ബംഗ്ലാദേശിലെ ഇടക്കാല സർക്കാർ തലവൻ മുഹമ്മദ് യൂനുസിനെതിരെ ഗുരുതരമായ ആരോപണങ്ങളുമായി പ്രസിഡന്റ് മുഹമ്മദ് ഷഹാബുദ്ദീൻ രംഗത്തെത്തി. മുഹമ്മദ് യൂനുസിന്റെ നടപടികൾ ഭരണഘടനാ വിരുദ്ധമാണെന്നും തന്നെ പദവിയിൽ നിന്ന് നീക്കം ചെയ്യാൻ അദ്ദേഹം ഗൂഢാലോചന നടത്തിയെന്നും പ്രസിഡന്റ് വെളിപ്പെടുത്തി. താൻ പദവിയിലിരിക്കെ ഏകദേശം 15 തവണ യൂനുസ് വിദേശയാത്രകൾ നടത്തിയെങ്കിലും ഒന്നിനെക്കുറിച്ചും ഔദ്യോഗികമായി അറിയിച്ചില്ലെന്നും, അമേരിക്കയുമായുള്ള സുപ്രധാന വ്യാപാര കരാറിനെക്കുറിച്ച് തന്നെ ഇരുട്ടിൽ നിർത്തിയെന്നും ഷഹാബുദ്ദീൻ ആരോപിച്ചു. ഇത് ഭരണഘടനാപരമായ ബാധ്യതകളുടെ നഗ്നമായ ലംഘനമാണെന്ന് അദ്ദേഹം ചൂണ്ടിക്കാട്ടി.
യൂനുസ് ഭരണകൂടം തന്റെ വിദേശയാത്രകൾ മനഃപൂർവ്വം തടഞ്ഞതായും ജനങ്ങൾക്കിടയിൽ തന്റെ സ്വാധീനം കുറയ്ക്കാൻ ശ്രമിച്ചതായും പ്രസിഡന്റ് കുറ്റപ്പെടുത്തി. കൊസോവോ, ഖത്തർ എന്നിവിടങ്ങളിലേക്കുള്ള യാത്രകൾ തടസ്സപ്പെടുത്തിയത് തന്നെ ജനങ്ങൾ തിരിച്ചറിയാതിരിക്കാനാണെന്ന് അദ്ദേഹം പറഞ്ഞു. 2024 ഒക്ടോബറിൽ തന്റെ വസതിയായ ‘ബംഗാഭവൻ’ പ്രതിഷേധക്കാർ വളഞ്ഞ രാത്രി അതിഭീകരമായിരുന്നുവെന്നും, തന്നെ പുറത്താക്കാൻ യൂനുസുമായി ബന്ധപ്പെട്ട ശക്തികൾ അന്ന് ശ്രമിച്ചതായും ഷഹാബുദ്ദീൻ അനുസ്മരിച്ചു. ഷെയ്ഖ് ഹസീന സർക്കാരിന്റെ പതനത്തിന് ശേഷം ഭരണഘടനാപരമായ പദവിയിൽ തുടരുന്ന അവസാനത്തെ പ്രധാന വ്യക്തിയാണ് ഇദ്ദേഹം.
ഭരണഘടനാപരമായ തുടർച്ച നിലനിർത്താൻ ആഗ്രഹിക്കുന്ന ബംഗ്ലാദേശ് നാഷണലിസ്റ്റ് പാർട്ടിയുടെയും (ബിഎൻപി) സൈന്യത്തിന്റെയും പിന്തുണ തനിക്കുണ്ടെന്ന് ഷഹാബുദ്ദീൻ വ്യക്തമാക്കി. തന്നെ മാറ്റുന്നതിനെ ബിഎൻപി ശക്തമായി എതിർത്തതായും അദ്ദേഹം വെളിപ്പെടുത്തി. ഷെയ്ഖ് ഹസീന സർക്കാർ പുറത്തായതിനെത്തുടർന്ന് 2024 ഓഗസ്റ്റ് 8-നാണ് മുഹമ്മദ് യൂനുസ് ഇടക്കാല ഭരണത്തലവനായി ചുമതലയേറ്റത്. നിലവിലെ രാഷ്ട്രീയ സാഹചര്യത്തിൽ സൈന്യത്തിന്റെയും താരിഖ് റഹ്മാന്റെയും പിന്തുണയുള്ളതിനാൽ 2028 ഏപ്രിൽ വരെ ഷഹാബുദ്ദീൻ പ്രസിഡന്റ് സ്ഥാനത്ത് തുടരാനാണ് സാധ്യത.
The post ബംഗ്ലാദേശിൽ ഭരണഘടനാ പ്രതിസന്ധി; യൂനുസിന്റെ നടപടികൾ നിയമവിരുദ്ധമെന്ന് പ്രസിഡന്റ് ഷഹാബുദ്ദീൻ appeared first on Express Kerala.