മലയാള സിനിമയിലെ എക്കാലത്തെയും വലിയ ക്രൈം ത്രില്ലർ വിസ്മയം ‘ദൃശ്യം’ ടീം വീണ്ടും ഒന്നിക്കുന്നു. ആരാധകർ ഏറെ ആകാംക്ഷയോടെ കാത്തിരിക്കുന്ന ‘ദൃശ്യം 3’ ഏപ്രിൽ 2-ന് തിയേറ്ററുകളിൽ എത്താനിരിക്കെ, അതിന് മുന്നോടിയായി ജീത്തു ജോസഫും മീനയും മറ്റൊരു ത്രില്ലർ പ്രോജക്റ്റിലൂടെ പ്രേക്ഷകരിലേക്ക് എത്തുകയാണ്. ഇത്തവണ ഒരു സിനിമയ്ക്ക് പകരം വെബ് സീരീസിലൂടെയാണ് ഈ ഹിറ്റ് കൂട്ടുകെട്ടിന്റെ മടങ്ങിവരവ്. ‘റോസ്ലിൻ’ എന്ന് പേരിട്ടിരിക്കുന്ന ഈ ഇൻവെസ്റ്റിഗേറ്റീവ് ത്രില്ലർ സീരീസിന്റെ ഷോ റണ്ണറായി ജീത്തു ജോസഫ് എത്തുമ്പോൾ, മീനയും വിനീതും പ്രധാന വേഷങ്ങളിൽ അണിനിരക്കുന്നു.
Also Read: വീടിന്റെ ഓർമ്മകളുമായി ‘വലതുവശത്തെ കള്ളൻ’! ഗാനം പുറത്ത്
സുമേഷ് നന്ദകുമാർ സംവിധാനം ചെയ്യുന്ന ‘റോസ്ലിൻ’ ജിയോ ഹോട്ട്സ്റ്റാറിലൂടെയാണ് റിലീസ് ചെയ്യുന്നത്. സഞ്ജന ദീപു അവതരിപ്പിക്കുന്ന റോസ്ലിൻ എന്ന കൗമാരക്കാരിയെ ഒരു അപരിചിതൻ പിന്തുടരുന്നതായി തുടർച്ചയായി കാണുന്ന ദുസ്വപ്നങ്ങളും, അത് അവളുടെ കുടുംബത്തിലുണ്ടാക്കുന്ന അപ്രതീക്ഷിത സംഭവങ്ങളുമാണ് സീരീസിന്റെ ഇതിവൃത്തം. വിനായക് ശശികുമാർ തിരക്കഥയൊരുക്കുന്ന ഈ സിരീസിൽ ഹക്കിം ഷായും ശ്രദ്ധേയമായ ഒരു കഥാപാത്രത്തെ അവതരിപ്പിക്കുന്നുണ്ട്. ജിയോ ഹോട്ട്സ്റ്റാറിന്റെ ഈ വർഷത്തെ ആദ്യ മലയാളം ഒറിജിനൽ സീരീസായിരിക്കും ഇത്.
ഈ വർഷം ഫെബ്രുവരിയിലോ മാർച്ചിലോ ‘റോസ്ലിൻ’ പ്രേക്ഷകരിലേക്ക് എത്തുമെന്നാണ് റിപ്പോർട്ടുകൾ സൂചിപ്പിക്കുന്നത്. ജിയോ ഹോട്ട്സ്റ്റാർ നേരത്തെ പ്രഖ്യാപിച്ച അഞ്ച് മലയാളം സീരീസുകളിൽ രണ്ടാമത്തേതാണ് ഈ പ്രോജക്റ്റ്. നിവിൻ പോളിയുടെ ‘ഫാർമ’യ്ക്ക് ശേഷം എത്തുന്ന റോസ്ലിന് പുറമെ, ‘കേരള ക്രൈം ഫയൽസ് സീസൺ 3’, ‘1000 ബേബീസ് സീസൺ 2’, മിഥുൻ മാനുവൽ തോമസിന്റെ ‘അണലി’ എന്നിവയും റിലീസിനായി അണിയറയിൽ ഒരുങ്ങുന്നുണ്ട്. ‘ദൃശ്യം 3’ റിലീസിന് മുൻപേ എത്തുന്ന ജീത്തു ജോസഫ് ടച്ച് ഉള്ള ഈ സീരീസ് ത്രില്ലർ പ്രേമികൾക്ക് വലിയൊരു വിരുന്നായിരിക്കും.
The post ‘ദൃശ്യം 3’ക്ക് മുൻപേ ജീത്തു ജോസഫ്-മീന കൂട്ടുകെട്ട്; വരുന്നത് പുതിയ ഇൻവെസ്റ്റിഗേറ്റീവ് ത്രില്ലർ! appeared first on Express Kerala.
