ഭൂമിക്ക് നേരെ മരണദൂതന്മാർ; ഒരു നഗരത്തെ സെക്കൻഡുകൾക്കുള്ളിൽ ചാരമാക്കും! നാസയുടെ ഞെട്ടിക്കുന്ന റിപ്പോർട്ട്

ഒരു നഗരത്തെ ഒന്നാകെ തുടച്ചുനീക്കാൻ ശേഷിയുള്ള ആയിരക്കണക്കിന് ഛിന്നഗ്രഹങ്ങൾ ഭൂമിയെ ലക്ഷ്യമാക്കി നീങ്ങുന്നതായി നാസ ശാസ്ത്രജ്ഞർ മുന്നറിയിപ്പ് നൽകി. അമേരിക്കൻ അസോസിയേഷൻ ഫോർ ദി അഡ്വാൻസ്മെന്റ് ഓഫ് സയൻസ് സമ്മേളനത്തിലാണ് നാസയുടെ പ്ലാനറ്ററി ഡിഫൻസ് ഓഫീസർ ഡോ. കെല്ലി ഫാസ്റ്റ് ഈ നിർണ്ണായക വിവരം വെളിപ്പെടുത്തിയത്.

എന്താണ് ‘സിറ്റി കില്ലറുകൾ’?

ഏകദേശം 140 മീറ്ററോ അതിലധികമോ വലുപ്പമുള്ള ഛിന്നഗ്രഹങ്ങളെയാണ് ‘സിറ്റി കില്ലറുകൾ’ എന്ന് വിളിക്കുന്നത്. ഇവ ഭൂമിയിൽ പതിച്ചാൽ ഒരു വൻ നഗരത്തെ പൂർണ്ണമായും നശിപ്പിക്കാനും വൻതോതിലുള്ള തീപിടുത്തത്തിനും നാശനഷ്ടങ്ങൾക്കും കാരണമാകും. ഇത്തരം ഏകദേശം 25,000 ഛിന്നഗ്രഹങ്ങൾ ഉണ്ടെന്നാണ് നിഗമനമെങ്കിലും, അവയിൽ 40 ശതമാനം മാത്രമേ ഇതുവരെ കണ്ടെത്താൻ കഴിഞ്ഞിട്ടുള്ളൂ എന്നത് ആശങ്ക വർദ്ധിപ്പിക്കുന്നു. ടെലിസ്കോപ്പുകളിൽ പെടാത്ത അത്ര ചെറിയ വലുപ്പമാണ് ഇവയെ തിരിച്ചറിയാൻ തടസ്സമാകുന്നത്.

Also Read:ഭൂമിക്ക് മുകളിൽ വിരിഞ്ഞ പച്ച വിസ്മയം! അറോറകളുടെ മാസ്മരിക ദൃശ്യം പങ്കുവെച്ച് നാസ

ഇത്തരം ഛിന്നഗ്രഹങ്ങളെ തടയാൻ നിലവിൽ ഫലപ്രദമായ മാർഗ്ഗങ്ങളില്ലെന്ന് നാസയുടെ ഡാർട്ട് മേധാവി നാൻസി ചാബോട്ട് വ്യക്തമാക്കി. 2022-ൽ ഡാർട്ട് പരീക്ഷണത്തിലൂടെ ഒരു ഛിന്നഗ്രഹത്തിന്റെ പാത മാറ്റാൻ കഴിയുമെന്ന് നാസ തെളിയിച്ചിരുന്നു. എന്നാൽ, ഒരു ഛിന്നഗ്രഹം ഭൂമിയിൽ പതിക്കുന്നതിന് വർഷങ്ങൾക്ക് മുൻപേ അതിനെ കണ്ടെത്തുകയും ലക്ഷ്യസ്ഥാനം നിശ്ചയിക്കുകയും ചെയ്താൽ മാത്രമേ ഈ സാങ്കേതികവിദ്യ പ്രായോഗികമാകൂ. കൃത്യമായി തിരിച്ചറിയാൻ കഴിയാത്ത ഛിന്നഗ്രഹങ്ങളുടെ കാര്യത്തിൽ ഈ പ്രതിരോധം അസാധ്യമാണ്. മതിയായ ഫണ്ടിന്റെ അഭാവം ഇത്തരം പ്രതിരോധ സംവിധാനങ്ങൾ സജ്ജമാക്കുന്നതിന് ബഹിരാകാശ ഏജൻസികൾക്ക് വെല്ലുവിളിയാകുന്നുണ്ട്.

നിലവിൽ ഭൂമിയിൽ ഇവ പതിക്കാനുള്ള സാധ്യത കുറവാണെങ്കിലും, ഭാവിയിലെ അപകടസാധ്യതകൾ മുന്നിൽക്കണ്ട് ഗ്രഹ പ്രതിരോധ മേഖലയിൽ കൂടുതൽ നിക്ഷേപവും അന്താരാഷ്ട്ര സഹകരണവും ആവശ്യമാണെന്ന് ശാസ്ത്രജ്ഞർ ചൂണ്ടിക്കാട്ടുന്നു.

The post ഭൂമിക്ക് നേരെ മരണദൂതന്മാർ; ഒരു നഗരത്തെ സെക്കൻഡുകൾക്കുള്ളിൽ ചാരമാക്കും! നാസയുടെ ഞെട്ടിക്കുന്ന റിപ്പോർട്ട് appeared first on Express Kerala.