താൻ വായിക്കാത്ത ഭാഗങ്ങൾ സഭാരേഖകളിൽ കൂട്ടിച്ചേർത്തത് നിയമപരമല്ലെന്നുമാണ് ഗവർണറുടെ വാദം.
മന്ത്രിസഭ അംഗീകരിച്ച പ്രസംഗത്തിൽ മാറ്റം വരുത്താൻ ഗവർണർക്ക് അധികാരമില്ലെന്ന ഉറച്ച നിലപാടിലാണ് സർക്കാർ. ഗവർണർ ഒഴിവാക്കിയ ഭാഗങ്ങൾ സഭാരേഖകളിൽ ഉൾപ്പെടുത്താൻ മുഖ്യമന്ത്രി പിണറായി വിജയൻ നിയമസഭയിൽ പ്രമേയം അവതരിപ്പിച്ചത് ഇതിന്റെ അടിസ്ഥാനത്തിലാണ്. പ്രസംഗിക്കാത്ത ഭാഗം നീക്കം ചെയ്യാൻ ഗവർണർ ആവശ്യപ്പെട്ടാൽ സർക്കാർ അത് പാലിക്കാൻ ബാധ്യസ്ഥമാണെന്ന് രാജ്ഭവന് നിയമോപദേശം ലഭിച്ചിട്ടുണ്ടെങ്കിലും, ഈ നിലപാടിൽ നിന്ന് പിന്നോട്ടില്ലെന്ന നിലപാടിലാണ് സർക്കാർ.
Also Read: കോൺഗ്രസിൽ അതൃപ്തി; ശശി തരൂർ ഇടതുപക്ഷത്തേക്ക്? ദുബായിൽ നിർണ്ണായക ചർച്ചകൾ നടക്കുമെന്ന് റിപ്പോർട്ട്
നയപ്രഖ്യാപന പ്രസംഗത്തിന്റെ കരട് അയച്ചപ്പോൾത്തന്നെ ഗവർണർ തിരുത്തലുകൾ നിർദ്ദേശിച്ചിരുന്നതായി രാജ്ഭവൻ വ്യക്തമാക്കുന്നു. ഇക്കാര്യം വ്യക്തമാക്കി ചീഫ് സെക്രട്ടറിക്ക് കത്തയച്ചിരുന്നെങ്കിലും, ഇത് മുഖ്യമന്ത്രിയുടെ ഓഫീസിനെ അറിയിക്കുന്നതിൽ ചീഫ് സെക്രട്ടറിയുടെ ഭാഗത്ത് വീഴ്ചയുണ്ടായെന്നാണ് രാജ്ഭവന്റെ വിലയിരുത്തൽ. ഭരണഘടനാപരമായ അധികാരങ്ങളെച്ചൊല്ലിയുള്ള ഈ പോരാട്ടം സർക്കാരും ഗവർണറും തമ്മിലുള്ള ബന്ധം കൂടുതൽ വഷളാക്കാൻ സാധ്യതയുണ്ട്.
The post നയപ്രഖ്യാപന വിവാദം! ഗവർണർ-സർക്കാർ പോര് മുറുകുന്നു; വീഡിയോ ദൃശ്യങ്ങൾ തേടി രാജ്ഭവൻ appeared first on Express Kerala.
