കർണാടകയിലെ തുമകൂരു ജില്ലയിൽ സ്കൂൾ അധികൃതരുടെ ക്രൂരമായ അനാസ്ഥയെത്തുടർന്ന് ഒന്നാം ക്ലാസുകാരിയുടെ രണ്ട് വിരലുകൾ നഷ്ടമായി. ഗുലുരു ഗ്രാമത്തിലെ സർക്കാർ പ്രൈമറി സ്കൂളിൽ ഫെബ്രുവരി 11-നാണ് മനസാക്ഷിയെ നടുക്കിയ ഈ സംഭവം നടന്നത്. ഉച്ചഭക്ഷണത്തിനായി വരിനിൽക്കുന്നതിനിടെ സ്കൂളിലെ ഇരുമ്പുവാതിലിൽ കുടുങ്ങിയാണ് കുട്ടിയുടെ വിരലുകളറ്റത്. എന്നാൽ, ഗുരുതരമായി പരിക്കേറ്റ കുട്ടിയെ ആശുപത്രിയിലെത്തിക്കുന്നതിന് പകരം, അറ്റുവീണ വിരലുകൾ അധ്യാപകർ തൂത്തുവാരി മാലിന്യക്കുട്ടയിൽ ഉപേക്ഷിക്കുകയാണ് ചെയ്തത്.
അപകടം നടന്നയുടൻ കുട്ടി വേദനകൊണ്ട് നിലവിളിച്ചെങ്കിലും അധ്യാപകർ കൃത്യസമയത്ത് വൈദ്യസഹായം ലഭ്യമാക്കിയില്ല. രക്തസ്രാവം തടയാൻ മുറിവിൽ തുണി കൊണ്ട് കെട്ടുക മാത്രമാണ് ചെയ്തത്. പിന്നീട് സ്കൂൾ അധികൃതർ വിവരമറിയിച്ചതിനെത്തുടർന്ന് രക്ഷിതാക്കളെത്തിയാണ് കുട്ടിയെ ജില്ലാ ആശുപത്രിയിൽ പ്രവേശിപ്പിച്ചത്. വിരലുകൾ സുരക്ഷിതമായി സൂക്ഷിക്കുകയും നിർണ്ണായകമായ ആദ്യ മണിക്കൂറുകളിൽ തന്നെ കുട്ടിയെ എത്തിക്കുകയും ചെയ്തിരുന്നെങ്കിൽ വിരലുകൾ തുന്നിച്ചേർക്കാൻ കഴിയുമായിരുന്നുവെന്ന് ഡോക്ടർമാർ അറിയിച്ചതോടെയാണ് അധ്യാപകരുടെ ക്രൂരത പുറംലോകമറിഞ്ഞത്.
Also Read: ബംഗ്ലാദേശിൽ പുതിയ ഭരണകൂടം: സത്യപ്രതിജ്ഞാ ചടങ്ങിലേക്ക് നരേന്ദ്ര മോദിയെ ക്ഷണിച്ച് ബിഎൻപി
സംഭവത്തിൽ രക്ഷിതാക്കൾ നൽകിയ പരാതിയെത്തുടർന്ന് തുമകൂരു റൂറൽ പോലീസ് കേസെടുത്തു. അടിയന്തര സാഹചര്യത്തിൽ അങ്ങേയറ്റം അശ്രദ്ധയും വിവേകശൂന്യതയും കാണിച്ചതിന് പ്രഥമാധ്യാപകൻ നാഗേഷ്, അധ്യാപകരായ രേണുകമ്മ, വെങ്കിടേഷ്, ബ്ലോക്ക് വിദ്യാഭ്യാസ ഓഫീസർ ഹനുമന്തപ്പ എന്നിവർക്കെതിരെയാണ് നടപടി സ്വീകരിച്ചിരിക്കുന്നത്. കുട്ടിക്ക് അർഹമായ ചികിത്സ വൈകിപ്പിച്ചതും തെളിവ് നശിപ്പിക്കുംവിധം വിരലുകൾ ചപ്പുചവറുകൾക്കൊപ്പം ഉപേക്ഷിച്ചതും വലിയ പ്രതിഷേധത്തിന് കാരണമായിട്ടുണ്ട്.
The post അധ്യാപകരുടെ ക്രൂരത; ഒന്നാം ക്ലാസുകാരിയുടെ അറ്റ വിരലുകൾ മാലിന്യക്കുട്ടയിൽ എറിഞ്ഞു, കുട്ടിക്ക് വിരലുകൾ നഷ്ടമായി appeared first on Express Kerala.