ആറ് പതിറ്റാണ്ട് പഴക്കമുള്ള ആദായനികുതി നിയമങ്ങൾ ചരിത്രമാകുന്നു. 1961-ലെ നിയമത്തിന് പകരം ലളിതവും സാങ്കേതികവിദ്യയിൽ അധിഷ്ഠിതവുമായ പുതിയ ആദായനികുതി നിയമം ഈ വർഷം ഇന്ത്യയിൽ നടപ്പിലാക്കാൻ ഒരുങ്ങുന്നു. നികുതിദായകർക്ക് നിയമങ്ങൾ എളുപ്പത്തിൽ മനസ്സിലാക്കാനും തർക്കങ്ങൾ കുറയ്ക്കാനും ലക്ഷ്യമിട്ടാണ് ഈ സമഗ്രമായ പുനഃക്രമീകരണം.
ഇനി ഒറ്റ വർഷം മാത്രം; ‘നികുതി വർഷം’
നിലവിൽ നികുതിദായകരെ കുഴപ്പിക്കുന്ന ‘മുൻ വർഷം’, ‘അസസ്മെന്റ് വർഷം’ എന്നീ രണ്ട് വ്യത്യസ്ത കാലയളവുകൾക്ക് പകരം ഇനി ഒരു ‘നികുതി വർഷം’ മാത്രമായിരിക്കും ഉണ്ടാവുക. വരുമാനവും നികുതി കണക്കാക്കലും ഒരേ കാലയളവിൽ തന്നെ വരുന്നത് സാധാരണക്കാർക്കും ബിസിനസുകൾക്കും വലിയ ആശ്വാസമാകും.
Also Read: ചൈനീസ് വിപണിയിൽ വെള്ളി വിപ്ലവം! ആഗോള വിപണി പിന്നിൽ; കുതിക്കുന്ന വിലയ്ക്ക് പിന്നിലെ രഹസ്യം?
പുതിയ നമ്പറുകൾ, പുതിയ ക്രമീകരണം
നിയമത്തിലെ സെക്ഷനുകൾ പൂർണ്ണമായും പുനഃക്രമീകരിച്ചു. ഉദാഹരണത്തിന്, നിക്ഷേപകർക്ക് സുപരിചിതമായ സെക്ഷൻ 80C ഇനി മുതൽ സെക്ഷൻ 123 എന്നറിയപ്പെടും. തുടക്കത്തിൽ ചെറിയ പ്രയാസങ്ങൾ തോന്നാമെങ്കിലും ദീർഘകാലാടിസ്ഥാനത്തിൽ നിയമം കൂടുതൽ ലളിതമായി വായിച്ചു മനസ്സിലാക്കാൻ ഇത് സഹായിക്കും.
ഡിജിറ്റൽ-ഫസ്റ്റ്; മനുഷ്യ ഇടപെടൽ കുറയും
പുതിയ നിയമം സാങ്കേതികവിദ്യയ്ക്ക് മുൻഗണന നൽകുന്നു. നികുതി നിർണ്ണയം മുതൽ റീഫണ്ടുകൾ വരെ മുഖരഹിതമായി നടക്കും. ഉദ്യോഗസ്ഥരുമായുള്ള നേരിട്ടുള്ള സമ്പർക്കം കുറയ്ക്കുന്നതിലൂടെ അഴിമതി തടയാനും നടപടികൾ വേഗത്തിലാക്കാനും സുതാര്യത ഉറപ്പാക്കാനും സാധിക്കും.
ക്രിപ്റ്റോയും ആഗോള വരുമാനവും
ഡിജിറ്റൽ ആസ്തികൾ, വിദേശ വരുമാനം എന്നിവയുമായി ബന്ധപ്പെട്ട നിയമങ്ങളിൽ പുതിയ നികുതി വ്യവസ്ഥ കൂടുതൽ വ്യക്തത നൽകുന്നുണ്ട്. പുതിയ കാലത്തെ വരുമാന സ്രോതസ്സുകളെ കൃത്യമായി നിർവചിക്കുന്നതിലൂടെ നികുതിദായകർക്കുണ്ടാകുന്ന അനിശ്ചിതത്വങ്ങൾ ഒഴിവാക്കാനാകും.
The post ഇനി ആദായനികുതി അടയ്ക്കാൻ തലപുകയ്ക്കേണ്ട! പുതിയ നിയമം വരുന്നു; മാറ്റങ്ങൾ അറിയാം appeared first on Express Kerala.
