ന്യൂസിലാൻഡിനെതിരായ ടി20 പരമ്പരയിൽ മലയാളി താരം സഞ്ജു സാംസൺ നേരിടുന്ന ഫോമില്ലായ്മയെ രൂക്ഷമായി വിമർശിച്ച് ഇന്ത്യൻ സ്പിന്നറും രാജസ്ഥാൻ റോയൽസിലെ മുൻ സഹതാരവുമായ യുസ്വേന്ദ്ര ചാഹൽ. പത്ത് വർഷത്തിലേറെയായി അന്താരാഷ്ട്ര ക്രിക്കറ്റിന്റെ ഭാഗമായ സഞ്ജുവിന്, സമ്മർദ്ദമെന്നത് ഇനി ഒരു ഒഴിവുകഴിവായി പറയാനാവില്ലെന്ന് ചാഹൽ വ്യക്തമാക്കി. ശുഭ്മാൻ ഗില്ലിനെപ്പോലെയുള്ള താരങ്ങളെ ഒഴിവാക്കി വലിയ പ്രതീക്ഷയോടെയാണ് സെലക്ടർമാർ സഞ്ജുവിനെ ലോകകപ്പ് ടീമിൽ ഓപ്പണറായി ഉൾപ്പെടുത്തിയത്. എന്നാൽ കിട്ടുന്ന അവസരങ്ങൾ മുതലാക്കുന്നതിൽ താരം പരാജയപ്പെടുകയാണെന്ന് ചാഹൽ ചൂണ്ടിക്കാട്ടി.
പരമ്പരയിലെ മൂന്നാം മത്സരത്തിൽ റണ്ണൊന്നുമെടുക്കാതെ പുറത്തായ സഞ്ജു, വിശാഖപട്ടണത്ത് നടന്ന നാലാം ടി20യിൽ മികച്ച തുടക്കം ലഭിച്ചിട്ടും 15 പന്തിൽ 24 റൺസെടുത്ത് അനാവശ്യമായി വിക്കറ്റ് കളയുകയായിരുന്നു. ഐപിഎല്ലിൽ മധ്യനിരയിൽ നിന്ന് ഓപ്പണിംഗിലേക്ക് സ്ഥാനക്കയറ്റം ലഭിച്ച സഞ്ജുവിന് അന്താരാഷ്ട്ര തലത്തിൽ ഇത്രയധികം അനുഭവസമ്പത്തുണ്ടായിട്ടും സ്ഥിരത പുലർത്താൻ കഴിയാത്തത് അംഗീകരിക്കാനാവില്ല. ഒന്നോ രണ്ടോ മത്സരങ്ങളിലെ പരാജയം സ്വാഭാവികമാണെങ്കിലും, തുടർച്ചയായി മൂന്നും നാലും അവസരങ്ങൾ കിട്ടിയിട്ടും അത് പ്രയോജനപ്പെടുത്താത്തത് ടീമിന് വലിയ തിരിച്ചടിയാണെന്നും ചാഹൽ പറഞ്ഞു.
സഞ്ജുവിന് പിന്നാലെ ഇഷാൻ കിഷനെപ്പോലെയുള്ള പ്രതിഭകൾ അവസരത്തിനായി കാത്തിരിക്കുകയാണെന്ന ഓർമ്മപ്പെടുത്തലും ചാഹൽ നൽകി. മൂന്നാം നമ്പറിൽ മികച്ച ഫോമിലുള്ള ഇഷാനെ പരീക്ഷിക്കണോ അതോ സഞ്ജുവിന്റെ നാട്ടിൽ (തിരുവനന്തപുരം) നടക്കുന്ന അഞ്ചാം ടി20യിൽ അദ്ദേഹത്തിന് ഒരു അവസരം കൂടി നൽകണോ എന്നത് ടീം മാനേജ്മെന്റിന്റെ തീരുമാനമായിരിക്കും. ലോകകപ്പിന് ഇനിയും സമയമുണ്ടെങ്കിലും ഓപ്പണിംഗിൽ തിളങ്ങാൻ സഞ്ജുവിന് സാധിച്ചില്ലെങ്കിൽ മാറ്റങ്ങൾ അനിവാര്യമാണെന്നും ചാഹൽ കൂട്ടിച്ചേർത്തു.
The post സമ്മർദ്ദം ഇനി ഒഴികഴിവല്ല; സഞ്ജു അവസരങ്ങൾ പാഴാക്കുന്നു; തുറന്നടിച്ച് യുസ്വേന്ദ്ര ചാഹൽ appeared first on Express Kerala.
