രണ്ടാം പിണറായി സര്ക്കാരിന്റെ അവസാന ബജറ്റ് വമ്പൻ പ്രഖ്യാപനങ്ങളിലൂടെ ശ്രദ്ധേയമായിരിക്കുകയാണ്. ധനമന്ത്രി കെ.എൻ. ബാലഗോപാൽ നിയമസഭയിൽ അവതരിപ്പിച്ച ബജറ്റിൽ അടിസ്ഥാന സൗകര്യ വികസനത്തിനും ജനങ്ങളുടെ ആരോഗ്യ-സാമൂഹിക ക്ഷേമത്തിനും തുല്യ പ്രാധാന്യമാണ് നൽകിയിരിക്കുന്നത്. കേന്ദ്ര അവഗണനകൾക്കിടയിലും സംസ്ഥാനം വികസന പാതയിൽ തളരാതെ മുന്നോട്ട് പോകുമെന്ന ഉറച്ച പ്രഖ്യാപനമാണ് ഈ ബജറ്റ്.
സാമൂഹിക സുരക്ഷയ്ക്കും സേവന മേഖലയിലുള്ളവരുടെ ക്ഷേമത്തിനും വലിയ മുൻഗണന നൽകുന്ന പ്രഖ്യാപനങ്ങളാണ് ബജറ്റിലുള്ളത്. ഇതിന്റെ ഭാഗമായി ക്ഷേമ പെൻഷനുകൾ ഘട്ടം ഘട്ടമായി ഉയർത്തുമെന്നും ഇതിനായി അടുത്ത സാമ്പത്തിക വർഷത്തേക്ക് 14,500 കോടി രൂപ വകയിരുത്തിയതായും ധനമന്ത്രി അറിയിച്ചു. സേവന രംഗത്തെ മുന്നണി പോരാളികളായ ആശാ വർക്കർമാർക്കും അങ്കണവാടി വർക്കർമാർക്കും ഓണറേറിയത്തിൽ 1000 രൂപയുടെ വർദ്ധനവും അങ്കണവാടി ഹെൽപ്പർമാർക്ക് 500 രൂപയുടെ വർദ്ധനവും പ്രഖ്യാപിച്ചു. കൂടാതെ, സാക്ഷരതാ പ്രേരക്മാർക്ക് പ്രതിമാസം 1000 രൂപയുടെ വർദ്ധനവ് അനുവദിച്ചതിനൊപ്പം, സർക്കാർ ജീവനക്കാരുടെ ഏറെ നാളായുള്ള ഡിഎ കുടിശ്ശിക പരിഹരിക്കാൻ കൃത്യമായ നടപടികൾ സ്വീകരിക്കുമെന്നും ധനമന്ത്രി ഉറപ്പുനൽകി.
പ്രാദേശിക ഭരണകൂടങ്ങളെ ശാക്തീകരിക്കുന്നതിനും ജനകീയ സേവനങ്ങൾ മെച്ചപ്പെടുത്തുന്നതിനുമായി വിപുലമായ പദ്ധതികളാണ് ബജറ്റിൽ വിഭാവനം ചെയ്തിരിക്കുന്നത്. തദ്ദേശ സ്വയംഭരണ സ്ഥാപനങ്ങൾക്കായി 3236.76 കോടി രൂപ ജനറൽ പർപ്പസ് ഫണ്ടായി വകയിരുത്തി. കൂടാതെ, സംസ്ഥാന പദ്ധതി വിഹിതത്തിന്റെ 28.5 ശതമാനവും തദ്ദേശ സ്ഥാപനങ്ങൾക്ക് ലഭ്യമാക്കും. ഖരമാലിന്യ സംസ്കരണത്തിന് പ്രത്യേക വിഹിതം അനുവദിച്ചതിനൊപ്പം, നികുതി വരുമാനം വർദ്ധിപ്പിക്കുന്ന തദ്ദേശ സ്ഥാപനങ്ങൾക്ക് പ്രത്യേക പ്രോത്സാഹനവും വാഗ്ദാനം ചെയ്യുന്നു. ജനപ്രതിനിധികളുടെ ഓണറേറിയം വർദ്ധിപ്പിച്ചതും വയോജന സംരക്ഷണത്തിനായി പ്രത്യേക ‘എൽഡർലി ബജറ്റ്’ പ്രഖ്യാപിച്ചതും സാമൂഹിക പ്രതിബദ്ധതയുടെ അടയാളങ്ങളാണ്. തൊഴിലന്വേഷകർക്ക് പുതുവഴികൾ തുറക്കുന്ന ‘കണക്ട് ടു വർക്ക്’ പദ്ധതിക്കായി 400 കോടി രൂപയും ധനമന്ത്രി മാറ്റിവെച്ചു.
