മഹാരാഷ്ട്ര രാഷ്ട്രീയത്തിലെ അധികാര സമവാക്യങ്ങളെ അപ്രതീക്ഷിതമായി മാറ്റിമറിക്കാൻ ശേഷിയുണ്ടായിരുന്ന പടക്കുതിര അജിത് പവാറിന്റെ വിയോഗം രാജ്യത്തെ ഞെട്ടിച്ചിരിക്കുകയാണ്. ബാരാമതിയിൽ നടന്ന ദാരുണമായ വിമാനാപകടത്തിൽ ഉപമുഖ്യമന്ത്രി അന്തരിക്കുമ്പോൾ, ഒരു രാഷ്ട്രീയ യുഗത്തിന് കൂടിയാണ് അവിടെ തിരശ്ശീല വീഴുന്നത്. ഇന്ന് രാവിലെ 8.45-ഓടെയാണ് ഇന്ത്യയെ നടുക്കിയ ആ വാർത്ത പുറത്തുവന്നത്. ഒരു പൊതുറാലിയിൽ പങ്കെടുക്കാനായി മുംബൈയിൽ നിന്നും തന്റെ തട്ടകമായ ബാരാമതിയിലേക്ക് വരികയായിരുന്നു അദ്ദേഹം.
വിമാനം ലാൻഡ് ചെയ്യാൻ വെറും 25 മിനിറ്റ് മാത്രം ബാക്കിയുള്ളപ്പോഴാണ് സാങ്കേതിക തകരാർ സംഭവിച്ചത്. പൈലറ്റ് വിമാനം സുരക്ഷിതമായി വയലിൽ ഇടിച്ചിറക്കാൻ ശ്രമിച്ചെങ്കിലും നിയന്ത്രണം വിട്ട് തകർന്നു വീഴുകയും നിമിഷങ്ങൾക്കുള്ളിൽ കത്തിയമരുകയുമായിരുന്നു. ഗുരുതരമായി പരിക്കേറ്റ അജിത് പവാറിനെ ഉടൻ തന്നെ ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു. അദ്ദേഹത്തോടൊപ്പം വിമാനത്തിലുണ്ടായിരുന്ന അഞ്ച് സഹയാത്രികരും ഈ അപകടത്തിൽ ദാരുണമായി കൊല്ലപ്പെട്ടു.
Also Read: തരൂരിനെ ചേർത്തുപിടിക്കാൻ രാഹുൽ! ഡൽഹിയിൽ ഇന്ന് നിർണ്ണായക കൂടിക്കാഴ്ച; കോൺഗ്രസിലെ പോര് അവസാനിക്കുമോ?
1959-ൽ അഹമ്മദ്നഗറിൽ ജനിച്ച അജിത് പവാർ 1982-ൽ സഹകരണ മേഖലയിലൂടെയാണ് തന്റെ രാഷ്ട്രീയ യാത്ര ആരംഭിക്കുന്നത്. ശരദ് പവാറിന്റെ രാഷ്ട്രീയ പിൻഗാമിയായി വളർന്ന അദ്ദേഹം ബാരാമതിയിലെ ജനങ്ങളുടെ പ്രിയപ്പെട്ട ‘അജിത് ദാദ’ ആയി മാറി. 1991-ൽ പാർലമെന്റിലേക്ക് തിരഞ്ഞെടുക്കപ്പെട്ടെങ്കിലും ശരദ് പവാറിന് വേണ്ടി ആ സ്ഥാനം ഒഴിഞ്ഞുകൊടുത്ത് അദ്ദേഹം മാതൃക കാട്ടി. മഹാരാഷ്ട്രയുടെ ചരിത്രത്തിൽ ഏറ്റവും കൂടുതൽ തവണ ഉപമുഖ്യമന്ത്രി പദവി അലങ്കരിച്ച ഏക വ്യക്തി എന്ന അപൂർവ്വ ബഹുമതിയും അജിത് പവാറിന് സ്വന്തമാണ്.
രാഷ്ട്രീയത്തിലെ ചാണക്യ തന്ത്രങ്ങൾ പയറ്റുന്നതിൽ അജിത് പവാർ എന്നും മുൻപന്തിയിലായിരുന്നു. 2019-ൽ നടന്ന സത്യപ്രതിജ്ഞാ ചടങ്ങിലൂടെ ബി.ജെ.പി സർക്കാരിനൊപ്പം ചേർന്ന് ഉപമുഖ്യമന്ത്രിയായതും, പിന്നീട് 2023-ൽ എൻ.സി.പി പിളർത്തി ഷിൻഡെ-ഫഡ്നാവിസ് സർക്കാരിന്റെ ഭാഗമായതും ഇന്ത്യൻ രാഷ്ട്രീയത്തിലെ വൻ അട്ടിമറികളായാണ് കണക്കാക്കപ്പെടുന്നത്. ഏറ്റവും ഒടുവിൽ ദേവേന്ദ്ര ഫഡ്നാവിസ് സർക്കാരിൽ ഉപമുഖ്യമന്ത്രിയായി ഭരണപരമായ കാര്യങ്ങളിൽ സജീവമായിരിക്കെയാണ് മരണം വിമാന അപകടത്തിന്റെ രൂപത്തിൽ അദ്ദേഹത്തെ തേടിയെത്തിയത്. മഹാരാഷ്ട്രയുടെ വികസന പ്രവർത്തനങ്ങളിലും സഹകരണ പ്രസ്ഥാനങ്ങളിലും അദ്ദേഹം നൽകിയ സംഭാവനകൾ സമാനതകളില്ലാത്തതാണ്. അദ്ദേഹത്തിന്റെ വിയോഗം മഹാരാഷ്ട്രയിലെ ഭരണകക്ഷിക്കും വ്യക്തിപരമായ വലിയൊരു ശൂന്യതയാണ് സൃഷ്ടിച്ചിരിക്കുന്നത്.
The post ‘അജിത് ദാദ’ ഇനി ഓർമ്മ! വിമാനാപകടം കവർന്നത് രാഷ്ട്രീയത്തിലെ അതികായനെ… appeared first on Express Kerala.
