ഭംഗി കണ്ട് മയങ്ങരുത്, ഈ ‘കൊച്ചു സുന്ദരൻ’ ഒരൊന്നൊന്നര വില്ലനാണ്; ആന്റി വെനം പോലുമില്ലാത്ത മാരക വിഷം!

കടലിലെ ഈ സുന്ദരൻ ഒച്ചിനെ കണ്ടാൽ ആരും ഒന്ന് കൈയ്യിലെടുക്കാൻ ആഗ്രഹിച്ചുപോകും, എന്നാൽ ആ മോഹം ചിലപ്പോൾ നിങ്ങളുടെ ജീവൻ തന്നെ എടുത്തേക്കാം. കടൽത്തീരത്തുകൂടെ നടക്കുമ്പോൾ മനോഹരമായ ഡിസൈനുകളുള്ള ‘ടെക്‌സ്റ്റൈൽ കോൺ സ്‌നെയിൽ’ എന്ന ഈ കടൽ ഒച്ചിനെ കണ്ടാൽ അറിയാതെ പോലും തൊടരുത്. സാവധാനത്തിൽ ചലിക്കുന്ന ഇത്തിരിക്കുഞ്ഞനായ ഈ ജീവി ഇത്രത്തോളം അപകടകാരിയാണെന്ന് കണ്ടാൽ ഒരിക്കലും തോന്നില്ല. എന്നാൽ പ്രകൃതി ഇവന് നൽകിയിരിക്കുന്നത് മനുഷ്യഹൃദയത്തെപ്പോലും നിമിഷങ്ങൾക്കുള്ളിൽ നിശ്ചലമാക്കാൻ ശേഷിയുള്ള മാരകമായ വിഷമാണ്.

ചൂടുള്ള കടൽവെള്ളത്തിലും പവിഴപ്പുറ്റുകൾക്കിടയിലുമാണ് ഇവ പ്രധാനമായും വസിക്കുന്നത്. വളരെ സാവധാനം സഞ്ചരിക്കുന്നവരാണെങ്കിലും വേട്ടയുടെ കാര്യത്തിൽ ഇവർ അതിസമർത്ഥരാണ്. ഇരയുടെ പുറകെ ഓടിപ്പോകുന്നതിന് പകരം ഒരിടത്ത് ഒളിഞ്ഞിരുന്ന് ഇരയെ വരുതിയിലാക്കുന്നതാണ് ഇവരുടെ ശൈലി. ‘റാഡുല’ എന്ന് വിളിക്കുന്ന അമ്പ് പോലെയുള്ള പല്ലുകൾ ഉപയോഗിച്ചാണ് ഇവർ ആക്രമിക്കുന്നത്. ഇരയുടെ ശരീരത്തിലേക്ക് സെക്കൻഡുകൾക്കുള്ളിൽ വിഷം കുത്തിവയ്ക്കാൻ ഈ പല്ലുകൾക്ക് കഴിയും. നാഡീവ്യവസ്ഥയെ തളർത്തുന്ന ‘കോണാടോക്‌സിൻസ്’ എന്ന അതിശക്തമായ ന്യൂറോ ടോക്‌സിനാണ് ഇവരുടെ ആയുധം. ഇരയ്ക്ക് പ്രതികരിക്കാൻ പോലും സമയം നൽകാതെ നിമിഷങ്ങൾക്കുള്ളിൽ അവയെ കീഴടക്കാൻ ഈ വിഷത്തിന് സാധിക്കും.

Also Read: വീട്ടിലുണ്ടാക്കാം മനം നിറയ്ക്കും മധുരം; സിമ്പിളായി ഒരു കസ്റ്റാർഡ് ഫ്രൂട്ട് സാലഡ്!

ഈ വിഷത്തെക്കുറിച്ച് വർഷങ്ങളോളം പഠനം നടത്തിയ ഗവേഷകർ കോൺ സ്‌നെയിലുകളെ ‘പ്രകൃതിയിലെ കെമിക്കൽ എൻജിനീയർമാർ’ എന്നാണ് വിശേഷിപ്പിക്കുന്നത്. ഇവയുടെ വിഷം അത്യന്തം അപകടകാരിയാണെങ്കിലും വൈദ്യശാസ്ത്ര രംഗത്ത് ഇവ വലിയ പ്രതീക്ഷയാണ് നൽകുന്നത്. അതിശക്തമായ വേദനസംഹാരികളിലും നാഡീസംബന്ധമായ ചികിത്സകളിലും ഈ വിഷത്തിലെ ഘടകങ്ങൾ പരീക്ഷണാടിസ്ഥാനത്തിൽ ഉപയോഗിക്കുന്നുണ്ട്. എങ്കിലും മനുഷ്യശരീരത്തിൽ ഈ വിഷമേറ്റാൽ അത് വലിയ പ്രത്യാഘാതങ്ങൾ ഉണ്ടാക്കും. പേശികൾ തളരുക, മരവിപ്പ്, ശ്വാസംമുട്ടൽ എന്നിവയാണ് പ്രധാന ലക്ഷണങ്ങൾ. ഏറ്റവും ഭയാനകമായ കാര്യം, ഈ വിഷത്തെ പ്രതിരോധിക്കാനുള്ള ആന്റി വെനം ഇതുവരെ കണ്ടെത്തിയിട്ടില്ല എന്നതാണ്.

കടൽത്തീരങ്ങളിൽ നിന്ന് മനോഹരമായ കക്കകളും ചിപ്പികളും ശേഖരിക്കുന്നവർ വളരെയധികം ശ്രദ്ധിക്കേണ്ടതുണ്ട്. ടെക്‌സ്റ്റൈൽ കോൺ സ്‌നെയിലിന്റെ പുറംതോട് വളരെ ആകർഷകമായതിനാൽ പലരും ഇത് കയ്യിലെടുക്കാറുണ്ട്. എന്നാൽ തോടിനുള്ളിൽ ഒച്ച് ജീവനോടെ ഇരിപ്പുണ്ടെങ്കിൽ അത് വലിയ അപകടത്തിന് വഴിവെക്കും. വംശനാശ ഭീഷണി നേരിടുന്നില്ലെങ്കിലും മലിനീകരണവും ആവാസവ്യവസ്ഥയുടെ നാശവും ഈ ജീവികളുടെ നിലനിൽപ്പിനെ ബാധിക്കുന്നുണ്ട്. അതുകൊണ്ട് കടൽത്തീരത്തെ ഈ കുഞ്ഞൻ സുന്ദരന്മാരെ അകലെ നിന്ന് കണ്ട് ആസ്വദിക്കുന്നതാണ് എപ്പോഴും സുരക്ഷിതം.

The post ഭംഗി കണ്ട് മയങ്ങരുത്, ഈ ‘കൊച്ചു സുന്ദരൻ’ ഒരൊന്നൊന്നര വില്ലനാണ്; ആന്റി വെനം പോലുമില്ലാത്ത മാരക വിഷം! appeared first on Express Kerala.