പ്രാദേശിക വികസനത്തിനും അധികാര വികേന്ദ്രീകരണത്തിനും വലിയ മുൻഗണന നൽകിക്കൊണ്ട് സംസ്ഥാന പദ്ധതി വിഹിതത്തിന്റെ 28.5 ശതമാനം തദ്ദേശ സ്വയംഭരണ സ്ഥാപനങ്ങൾക്കായി ബജറ്റ് മാറ്റിവെച്ചു. ആകെ 10,189 കോടി രൂപയാണ് ഇതിനായി വകയിരുത്തിയത്. ജനകീയ ആസൂത്രണത്തിന്റെ കരുത്തിൽ തദ്ദേശ സ്ഥാപനങ്ങളെ കൂടുതൽ ശക്തമാക്കാനും ഗ്രാമ-നഗര വ്യത്യാസമില്ലാതെ അടിസ്ഥാന സൗകര്യങ്ങൾ വികസിപ്പിക്കാനും ഈ വലിയ വിഹിതം സഹായകമാകും.
വയനാട് ഉരുൾപൊട്ടൽ ദുരന്തബാധിതരുടെ പുനരധിവാസം അതിവേഗം പൂർത്തിയാക്കുമെന്ന പ്രഖ്യാപനമാണ് ഈ ബജറ്റിലെ ഏറ്റവും ആശ്വാസകരമായ വാർത്ത. ഇതിന്റെ ഭാഗമായി നിർമ്മാണം പൂർത്തിയാക്കിയ ആദ്യ ബാച്ച് വീടുകൾ ഫെബ്രുവരി മൂന്നാം വാരത്തോടെ കൈമാറും. ദുരന്തത്തിൽ എല്ലാം നഷ്ടപ്പെട്ടവർക്ക് പുതിയ ജീവിതം പടുത്തുയർത്താൻ സർക്കാർ ഒപ്പമുണ്ടെന്ന ഉറച്ച സന്ദേശമാണ് ഈ പ്രഖ്യാപനത്തിലൂടെ ധനമന്ത്രി നൽകിയത്. പുനരധിവാസ പ്രവർത്തനങ്ങളുടെ പുരോഗതി കൃത്യമായി നിരീക്ഷിച്ചുകൊണ്ട് സമയബന്ധിതമായി വീടുകൾ പൂർത്തിയാക്കുന്നത് സർക്കാരിന്റെ പ്രധാന മുൻഗണനയാണെന്നും അദ്ദേഹം വ്യക്തമാക്കി.
നവകേരളത്തിന്റെ കരുത്തുറ്റ വളർച്ചാമാതൃകകളെ സാക്ഷ്യപ്പെടുത്തുന്നതായിരുന്നു ബജറ്റിലെ വികസനരേഖകൾ. ചൈനയ്ക്ക് ശേഷം ലോകത്ത് ആദ്യമായി അതിദാരിദ്ര്യ വിമുക്ത പരിപാടി നടപ്പിലാക്കിയ പ്രദേശം എന്ന ഖ്യാതിക്കൊപ്പം, അമേരിക്കയെപ്പോലെയുള്ള വികസിത രാജ്യങ്ങളേക്കാൾ കുറഞ്ഞ ശിശുമരണ നിരക്ക് എന്ന ചരിത്രനേട്ടവും കേരളം സ്വന്തമാക്കി. മുഖ്യമന്ത്രി പിണറായി വിജയന്റെ ഉറച്ച ഇച്ഛാശക്തിയുടെ ഫലമായി ദേശീയപാത വികസനം സംസ്ഥാനത്ത് അതിദ്രുതം പൂർത്തിയാവുകയാണ്. ഒപ്പം, കെഎസ്ആർടിസിയിൽ ശമ്പളം മുടങ്ങില്ലെന്ന ഉറപ്പും സമാനതകളില്ലാത്ത വ്യവസായ വളർച്ചയും ബജറ്റ് അടിവരയിടുന്നു. പ്രതിസന്ധികൾക്കിടയിലും കേരളം കൈവരിച്ച ഈ നേട്ടങ്ങൾ വികസിത രാജ്യങ്ങളോട് കിടപിടിക്കുന്നതാണെന്ന് ധനമന്ത്രി ഓർമ്മിപ്പിച്ചു.
