കേരളത്തിന്റെ ഔദ്യോഗിക നാമം “കേരളം” എന്ന് മാറ്റാനുള്ള സംസ്ഥാന സർക്കാരിന്റെ ശുപാർശ കേന്ദ്രം പരിഗണിക്കുന്നുവെന്ന റിപ്പോർട്ടുകൾ പുറത്തുവന്നതോടെ, ഈ മാറ്റം ഭാഷാപരമായ എന്ത് പ്രത്യാഘാതങ്ങളാണ് ഉണ്ടാക്കുക എന്ന് ശശി തരൂർ എംപി ആശങ്ക പ്രകടിപ്പിച്ചു. ഭരണഘടനയുടെ എട്ടാം ഷെഡ്യൂളിൽ ഉൾപ്പെട്ടിട്ടുള്ള എല്ലാ ഭാഷകളിലും സംസ്ഥാനത്തിന്റെ പേര് മലയാളം ഉച്ചാരണത്തിന് സമാനമായി മാറ്റണമെന്ന് ആവശ്യപ്പെട്ട് കേരള നിയമസഭ രണ്ടുതവണ പ്രമേയം പാസാക്കിയിരുന്നു. ഈ പശ്ചാത്തലത്തിലാണ് ഭരണഘടനാ ഭേദഗതിയിലൂടെയുള്ള പേരുമാറ്റത്തിന് വഴിതെളിയുന്നത്.
പേരുമാറ്റത്തെ സ്വാഗതം ചെയ്യുന്നതോടൊപ്പം തന്നെ, ഇംഗ്ലീഷ് ഭാഷാ പ്രയോഗങ്ങളിൽ വരാനിരിക്കുന്ന ആശയക്കുഴപ്പങ്ങളെ ശശി തരൂർ തന്റെ തനതായ ശൈലിയിൽ ചൂണ്ടിക്കാട്ടി. ‘കേരള’ എന്നത് ‘കേരളം’ ആകുമ്പോൾ, ഇവിടുത്തെ നിവാസികളെ വിശേഷിപ്പിക്കാൻ ഉപയോഗിക്കുന്ന ‘Keralite’ എന്ന വാക്കിന് പകരം എന്ത് ഉപയോഗിക്കുമെന്നാണ് അദ്ദേഹം ചോദിക്കുന്നത്. ‘Keralamite’ എന്നത് ഒരു സൂക്ഷ്മജീവിയുടെ പേരുപോലെയോ, ‘Keralaman’ എന്നത് ഒരു അപൂർവ ധാതുവിന്റെ പേരുപോലെയോ തോന്നിക്കുന്നുവെന്നും അദ്ദേഹം തമാശരൂപേണ എക്സിൽ കുറിച്ചു. പുതിയ വാക്കുകൾ കണ്ടെത്താൻ ഒരു മത്സരം തന്നെ സംഘടിപ്പിക്കാവുന്നതാണെന്നും അദ്ദേഹം മുഖ്യമന്ത്രിയെ ടാഗ് ചെയ്തുകൊണ്ട് നിർദ്ദേശിച്ചു.
Also Read: ലഹരി വേട്ടയ്ക്ക് ഇനി ‘സൊറ്റോക്സ്’; രണ്ട് മിനിറ്റിൽ ഫലം, പരിശോധന കടുപ്പിക്കാൻ കേരള പൊലീസ്
സംസ്ഥാന ബിജെപി അധ്യക്ഷൻ രാജീവ് ചന്ദ്രശേഖർ ഈ നീക്കത്തെ പൂർണ്ണമായും പിന്തുണച്ച് രംഗത്തെത്തി. കേരളത്തിന്റെ പാരമ്പര്യവും സംസ്കാരവും സംരക്ഷിക്കുന്നതിനും ഭാവിയിലേക്കുള്ള ശക്തമായ സമ്പദ്വ്യവസ്ഥ കെട്ടിപ്പടുക്കുന്നതിനും ഈ പേരുമാറ്റം അനിവാര്യമാണെന്ന് അദ്ദേഹം അഭിപ്രായപ്പെട്ടു. ഓരോ മലയാളിയും മാറ്റം ആഗ്രഹിക്കുന്നുണ്ടെന്നും, വ്യാജ വാഗ്ദാനങ്ങളുടെ രാഷ്ട്രീയത്തിന് പകരം വികസനത്തിന്റെ രാഷ്ട്രീയം കൊണ്ടുവരാനുള്ള പ്രതീകമാകും ഈ മാറ്റമെന്നും രാജീവ് ചന്ദ്രശേഖർ കൂട്ടിച്ചേർത്തു.
മലയാള ഭാഷയിൽ പണ്ടുമുതലേ ഉപയോഗിച്ചുവരുന്ന ‘കേരളം’ എന്ന പദം ഔദ്യോഗിക രേഖകളിലും ഇതര ഭാഷകളിലും ഒരുപോലെ പ്രതിഫലിപ്പിക്കുക എന്നതാണ് ഈ പ്രമേയത്തിന്റെ പ്രധാന ലക്ഷ്യം. സ്വാതന്ത്ര്യലബ്ധിക്ക് ശേഷം ഭാഷാടിസ്ഥാനത്തിൽ സംസ്ഥാനങ്ങൾ രൂപീകരിച്ചപ്പോൾ ‘കേരളം’ എന്ന പേരാണ് മലയാളികൾക്കിടയിൽ സ്വീകാര്യമായത്. എന്നാൽ ഇംഗ്ലീഷ് രേഖകളിൽ ഇത് കേരള എന്നായി മാറുകയായിരുന്നു. ഈ വൈരുദ്ധ്യം പരിഹരിക്കാനാണ് നിയമസഭ ഐകകണ്ഠ്യേന പ്രമേയം പാസാക്കി കേന്ദ്രത്തിന് അയച്ചത്.
The post ‘കേരളം’ എന്ന് മാറ്റിയാൽ പിന്നെ ‘കേരളീയൻ’ ആരാകും? പേരുമാറ്റത്തിൽ കുഴക്കുന്ന ചോദ്യങ്ങളുമായി ശശി തരൂർ appeared first on Express Kerala.