സിപിഎമ്മിന് ഏറ്റവും വേണ്ടപ്പെട്ടവരായ പ്രതികളെ സംരക്ഷിക്കാൻ സർക്കാർ സംവിധാനങ്ങൾ ദുരുപയോഗം ചെയ്യുകയാണെന്ന് പ്രതിപക്ഷ നേതാവ് വി.ഡി. സതീശൻ ആരോപിച്ചു. കേസ് അന്വേഷണം ശരിയായ ദിശയിൽ മുന്നോട്ടുപോയി പ്രതികളിലേക്ക് എത്തിയാൽ ഈ സർക്കാർ തന്നെ തകർന്നു വീഴുന്ന സാഹചര്യമാണുള്ളത്. അതുകൊണ്ടാണ് മുഖ്യമന്ത്രിയുടെ അറിവോടെ അദ്ദേഹത്തിന്റെ ഓഫീസ് അന്വേഷണത്തിൽ അനധികൃതമായി ഇടപെടുന്നത്.
കൃത്യമായ തെളിവുകൾ ശേഖരിക്കാനോ തൊണ്ടിമുതൽ കണ്ടെത്താനോ പോലീസ് തയ്യാറാകാത്തതുകൊണ്ടാണ് പ്രതികൾക്ക് സ്വമേധയാ ജാമ്യം ലഭിച്ച് പുറത്തിറങ്ങാൻ സാധിക്കുന്നത്. കോടതിക്ക് ഇക്കാര്യത്തിൽ ആശങ്കയില്ലെങ്കിലും തങ്ങൾക്കും ജനങ്ങൾക്കും വലിയ ആശങ്കയുണ്ടെന്നും അന്വേഷണം എവിടെയും എത്തിക്കാതെ അവസാനിപ്പിക്കാനാണ് സർക്കാർ ശ്രമമെന്നും അദ്ദേഹം കുറ്റപ്പെടുത്തി.
Also Read: പ്രതിപക്ഷം കണ്ണടച്ചാൽ ലോകം ഇരുട്ടാകില്ല; എം ബി രാജേഷ്
നിയമസഭയ്ക്കുള്ളിൽ മന്ത്രിമാർ നടത്തുന്ന മോശം പെരുമാറ്റത്തെയും അദ്ദേഹം രൂക്ഷമായ ഭാഷയിൽ വിമർശിച്ചു. മന്ത്രിമാർ സഭയിൽ നടത്തുന്നത് തികച്ചും നിലവാരം കുറഞ്ഞ പ്രയോഗങ്ങളാണെന്നും ഇതിനുമുമ്പ് ഒരിക്കലും ഒരു മന്ത്രിസഭയും പ്രതിപക്ഷത്തെ ഇത്രത്തോളം അധിക്ഷേപിച്ചിട്ടില്ലെന്നും സതീശൻ പറഞ്ഞു. ചോദ്യോത്തര വേളയിൽ പോലും പ്രതിപക്ഷ നേതാവിനെ ആക്ഷേപിക്കാൻ മന്ത്രിമാർക്ക് സ്പീക്കർ അവസരം ഒരുക്കി നൽകുകയാണ്. യുഡിഎഫ് ഒറ്റക്കെട്ടായി എടുത്ത തീരുമാനമാണ് നിലവിലെ സമരമെന്നും നിയമസഭയിലെ അധിക്ഷേപങ്ങൾക്കെതിരെ ശക്തമായ പ്രതിഷേധം തുടരുമെന്നും അദ്ദേഹം വ്യക്തമാക്കി.
The post അന്വേഷണം അട്ടിമറിക്കുന്നു, പ്രതികളെ സംരക്ഷിക്കാൻ മുഖ്യമന്ത്രിയുടെ ഓഫീസ് ഇടപെടുന്നു: വി.ഡി. സതീശൻ appeared first on Express Kerala.