കേരള രാഷ്ട്രീയത്തിലെ ഇതിഹാസ തുല്യനായ മുൻ മുഖ്യമന്ത്രി വി.എസ്. അച്യുതാനന്ദന്റെ സ്മരണാർത്ഥം തിരുവനന്തപുരത്ത് ‘വി.എസ്. സെന്റർ’ സ്ഥാപിക്കുമെന്ന പ്രഖ്യാപനം ഈ ബജറ്റിലെ വൈകാരികവും ശ്രദ്ധേയവുമായ ഒന്നാണ്. ഇതിനായി 20 കോടി രൂപ ധനമന്ത്രി കെ.എൻ. ബാലഗോപാൽ വകയിരുത്തി. വി.എസ്സിന്റെ ഐതിഹാസികമായ പോരാട്ട ജീവിതവും നിലപാടുകളും പുതുതലമുറയ്ക്ക് പകർന്നുനൽകുക എന്ന ലക്ഷ്യത്തോടെയാണ് ഈ കേന്ദ്രം ആരംഭിക്കുന്നതെന്ന് ബജറ്റ് പ്രസംഗത്തിൽ പ്രത്യേകം പരാമർശിച്ചു.
കേരളത്തിന്റെ ഗതാഗത മേഖലയിൽ വൻ വിപ്ലവം ലക്ഷ്യമിട്ട്, കെ-റെയിലിന് പകരമായി ആര്ആര്ടിഎസ് (RRTS) അതിവേഗ പാത സര്ക്കാര് പ്രഖ്യാപിച്ചു. നഗരങ്ങളിലെ മെട്രോ ശൃംഖലകളെ തമ്മിൽ ബന്ധിപ്പിച്ചുകൊണ്ട് നാല് ഘട്ടങ്ങളിലായി നടപ്പിലാക്കുന്ന ഈ പദ്ധതിക്ക് വലിയ പ്രാധാന്യമാണ് ബജറ്റിലുള്ളത്. അതിവേഗ യാത്ര ഉറപ്പാക്കുന്ന ഈ പാതയുടെ പ്രാരംഭ പ്രവര്ത്തനങ്ങള്ക്കായി 100 കോടി രൂപ വകയിരുത്തി. പദ്ധതിയുടെ പേരിലോ സാങ്കേതിക വിദ്യയിലോ തങ്ങൾക്ക് പിടിവാശിയില്ലെന്നും, സംസ്ഥാനത്തിന്റെ തെക്ക്-വടക്ക് കണക്റ്റിവിറ്റി മെച്ചപ്പെടുത്തുകയാണ് ലക്ഷ്യമെന്നും ധനമന്ത്രി ബജറ്റ് പ്രസംഗത്തിൽ വ്യക്തമാക്കി.
