കേരളത്തിൽ നിയമസഭാ തെരഞ്ഞെടുപ്പിന്റെ ഒരുക്കങ്ങൾ ഊർജ്ജിതമാകുന്നു. വോട്ടർപ്പട്ടിക ശുദ്ധീകരിക്കുന്നതിന്റെ ഭാഗമായി സംസ്ഥാനത്തുടനീളം നടന്ന ഹിയറിംഗിൽ 21,130 പേരെ വോട്ടർപ്പട്ടികയിൽ നിന്ന് ഒഴിവാക്കിയതായി മുഖ്യതെരഞ്ഞെടുപ്പ് ഓഫീസർ ഡോ. രത്തൻ യു കേൽക്കർ അറിയിച്ചു. ഇതോടൊപ്പം തെരഞ്ഞെടുപ്പ് നിരീക്ഷകരുടെ നിയമനവും പൗരത്വ ആശങ്കകൾ പരിഹരിക്കാനുള്ള സർക്കാരിന്റെ പുതിയ നീക്കങ്ങളും രാഷ്ട്രീയ കേരളത്തിൽ ചർച്ചയാവുകയാണ്.
വോട്ടർപ്പട്ടിക പുതുക്കുന്നതിന്റെ ഭാഗമായി നടത്തിയ കൃത്യമായ പരിശോധനയിലാണ് അനർഹരെ കണ്ടെത്തിയത്. ഹിയറിംഗ് തുടരുന്നതിനാൽ വരും ദിവസങ്ങളിലും കൂടുതൽ പേർ പട്ടികയിൽ നിന്ന് പുറത്തായേക്കാം. ആകെ ഒഴിവാക്കപ്പെട്ടവർ, 21,130 , താമസം മാറിയവർ 17,287 മരണപ്പെട്ടവർ 2,804 ,വിദേശ പൗരത്വം സ്വീകരിച്ചവർ 1,039 എന്നിങ്ങനെയാണ് കണക്ക്.
കേരളം ഉൾപ്പെടെയുള്ള അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പ് സുതാര്യമായി നടക്കുന്നുണ്ടെന്ന് ഉറപ്പാക്കാൻ 1,444 നിരീക്ഷകരെയാണ് കേന്ദ്ര തെരഞ്ഞെടുപ്പ് കമ്മീഷൻ നിയോഗിച്ചിരിക്കുന്നത്.
സ്വതന്ത്രവും നിഷ്പക്ഷവുമായ തെരഞ്ഞെടുപ്പ് ഉറപ്പാക്കാൻ മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ നിർദ്ദേശം നൽകി. എസ്.ഐ.ആർ പശ്ചാത്തലത്തിൽ മതന്യൂനപക്ഷങ്ങൾക്കിടയിലുള്ള ആശങ്കകൾ പരിഹരിക്കാൻ നിർണ്ണായക പ്രഖ്യാപനവുമായി സംസ്ഥാന സർക്കാർ രംഗത്തെത്തി. ഇതിനായി ‘നേറ്റിവിറ്റി കാർഡ്’ നൽകുമെന്ന് മന്ത്രി കെ.എൻ. ബാലഗോപാൽ അറിയിച്ചു. നേറ്റിവിറ്റി കാർഡിനായി പ്രത്യേക നിയമനിർമ്മാണം നടത്തും. മതസാമുദായിക സൗഹൃദം കാത്തുസൂക്ഷിക്കാൻ ബജറ്റിൽ 10 കോടി രൂപ വകയിരുത്തി. പൗരത്വവുമായി ബന്ധപ്പെട്ട ആശങ്കകൾ ദൂരീകരിച്ച് ജനങ്ങൾക്ക് സുരക്ഷിതബോധം നൽകും.
വോട്ടർപ്പട്ടികയിലെ ഹിയറിംഗ് നടപടികൾ പുരോഗമിക്കുകയാണ്. നിങ്ങളുടെ പേര് പട്ടികയിലുണ്ടെന്ന് ഉറപ്പുവരുത്താൻ തെരഞ്ഞെടുപ്പ് കമ്മീഷന്റെ ഔദ്യോഗിക പോർട്ടൽ സന്ദർശിക്കുക.
The post വോട്ടർപ്പട്ടികയിൽ; 21,000 പേർ പുറത്ത്; ആശങ്കയകറ്റാൻ ‘നേറ്റിവിറ്റി കാർഡുമായി’ കേരളം appeared first on Express Kerala.
