കേരളത്തെ സമ്പൂർണ്ണ ഡിജിറ്റൽ സാക്ഷരതയിലേക്ക് നയിക്കുന്ന ‘ഡിജി കേരളം’ പദ്ധതിയുടെ രണ്ടാം ഘട്ടത്തിന് ആവേശം പകരാൻ ഔദ്യോഗിക മാസ്കോട്ട് വരുന്നു. സംസ്ഥാന പക്ഷിയായ വേഴാമ്പലിനെയാണ് പദ്ധതിയുടെ അടയാളമായി തിരഞ്ഞെടുത്തത്. ആധുനിക സാങ്കേതിക വിദ്യയുടെ കരുത്തിൽ ജനങ്ങളിലേക്ക് എത്തുന്ന ഈ രണ്ട് വേഴാമ്പലുകൾക്ക് അനുയോജ്യമായ പേരുകൾ നിർദ്ദേശിക്കാൻ പൊതുജനങ്ങൾക്ക് അവസരമൊരുക്കി തദ്ദേശ സ്വയംഭരണ വകുപ്പ് പ്രിൻസിപ്പൽ ഡയറക്ടറേറ്റ് ഇപ്പോൾ നാമകരണ മത്സരം പ്രഖ്യാപിച്ചിരിക്കുകയാണ്.
ഡിജിറ്റൽ സാക്ഷരത, കേരളീയ സംസ്കാരം, ആർട്ടിഫിഷ്യൽ ഇന്റലിജൻസ് (AI), സൈബർ സുരക്ഷ എന്നിവയെ പ്രതിഫലിപ്പിക്കുന്ന ലളിതവും അർത്ഥവത്തുമായ പേരുകളാണ് സർക്കാർ തേടുന്നത്. തിരഞ്ഞെടുക്കപ്പെടുന്ന പേരുകൾ ഡിജി കേരളം 2.0-യുടെ ഔദ്യോഗിക പ്രചരണ പ്രവർത്തനങ്ങളുടെ ഭാഗമാകും. കേരളത്തിന്റെ തനിമയും ആധുനിക സാങ്കേതിക വിദ്യയുടെ കുതിപ്പും ഒരുപോലെ ഉൾക്കൊള്ളുന്ന സർഗ്ഗാത്മകമായ പേരുകൾക്ക് മത്സരത്തിൽ മുൻഗണന നൽകുന്നതാണ്.
Also Read: വർക്കലയിൽ കാർ മതിലിലിടിച്ച് അപകടം! വീട്ടമ്മ മരിച്ചു; ഭർത്താവിനും മകനും ഗുരുതര പരിക്ക്
മത്സരത്തിൽ പങ്കെടുക്കാൻ താല്പര്യമുള്ളവർ തങ്ങളുടെ നിർദ്ദേശങ്ങൾ പേര്, വിലാസം, ഫോൺ നമ്പർ എന്നിവ സഹിതം pdschemes@gmail.com എന്ന ഇമെയിൽ വിലാസത്തിലേക്ക് അയക്കേണ്ടതാണ്. ഫെബ്രുവരി 13 ആണ് അപേക്ഷകൾ സമർപ്പിക്കാനുള്ള അവസാന തീയതി. കേരളത്തിന്റെ ഡിജിറ്റൽ വിപ്ലവത്തിന്റെ ചരിത്രഭാഗമാകാൻ ഈ അവസരം വിനിയോഗിക്കണമെന്ന് തദ്ദേശ സ്വയംഭരണ വകുപ്പ് പ്രിൻസിപ്പൽ ഡയറക്ടർ അറിയിച്ചു.
The post സംസ്ഥാന പക്ഷിയെ പേരിടാൻ അവസരം; ഡിജി കേരളം പദ്ധതിക്ക് വേഴാമ്പൽ മാസ്കോട്ട് വരുന്നു appeared first on Express Kerala.