തൊഴിലുറപ്പ് പദ്ധതിയുടെ കാര്യത്തിൽ കേന്ദ്ര സർക്കാർ സ്വീകരിക്കുന്ന നയങ്ങൾ വലിയ തിരിച്ചടിയാണെന്ന് ചൂണ്ടിക്കാട്ടിയ ധനമന്ത്രി, ഈ പ്രതിസന്ധിയെ മറികടക്കാൻ സംസ്ഥാനത്തിന്റെ വകയായി 1000 കോടി രൂപ അധികമായി വകയിരുത്തി. കേന്ദ്ര അവഗണനകൾക്കിടയിലും തൊഴിലുറപ്പ് പദ്ധതി കേരളത്തിൽ കുറ്റമറ്റ രീതിയിൽ നടപ്പിലാക്കുമെന്ന ഉറച്ച പ്രഖ്യാപനമാണ് കെ.എൻ. ബാലഗോപാൽ നടത്തിയത്. സാധാരണക്കാരായ തൊഴിലാളികളുടെ ഉപജീവനമാർഗ്ഗം സംരക്ഷിക്കാൻ സംസ്ഥാന സർക്കാർ പ്രതിജ്ഞാബദ്ധമാണെന്ന സന്ദേശമാണ് ഈ അധിക വിഹിതത്തിലൂടെ നൽകുന്നത്.
സംസ്ഥാനത്തെ തൊഴിൽ മേഖലയെ ആധുനികവൽക്കരിക്കുന്നതിനായി ‘വർക്ക് നിയർ ഹോം’ പദ്ധതി 200 കേന്ദ്രങ്ങളിലേക്ക് വ്യാപിപ്പിക്കാൻ ബജറ്റിൽ തീരുമാനിച്ചു. സ്ത്രീ ശാക്തീകരണത്തിന് മുൻഗണന നൽകിക്കൊണ്ട് പഞ്ചായത്തുകളിൽ സ്കിൽ കേന്ദ്രങ്ങൾ ആരംഭിക്കാൻ 20 കോടി രൂപയും, സ്ത്രീ തൊഴിലാളികൾക്ക് വിശ്രമിക്കാനായി പ്രത്യേക ഹബ്ബുകളും പ്രഖ്യാപിച്ചു. പരിസ്ഥിതി സൗഹൃദ ഗതാഗതം പ്രോത്സാഹിപ്പിക്കുന്നതിനായി ഇ-ഓട്ടോകൾ വാങ്ങാൻ ഓട്ടോ തൊഴിലാളികൾക്ക് 40,000 രൂപയുടെ ധനസഹായം നൽകും. കൂടാതെ, സൗരോർജ്ജ സംഭരണം, ബ്ലൂ എക്കോണമി (10 കോടി), നഗരങ്ങളിലെ കേരളാ കലാകേന്ദ്രങ്ങൾ (10 കോടി) എന്നീ പദ്ധതികളിലൂടെ സുസ്ഥിര വികസനത്തിന് പുതിയ ദിശാബോധം നൽകാനും ബജറ്റ് ലക്ഷ്യമിടുന്നു.
ആരോഗ്യ സുരക്ഷയ്ക്കും പരിസ്ഥിതി സംരക്ഷണത്തിനും വലിയ മുൻഗണന നൽകുന്ന ബജറ്റ് പ്രഖ്യാപനങ്ങളിൽ റോഡ് അപകടങ്ങളിൽപ്പെടുന്നവർക്കായുള്ള സൗജന്യ ചികിത്സാ പദ്ധതി സവിശേഷ ശ്രദ്ധയർഹിക്കുന്നു. അപകടം നടന്ന ആദ്യ അഞ്ച് ദിവസം സർക്കാർ ആശുപത്രികളിലും തിരഞ്ഞെടുക്കപ്പെട്ട സ്വകാര്യ ആശുപത്രികളിലും സൗജന്യ ചികിത്സ ലഭ്യമാക്കാൻ 15 കോടി രൂപ വകയിരുത്തി. കാരുണ്യ പദ്ധതിയിൽ ഉൾപ്പെടാത്ത കുടുംബങ്ങൾക്കായി ചെറിയ പ്രീമിയം അടച്ച് ചേരാവുന്ന പുതിയ ആരോഗ്യ ഇൻഷുറൻസ് പദ്ധതിയും (50 കോടി) പ്രഖ്യാപിച്ചിട്ടുണ്ട്.
