ഇന്ത്യയിലെ എസ്യുവി പ്രേമികൾ ആവേശത്തോടെ കാത്തിരുന്ന റെനോ ഡസ്റ്ററിന്റെ പുതിയ പതിപ്പ് റിപ്പബ്ലിക് ദിനമായ ഇന്ന് വിപണിയിൽ അവതരിപ്പിക്കും. 2012-ൽ ഇന്ത്യയിൽ ആദ്യമായി അവതരിപ്പിക്കപ്പെട്ട ഡസ്റ്റർ, രാജ്യത്തെ മിഡ്-സൈസ് എസ്യുവി വിപണിയിൽ വലിയ വിപ്ലവം സൃഷ്ടിച്ച മോഡലാണ്. റെനോയുടെ ‘ഇന്റർനാഷണൽ ഗെയിം പ്ലാൻ 2027’, ‘റെനോ റീത്തിങ്ക്’ എന്നീ പദ്ധതികളുടെ ഭാഗമായി ഇന്ത്യയിൽ പുറത്തിറക്കുന്ന ആദ്യ ഉൽപ്പന്നമാണിതെന്ന പ്രത്യേകതയും പുതിയ തലമുറ ഡസ്റ്ററിനുണ്ട്.
ആധുനിക ഡിസൈനും സവിശേഷതകളും
പഴയ പാരമ്പര്യം നിലനിർത്തിക്കൊണ്ടുതന്നെ കൂടുതൽ ആധുനികമായ ഡിസൈനിലും സാങ്കേതികവിദ്യയിലുമാണ് പുതിയ ഡസ്റ്റർ എത്തുന്നത്. ആഗോള പതിപ്പിൽ നിന്ന് വ്യത്യസ്തമായി ഇന്ത്യൻ വിപണിക്കായി ചില പ്രത്യേക മാറ്റങ്ങൾ വാഹനത്തിൽ വരുത്തിയിട്ടുണ്ട്. പിൻവശത്തെ എൽഇഡി ലൈറ്റ് ബാർ, ഇന്റഗ്രേറ്റഡ് ടേൺ ഇൻഡിക്കേറ്ററുകളോടു കൂടിയ പുതിയ എൽഇഡി ഡിആർഎല്ലുകൾ, റൂഫ് റെയിലുകൾ, ആകർഷകമായ അലോയ് വീലുകൾ എന്നിവ വാഹനത്തിന്റെ പുറംമോടിക്ക് കരുത്ത് പകരുന്നു.
Also Read: കേന്ദ്രത്തിന്റെ കടുത്ത ഗതാഗത നിയമങ്ങൾ കേരളത്തിൽ ഉടൻ നടപ്പാക്കില്ല; മന്ത്രി ഗണേഷ് കുമാർ
പ്രതീക്ഷിക്കുന്ന ഇന്റീരിയർ സൗകര്യങ്ങളും വിപണിയിലെ മത്സരവും
യാത്രക്കാർക്ക് കൂടുതൽ സൗകര്യങ്ങൾ ഉറപ്പാക്കുന്ന പ്രീമിയം ഇന്റീരിയറാണ് വാഹനത്തിൽ പ്രതീക്ഷിക്കുന്നത്. ഫ്രീ-സ്റ്റാൻഡിംഗ് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, വയർലെസ് ചാർജർ, 360 ഡിഗ്രി ക്യാമറ, ഇലക്ട്രിക് സൺറൂഫ്, ഇലക്ട്രിക് പാർക്കിംഗ് ബ്രേക്ക് തുടങ്ങിയ അത്യാധുനിക ഫീച്ചറുകൾ വാഹനത്തിലുണ്ടാകും. വിപണിയിലെത്തിയാൽ ഹ്യുണ്ടായ് ക്രെറ്റ, കിയ സെൽറ്റോസ്, മാരുതി ഗ്രാൻഡ് വിറ്റാര തുടങ്ങിയ വമ്പൻമാരുമായാണ് ഡസ്റ്റർ പ്രധാനമായും മത്സരിക്കുക.
The post ഡസ്റ്റർ തിരിച്ചെത്തുന്നു; പുത്തൻ ലുക്കിലും കരുത്തിലും റെനോ ഡസ്റ്റർ ഇന്ന് വിപണിയിലേക്ക് appeared first on Express Kerala.
