ചൊവ്വയിൽ മനുഷ്യ കോളനി സ്ഥാപിക്കുക എന്ന തന്റെ ദീർഘകാല സ്വപ്നത്തിൽ നിന്ന് താൽക്കാലികമായി പിന്നോട്ട് പോയി ചന്ദ്രനിൽ നഗരം നിർമ്മിക്കുന്നതിൽ ശ്രദ്ധ കേന്ദ്രീകരിക്കാൻ ഒരുങ്ങുകയാണ് ഇലോൺ മസ്ക്. 2002-ൽ സ്പേസ് എക്സ് സ്ഥാപിച്ചത് മുതൽ ചുവന്ന ഗ്രഹമായ ചൊവ്വയായിരുന്നു മസ്കിന്റെ പ്രധാന ലക്ഷ്യം. എന്നാൽ, ചൊവ്വാ പദ്ധതികൾ പൂർത്തിയാകാൻ 20 വർഷത്തിലധികം സമയമെടുക്കുമെന്ന വിലയിരുത്തലിനെ തുടർന്നാണ് പത്ത് വർഷത്തിനുള്ളിൽ ചന്ദ്രനിൽ ഒരു നഗരം യാഥാർത്ഥ്യമാക്കാനുള്ള പുതിയ തീരുമാനത്തിലേക്ക് അദ്ദേഹം എത്തിയത്.
ചൊവ്വയെ അപേക്ഷിച്ച് ചന്ദ്രനിലേക്കുള്ള യാത്ര വളരെ എളുപ്പമാണെന്നതാണ് ഈ മാറ്റത്തിന് പ്രധാന കാരണം. ചൊവ്വയിലേക്ക് യാത്ര ചെയ്യാൻ അനുകൂല സാഹചര്യം 26 മാസത്തിലൊരിക്കൽ മാത്രമേ ഉണ്ടാകൂ എന്നതും യാത്രയ്ക്ക് ആറുമാസം എടുക്കുമെന്നതും വലിയ വെല്ലുവിളിയാണ്. എന്നാൽ ചന്ദ്രനിലേക്ക് ഓരോ 10 ദിവസത്തിലും യാത്ര സാധ്യമാണെന്നും വെറും രണ്ട് ദിവസം കൊണ്ട് അവിടെ എത്തിച്ചേരാമെന്നും മസ്ക് ചൂണ്ടിക്കാട്ടുന്നു. ഇത് ചന്ദ്രനിൽ വേഗത്തിലുള്ള പരീക്ഷണങ്ങൾക്കും വികസന പ്രവർത്തനങ്ങൾക്കും വഴിതുറക്കും.
Also Read: വാട്സ്ആപ്പ് വെബ് ഉപയോക്താക്കൾക്ക് ഇനി ‘കോളടിക്കാം’; വോയിസ്, വീഡിയോ കോൾ ഫീച്ചറുകൾ എത്തുന്നു!
സ്പേസ് എക്സിന്റെ ഭീമൻ റോക്കറ്റായ ‘സ്റ്റാർഷിപ്പ്’ ആണ് ഈ പദ്ധതികളുടെ നട്ടെല്ല്. ചന്ദ്രനിലേക്ക് വൻതോതിൽ ചരക്കുകൾ എത്തിക്കാൻ സ്റ്റാർഷിപ്പിന് സാധിക്കുമെന്നും ചന്ദ്രനിലെ വിഭവങ്ങൾ ഉപയോഗിച്ച് ഭാവിയിൽ ഉപഗ്രഹ നിർമ്മാണം വരെ നടത്താനാകുമെന്നും മസ്ക് അവകാശപ്പെടുന്നു. എന്നാൽ സ്റ്റാർഷിപ്പ് ഇപ്പോഴും പരീക്ഷണ ഘട്ടത്തിലാണെന്നും സാങ്കേതികമായ ഒട്ടേറെ വെല്ലുവിളികൾ ഇനിയും ബാക്കിയുണ്ടെന്നുമാണ് ബഹിരാകാശ വിദഗ്ധരുടെ അഭിപ്രായം. എങ്കിലും മനുഷ്യവാസം നക്ഷത്രങ്ങളിലേക്ക് വ്യാപിപ്പിക്കുക എന്ന ലക്ഷ്യത്തിൽ മാറ്റമില്ലെന്ന് മസ്ക് എക്സിലൂടെ വ്യക്തമാക്കി.
The post ചൊവ്വയല്ല, ലക്ഷ്യം ഇനി ചന്ദ്രൻ; പത്ത് വർഷത്തിനുള്ളിൽ ചാന്ദ്രനഗരം നിർമ്മിക്കുമെന്ന് ഇലോൺ മസ്ക് appeared first on Express Kerala.