മനുഷ്യ-വന്യമൃഗ സംഘർഷം ലഘൂകരിക്കുന്നതിന് 100 കോടി രൂപയും വനവൽക്കരണത്തിനായി 50 കോടി രൂപയും നീക്കിവെച്ച ബജറ്റിൽ, അതിദാരിദ്ര്യ നിർമ്മാർജന പദ്ധതിക്കും കുട്ടനാട് പാക്കേജിനും (75 കോടി) അർഹമായ പരിഗണന നൽകി. ശബരിമല മാസ്റ്റർ പ്ലാൻ, ക്ലീൻ പമ്പ എന്നിവയ്ക്കായി 30 കോടി രൂപ വീതം വകയിരുത്തി. കുടുംബശ്രീയുടെ വിഹിതം 95 കോടിയായി ഉയർത്തുകയും തദ്ദേശ സ്ഥാപനങ്ങൾക്ക് രണ്ട് കോടി ഗ്യാപ് ഫണ്ട് അനുവദിക്കുകയും ചെയ്തതിലൂടെ പ്രാദേശിക ശാക്തീകരണത്തിനുള്ള ഉറച്ച നിലപാടാണ് സർക്കാർ സ്വീകരിച്ചിരിക്കുന്നത്.
വിഴിഞ്ഞം അന്താരാഷ്ട്ര തുറമുഖത്തിന്റെ വികസനത്തിന് വൻ കുതിപ്പേകുന്ന പ്രഖ്യാപനങ്ങളാണ് ബജറ്റിലുള്ളത്. അടിസ്ഥാന സൗകര്യ വികസനത്തിനും സ്ഥലം ഏറ്റെടുക്കലിനുമായി 1000 കോടി രൂപ കിൻഫ്രയിൽ നിക്ഷേപിക്കും; ഇതിന്റെ പ്രാരംഭ പ്രവർത്തനങ്ങൾക്കായി മാത്രം 100 കോടി മാറ്റിവെച്ചു. ഡിജിറ്റൽ കേരളം ലക്ഷ്യമിട്ടുള്ള പദ്ധതികളിൽ കെ-ഫോണിന് 112.44 കോടി രൂപയും ഡിജിറ്റൽ സർവ്വകലാശാലയുടെ വികസനത്തിനായി 27.8 കോടി രൂപയും വകയിരുത്തി. പൊതുമേഖലാ സ്ഥാപനമായ മലബാർ സിമന്റ്സിന്റെ നവീകരണത്തിനായി ആറു കോടി രൂപയും ബജറ്റിൽ അനുവദിച്ചിട്ടുണ്ട്.
വിനോദസഞ്ചാര മേഖലയിലും വിദ്യാഭ്യാസ രംഗത്തും വലിയ നിക്ഷേപങ്ങൾക്കാണ് ബജറ്റ് ലക്ഷ്യമിടുന്നത്. ടൂറിസം മേഖലയിലെ അടിസ്ഥാന സൗകര്യ വികസനത്തിനായി 159 കോടി രൂപ മാറ്റിവെച്ചപ്പോൾ, പരിസ്ഥിതി സൗഹൃദവും ജനകീയവുമായ ഉത്തരവാദിത്ത ടൂറിസം പദ്ധതികൾക്കായി 20 കോടി രൂപ വകയിരുത്തി. വിദ്യാഭ്യാസ മേഖലയിൽ ഉന്നത വിദ്യാഭ്യാസത്തിന് മാത്രമായി 854.41 കോടി രൂപ നീക്കിവെച്ചു. പൊതുവിദ്യാഭ്യാസ രംഗത്ത് സർക്കാർ സ്കൂൾ വിദ്യാർത്ഥികളുടെ സൗജന്യ യൂണിഫോമിനായി 150 കോടി രൂപ വകയിരുത്തിയതിനൊപ്പം, ലൈബ്രേറിയന്മാർക്ക് ആയിരം രൂപയുടെ ശമ്പള വർദ്ധനവും ധനമന്ത്രി പ്രഖ്യാപിച്ചു.
