സംസ്ഥാനത്ത് സ്വർണ്ണവിലയിൽ ഇന്ന് വലിയ അസ്ഥിരതയാണ് ദൃശ്യമായത്. ഇന്ന് രാവിലെ പവന് 1,640 രൂപ വർദ്ധിച്ച് വില 1,16,480 രൂപ എന്ന റെക്കോർഡിലേക്ക് ഉയർന്നിരുന്നെങ്കിലും ഉച്ചയോടെ വിപണിയിൽ തിരുത്തലുണ്ടായി. പവന് 680 രൂപ കുറഞ്ഞതോടെ സ്വർണ്ണവില 1,16,000 രൂപയ്ക്ക് താഴെയെത്തി. നിലവിൽ ഒരു പവൻ 22 കാരറ്റ് സ്വർണ്ണത്തിന്റെ വിപണി വില 1,15,800 രൂപയാണ്. ഏറ്റവും കുറഞ്ഞ പണിക്കൂലി കണക്കാക്കിയാൽ പോലും ഒരു പവൻ സ്വർണ്ണം വാങ്ങാൻ ഉപഭോക്താക്കൾ ഏകദേശം 1,50,000 രൂപയോളം നൽകേണ്ടി വരും.
ആഗോള വിപണിയിലെ മാറ്റങ്ങളാണ് ആഭ്യന്തര വിപണിയിലും പ്രതിഫലിച്ചത്. ഡോളറിന്റെ മൂല്യം കരുത്താർജ്ജിച്ചതും അമേരിക്ക-ചൈന വ്യാപാര തർക്കങ്ങളിൽ ലഘൂകരണ സൂചനകൾ വന്നതും വിപണിയിൽ വിൽപന സമ്മർദ്ദമുണ്ടാക്കി. ഇതേത്തുടർന്ന് സ്വർണ്ണത്തിന്റെയും വെള്ളിയുടെയും വില കുത്തനെ താഴുകയായിരുന്നു. എന്നാൽ വില കുറഞ്ഞതോടെ നിക്ഷേപകർ സ്വർണ്ണത്തിലേക്ക് വീണ്ടും ആകർഷിക്കപ്പെടുന്നുണ്ട്. അന്താരാഷ്ട്ര തലത്തിൽ സമ്പദ്വ്യവസ്ഥയിലെ അനിശ്ചിതത്വം തുടരുന്നത് സ്വർണ്ണവില വീണ്ടും കുതിച്ചുയരാൻ കാരണമായേക്കാം.
അതേസമയം, ഒരാഴ്ചയ്ക്കുള്ളിൽ സ്വർണ്ണവില വീണ്ടും വർദ്ധിക്കാനാണ് സാധ്യതയെന്ന് വിപണി നിരീക്ഷകർ പ്രവചിക്കുന്നു. നിലവിൽ ഒരു ഗ്രാം 22 കാരറ്റ് സ്വർണ്ണത്തിന് 14,475 രൂപയും, 18 കാരറ്റിന് 11,895 രൂപയുമാണ് വില. വെള്ളി ഗ്രാമിന് 300 രൂപയിലാണ് വ്യാപാരം നടക്കുന്നത്. കഴിഞ്ഞ ഡിസംബർ 23-ന് സ്വർണ്ണവില ഒരു ലക്ഷം രൂപ എന്ന ചരിത്ര നാഴികക്കല്ല് പിന്നിട്ടതിന് ശേഷം വലിയ കുതിപ്പാണ് വിപണിയിൽ തുടരുന്നത്.
The post രാവിലെ കുതിച്ചു, ഉച്ചയ്ക്ക് ഇടിഞ്ഞു! സ്വർണ്ണവിലയിൽ വൻ ചാഞ്ചാട്ടം appeared first on Express Kerala.
