ട്വന്റി-20 ലോകകപ്പിൽ വെസ്റ്റ് ഇൻഡീസിനെതിരെ നടത്തിയ തകർപ്പൻ പ്രകടനത്തിന് പിന്നാലെ ഐസിസി ടി-20 ബാറ്റിങ് റാങ്കിങ്ങിൽ വൻ കുതിപ്പുമായി മലയാളി താരം സഞ്ജു സാംസൺ. 25 സ്ഥാനങ്ങൾ മെച്ചപ്പെടുത്തിയ സഞ്ജു 40-ാം റാങ്കിലേക്കാണ് എത്തിയത്. വിൻഡീസിനെതിരായ നിർണായക മത്സരത്തിൽ 50 പന്തിൽ നിന്ന് പുറത്താകാതെ നേടിയ 97 റൺസാണ് സഞ്ജുവിന് ഈ നേട്ടം സമ്മാനിച്ചത്. റാങ്കിങ്ങിൽ ഇന്ത്യൻ ഓപ്പണർ അഭിഷേക് ശർമ (874 പോയിന്റ്) ഒന്നാം സ്ഥാനത്ത് തുടരുമ്പോൾ, പാകിസ്താന്റെ സാഹിബ്സാദ ഫർഹാൻ രണ്ടാമതുണ്ട്. ഇഷാൻ കിഷൻ നാലാമതും തിലക് വർമ ആറാമതും സൂര്യകുമാർ യാദവ് ഏഴാമതുമാണ് റാങ്കിങ്ങിലുള്ളത്. ബൗളിങ്ങിൽ ഇന്ത്യൻ സ്പിന്നർ വരുൺ ചക്രവർത്തി തന്റെ ഒന്നാം റാങ്ക് നിലനിർത്തി.
Also Read: ‘ഇന്ത്യൻ ആരാധകരെ നിശബ്ദരാക്കും’! പാറ്റ് കമ്മിൻസിനെ മാതൃകയാക്കി സാം കറന്റെ വെല്ലുവിളി
ഇംഗ്ലണ്ടിനെതിരായ ലോകകപ്പ് സെമി ഫൈനലിന് ഇന്ത്യ തയ്യാറെടുക്കുമ്പോൾ ടീമിന്റെ ഏറ്റവും വലിയ പ്രതീക്ഷയായി സഞ്ജു സാംസൺ മാറിയിരിക്കുകയാണ്. ടൂർണമെന്റിന്റെ തുടക്കത്തിൽ ഇലവനിൽ ഇടം ലഭിക്കാതിരുന്ന സഞ്ജു, ലഭിച്ച അവസരം കൃത്യമായി വിനിയോഗിച്ചാണ് ടീമിലെ തന്റെ സ്ഥാനം ഉറപ്പിച്ചത്. ഓപ്പണർ അഭിഷേക് ശർമ ഫോം കണ്ടെത്താൻ പ്രയാസപ്പെടുന്നതും ടീമിലെ ആദ്യ മൂന്ന് ബാറ്റർമാരും ഇടംകൈയ്യന്മാരായതും സഞ്ജുവിന് തുണയായി. എതിരാളികൾ ഓഫ് സ്പിന്നർമാരെ ഉപയോഗിച്ച് ഇന്ത്യൻ വിക്കറ്റുകൾ വീഴ്ത്തുന്നത് തടയാൻ സഞ്ജുവിന്റെ സാന്നിധ്യം അനിവാര്യമാണെന്ന് മാനേജ്മെന്റ് തിരിച്ചറിഞ്ഞു. ഈ തന്ത്രപരമായ നീക്കം വിൻഡീസിനെതിരെ ഫലം കണ്ടതോടെ സെമിയിലും സഞ്ജു തന്നെയാകും ഇന്ത്യയുടെ പ്രധാന ആയുധം.
മുംബൈ വാംഖഡെ സ്റ്റേഡിയത്തിൽ നടക്കാനിരിക്കുന്ന സെമി പോരാട്ടത്തിൽ സഞ്ജുവിൽ നിന്ന് മറ്റൊരു വെടിക്കെട്ട് പ്രകടനമാണ് ആരാധകർ പ്രതീക്ഷിക്കുന്നത്. അഭിഷേക്, ഇഷാൻ കിഷൻ എന്നിവർക്കൊപ്പം വൺഡൗണായി തിലക് വർമയും എത്തുന്ന ബാറ്റിംഗ് നിരയിൽ സഞ്ജുവിന്റെ മധ്യനിരയിലെ പ്രകടനം നിർണ്ണായകമാകും. നിലവിലെ റാങ്കിങ് കുതിപ്പും വിൻഡീസിനെതിരായ തകർപ്പൻ ഫോമും താരത്തിന് വലിയ ആത്മവിശ്വാസം നൽകുന്നുണ്ട്. ബാറ്റിങ്ങിൽ സഞ്ജുവും സൂര്യകുമാറും നയിക്കുമ്പോൾ ബൗളിങ്ങിൽ വരുൺ ചക്രവർത്തിയുടെ മിസ്റ്ററി സ്പിന്നും ബുംറയുടെ കൃത്യതയുമാണ് ഇന്ത്യയുടെ കരുത്ത്.
The post റാങ്കിങ്ങിൽ സഞ്ജുവിന്റെ വമ്പൻ കുതിപ്പ്; 25 സ്ഥാനങ്ങൾ മെച്ചപ്പെടുത്തി താരം; സെമിയിൽ ടീം ഇന്ത്യയുടെ വജ്രായുധം! appeared first on Express Kerala.