സ്ത്രീകളുടെയും കുട്ടികളുടെയും വയോജനങ്ങളുടെയും ക്ഷേമത്തിന് വലിയ കരുതലാണ് ഈ ബജറ്റ് നൽകുന്നത്. അങ്കണവാടികളിൽ എല്ലാ പ്രവൃത്തിദിവസങ്ങളിലും പാലും മുട്ടയും ഉറപ്പാക്കാൻ 80.90 കോടി രൂപ വകയിരുത്തി. കിടപ്പുരോഗികളെ പരിചരിക്കുന്നവർക്കുള്ള പ്രതിമാസ ആശ്വാസ ധനസഹായം 600 രൂപയിൽ നിന്നും 1000 രൂപയായി വർദ്ധിപ്പിച്ചത് വലിയ ആശ്വാസമാകും. സ്ത്രീകളുടെയും കുട്ടികളുടെയും ക്ഷേമത്തിനായി ആകെ 484.87 കോടി രൂപ നീക്കിവെച്ചു. വയോമിത്രം വാതിൽപ്പടി സേവനത്തിനായി 27.5 കോടി രൂപയും വയോജന കമ്മീഷന്റെ പ്രവർത്തനങ്ങൾക്കായി 50 ലക്ഷം രൂപയും ബജറ്റിൽ വകയിരുത്തിയിട്ടുണ്ട്.
സാമൂഹിക നീതിക്കും വിദ്യാഭ്യാസ പുരോഗതിക്കും ഊന്നൽ നൽകുന്ന ബജറ്റ്, പാർശ്വവൽക്കരിക്കപ്പെട്ട വിഭാഗങ്ങൾക്കായി വിപുലമായ പദ്ധതികളാണ് വിഭാവനം ചെയ്യുന്നത്. എസ്സി/എസ്ടി മേഖലയ്ക്കുള്ള വിഹിതം 15 ശതമാനത്തിലധികം വർദ്ധിപ്പിച്ചതിനൊപ്പം പിന്നാക്ക ക്ഷേമത്തിനായി 200.94 കോടി രൂപയും ഒബിസി സ്കോളർഷിപ്പിനായി 130.78 കോടി രൂപയും വകയിരുത്തി. വിദേശ പഠനത്തിനും ഗവേഷണത്തിനുമുള്ള സ്കോളർഷിപ്പുകൾക്ക് പുറമെ, പരിവർത്തിത ക്രൈസ്തവരുടെ വികസനത്തിനായി 10 കോടി രൂപയുടെ പുതിയ പദ്ധതിയും പ്രഖ്യാപിച്ചു. 5 മുതൽ 15 വരെ കുടുംബങ്ങൾ താമസിക്കുന്ന ചെറിയ നഗറുകളുടെ വികസനത്തിന് 20 കോടിയും തൊഴിലാളി ക്ഷേമത്തിന് 950.89 കോടിയും നീക്കിവെച്ചു.
വിപണി ഇടപെടലിനും ഭക്ഷ്യസുരക്ഷയ്ക്കുമായി 2333.64 കോടി രൂപയാണ് ഭക്ഷ്യവകുപ്പിന് അനുവദിച്ചത്. ഇതിൽ 100 സപ്ലൈക്കോ ഔട്ട്ലെറ്റുകളുടെ നവീകരണവും ഉൾപ്പെടുന്നു. വിദ്യാഭ്യാസ വാഹനങ്ങൾക്കായി ‘വിദ്യാവാഹിനി’ പദ്ധതിക്ക് 30 കോടിയും എം.എൻ. ലക്ഷം വീട് പദ്ധതിക്ക് 10 കോടിയും അനുവദിച്ച ബജറ്റിൽ, എറണാകുളത്തെ ഒരു ‘ഫിനാൻസ് ടൗൺ’ ആയി വികസിപ്പിക്കുമെന്ന സുപ്രധാന പ്രഖ്യാപനവുമുണ്ട്.
സര്ക്കാര് ജീവനക്കാര്ക്കും പെന്ഷന്കാര്ക്കും വലിയ ആശ്വാസം നല്കുന്ന പ്രഖ്യാപനങ്ങളാണ് ബജറ്റിലുള്ളത്. പുതിയ ശമ്പള പരിഷ്കരണ കമ്മീഷനെ നിയമിച്ച ധനമന്ത്രി, മൂന്നുമാസത്തിനകം റിപ്പോര്ട്ട് സമര്പ്പിക്കാന് നിര്ദ്ദേശിച്ചു. ജീവനക്കാരുടെ ഡിഎ കുടിശ്ശിക പൂര്ണ്ണമായും തീര്പ്പാക്കുമെന്നും പ്രഖ്യാപനമുണ്ട്. കൂടാതെ, ഏപ്രില് മുതല് നിലവില് വരുന്ന അഷ്വേര്ഡ് പെന്ഷന് പദ്ധതിയിലൂടെ അവസാന അടിസ്ഥാന ശമ്പളത്തിന്റെ 50 ശതമാനം തുക പെന്ഷനായി ഉറപ്പാക്കും. ഇതിനായി സര്ക്കാര്-ജീവനക്കാരുടെ വിഹിതം വെവ്വേറെ കൈകാര്യം ചെയ്യാനുള്ള പുതിയ സംവിധാനവും നടപ്പിലാക്കും.
നവകേരള സദസ്സിലൂടെ ഉയർന്നുവന്ന ജനകീയ ആവശ്യങ്ങൾക്കും എം.എൽ.എമാരുടെ പ്രാദേശിക വികസന കാഴ്ചപ്പാടുകൾക്കും വലിയ പ്രാധാന്യമാണ് ഈ ബജറ്റ് നൽകുന്നത്. ഇതിന്റെ ഭാഗമായി നവകേരള സദസ്സിലെ നിർദ്ദേശങ്ങൾ നടപ്പിലാക്കാൻ 210 കോടി രൂപ പ്രത്യേകമായി വകയിരുത്തി. ഓരോ മണ്ഡലത്തിലെയും പ്രാദേശിക വികസനം ലക്ഷ്യമിട്ട് ഓരോ എം.എൽ.എയ്ക്കും 7 കോടി രൂപ വരെയുള്ള പദ്ധതികൾ നിർദ്ദേശിക്കാനുള്ള അവസരവും ധനമന്ത്രി ഉറപ്പാക്കി.
മുതിർന്ന പൗരന്മാരുടെ ക്ഷേമത്തിനായി കേരള ഫിനാൻഷ്യൽ കോർപ്പറേഷൻ വഴി പ്രത്യേക വായ്പാ പദ്ധതിയും ബജറ്റിൽ വിഭാവനം ചെയ്തിട്ടുണ്ട്. മുതിർന്ന പൗരന്മാർക്ക് മൂന്ന് ശതമാനം പലിശ സബ്സിഡിയോടു കൂടി 20 കോടി രൂപ വരെയുള്ള വായ്പകൾ ലഭ്യമാക്കുന്നതിലൂടെ അവരുടെ സാമ്പത്തിക സുരക്ഷിതത്വവും സംരംഭകത്വവും ഉറപ്പാക്കാൻ ഈ പദ്ധതി ലക്ഷ്യമിടുന്നു.
രണ്ടു മണിക്കൂറും 53 മിനിറ്റും നീണ്ടുനിന്ന കേരള ചരിത്രത്തിലെ ദൈർഘ്യമേറിയ ബജറ്റ് പ്രസംഗത്തിലൂടെ, പ്രതിസന്ധികളെ ഇച്ഛാശക്തിയോടെ നേരിടുന്ന ഒരു ഭരണകൂടത്തിന്റെ ചിത്രം ധനമന്ത്രി കെ.എൻ ബാലഗോപാൽ വരച്ചുകാട്ടി. ലോകോത്തര നിലവാരമുള്ള ആരോഗ്യ-വിദ്യാഭ്യാസ നേട്ടങ്ങളും അതിവേഗ ഗതാഗത സൗകര്യങ്ങളും വിഭാവനം ചെയ്യുന്ന ഈ ബജറ്റ് കേരളത്തിന്റെ ഭാവി വികസനത്തിനുള്ള കരുത്തുറ്റ രേഖയാണ്.
The post കേരള ബജറ്റ് 2026: വികസനക്കുതിപ്പിന് അതിവേഗ പാത; ജനക്ഷേമത്തിന് കരുതലിന്റെ ഇൻഷുറൻസ് കവചം appeared first on Express Kerala.
